Atos 14 - Bíblia

Icônio Rawakanaxyawakna Paulo, Barnabé Piranapni

¹ Waneya Icônio poktshiya waneko pixka potuko rixatkana Paulo, Barnabé. Hjihlokluna hanjihohnewakapji. Waneya wan-rixa hinkaklewletna haté hixo yine judeu-nerune hiyrun-koxa grego-nerune halixatka.

² Seyni judeu-nerune malixkanetka komyekahchinikanutna judeu mixkane hyokchatna Paulo, Barnabé hma malixyawakanupna.

³ Seyni wanepnawaka Paulo, Barnabé hix-hohne Icônio poktshi rawna. Runkakletluna Jesus Cristo pirana hike pikanu. Hiyrun-koxa Hoyakalu hekhitlu halikaka pirana rixyawaka Hoyakalu chinikannu pirana klu tshinanu renekpixkonutna hetkalurkaka hiyrunu himyekaklewatatshri hkamhiywakna.

⁴ Hiyáhoni tsru poktshi hajene kotspalahchinikankaka. Satkaka judeu-ne homkahitatka seyni pimrine nuretkalune romkahitatkana.

⁵ Waneya judeu mixkane hiyrun-koxa judeu-ne h-chefe-teneymakananuko haluka kamniretna hiyrunu hsotlujpiraxyawakna Paulo, Barnabé.

⁶ Seyni rimatatkana Paulo, Barnabé. Hiyáhoni rasukatkana Listra hiyrunu Derbe poktshikaka Licaônia tshijne hwatshine hiyrunu wanestsi hajeru poktshikaka hyana.

⁷ Waneya wane koxa runkaklexyaluna kihle piranalu potuko hiwekkaklewatatshri pirana.

Paulo Hiyrunu Barnabé Listra Hiyrun-koxa Derbe Poktshikaka Rawyawakna Piranapni

⁸ Waneya Listra poktshi rawakanata satu jeji tuplahohnekanatatshri hijixi himtuknu tshinanu. Hmatureyakawa wan-rixatka hiyáhoni hikeklu hohne hyanatka.

⁹ Xye jeji yijnakotlu Paulo tokanu. Waneya Paulo hetlu, rimathetatkalu xye jeji halixlu hiyrunu rumukata hitskalakletko. Paulo yopukhapotutatkalu.

¹⁰ Waneya Paulo hipokananu hiynumatlu wane htshinru myankatu: — Ppalnanu! Pyopkakanu! Waneya jeji palna, hyopkaka waneya hyinuwaka yanretatka.

¹¹ Waneya yine hexinri Paulo kamhanru hyinuwaka saplewletna wannako htokanuya: — Hoyakalune hapoka jejine yáholu rixa hapokletna.

¹² Waneya Barnabé rutakhiwakatna Júpiter seyni Paulo rutakhiwakatna Mercúrio klu tshinanu walepotni hinkaklewatatshri.

¹³ Júpiter templo-pjite poktshi hinaple rawapa. Hiyáhoni Júpiter sacerdote-te hanikatkalu boi-ne hiyrunu sahyikaka kahwuru kamhakaluru haté poktshi jihlojikowaka yehi. Sacerdote yineymakananuko haluk-hiylaletlu boi-ne henekachalu rixyawakapa Paulo, Barnabé tshinanu.

¹⁴ Waneya rimaxinixkana nuretkalune Paulo, Barnabé wan-rixpiraxyawakna yine, Paulo, Barnabé suskamkaxnawa waneya yine hixolune hanikajite rapokatkana. Hsaplewatna:

¹⁵ — Jejine, kluneru tshinanhe wan-hixa? Hix-koxa yinechawu hixa pixka wixa. Klunerukta hjema, hix-koxa jemlu. Hewi wapoka wunkaklexyawaklu kihler-potuko tokantshi hiwekkaklewatatshri pirana, xyekaka hmahijeru kamhaleta hiknokachaxyawaklu hiyáhoni Hoyakalu halikakalutu hiwekatshri homkahitanu, tenhohne, tshiji, mar powha kamhatshri hiyrunu ptowruka nyikaka hitokote hwatshri kamhatshri.

¹⁶ Mitshikananu Hoyakalu hetachatlu ptowru nerkaka wannako ralujyawakako romkahixyawakna.

¹⁷ Seyni Hoyakalu ptowru hohnekananuka rekhixnawa katni kihleru hkamhiywaka tshinanu. Hoyakalukatkani hina yokanatatshri tenhohneya hiyrunu ramikowaka papko henekjeru. Hoyakalukatkani nijittshi koxa henekjeru hiyrunu renekwu wumuwaxyawaka.

¹⁸ Xye pejnu htshinatkana Paulo, Barnabé seyni wanepnawaka psokaklu hi rakot-himaletletna yine hma muylaxyakanupluna boi-ne wanna tshinanu henekachalu tshinanupa.

Paulo Sotlujexikowaka Piranapni

¹⁹ Seyni satkaka judeu Antioquia, Icônio poktshikaka hichpajikatshine yokchatna hixolune yine hiyáhoni hsotlujetluna Paulo waneya hipnatshri hkahwakluna hkosemtluna tsru poktshi maleka.

²⁰ Seyni Cristo halixatshine rapatjeyehitluna, hsajrukluna Paulo. Hpalnatnaka waneya tsru poktshi hjihlokatnaka. Waneya wale prika Paulo, Barnabé-yma Derbe poktshi nwaka hyatka.

²¹ Waneya Paulo, Barnabé hinkakletlu kihle piranalu potuko hiwekkaklewatatshri pirana Derbe poktshiya. Waneya hixo yine Hoyakalu tokanu homkahitatshine rixnawana. Waneya wane pnute Paulo, Barnabé satkapatnaka Listra, Icônio poktshikaka, Antioquia poktshi rapokna.

²² Paulo, Barnabé mixkowahchinikankakatkana Cristo halixatshine ralixleyna hiyrunu runkakletluna salewaktshi pirana yine hixo salewaktshikaka retanna haté Hoyakalu pohirewaxyawaka hjihlojyawakapna.

²³ Waneya Paulo, Barnabé satkaka hapatjexikowaka rutakna Cristo halixatshine hapatjetatshine kosekatshine. Waneya ranjihohnetna, rohajirewatna hiyrunu Tsru Hixikatshriwa Hoyakalu rapohchinikanutna Cristo halixatshine hapatjetatshine kosekatshine tshinanu hmunanhalerna.

²⁴ Hiyáhoni Paulo, Barnabé, Pisídia tshijne psoluka hyap-kopruremtna. Waneya Panfília tshijne rapokna.

²⁵ Waneya runkakletluna hiwekkaklewatatshri pirana Perge poktshi yehiya waneya hyatkana haté Atália poktshi yopjewakle.

²⁶ Wane hpokowniyna kanawa waneya wane ruchpakamxyana, Antioquia poktshi rapokna. Wane mitshi ruchpajyatkana wane rukchijyaluna Hoyakalu hislahle wale kamrurtshi hkamhanruna tshinanu.

²⁷ Waneya rapojinixkana Antioquia Paulo, Barnabé hapatjetna Cristo halixatshine hapatjetatshine waneya runkakna psoluka Hoyakalu hixkajyawakna pirana hiyrunu Hoyakalu hixkajyawaklu judeu mixkane koxa ralixyawakna pirana.

²⁸ Waneya hix-hohne wan-rutukatkana halixatshineyma.