Atos 13 - Bíblia

Barnabé Hiyrunu Saulo Yinuwaka Kihler-pirana Runkaklexyawakna Piranapni

¹ Cristo halixatshine hapatjetatshine Antioquia poktshiya rawakanatna satkaka Hoyakalu tokanu hinkakletatshri hiyrun-koxa satkaka hasruklewatatshri. Waneru Barnabé, Simeão, Níger hiwakatletatshri; Lúcio, Cirene hichpajikatshri; Manaém, Herodes-yma kammanetkalurni hiyrunu Saulo.

² Waneya pa kata Tsru Hixikatshriwa Hoyakalu rimalwujekanaxinna hiyrunu rohajirewakanaxinna, Hoyakalu Hiwejikaluru wan-tshina: — Xawakni Barnabé hiyrunu Saulo hkotspalaxinno kamrurtshi tshinanu. Nnuretna satu kamrurtshi tshinanu.

³ Hiyáhoni rohajirewatna. Ranjihohnetna. Waneya Barnabé hiyrunu Saulo hoho rutakamyotna waneya hyokanatatkana hyiywakapna.

Kahontshi Elimas Piranapni

⁴ Hiyáhoni Barnabé hiyrunu Saulo Hoyakalu Hiwejikaluru yokanre tshinanu, Selêucia nwaka hyana. Waneya waneko hpokowniyna hyahap-hatna. Chipre rapokna. [Wale mar powha hanikajite hwatshijitatshri.]

⁵ Waneya Salamina poktshi rapojinixkana hyinuwaka hinkakletletlu Hoyakalu tokanu judeu hanjihohnewaklepjikakaya. João Marcos hapaka repixyawakapna.

⁶ Waneya hkoprutna psoluka mar powha hanikajite hwatshijitatshri haté Pafos poktshi rapokna. Wane rexyaluna satu kahontshi judeu-neru halikaka tokantshi minje hinkakletatshri. Wale hiwakni Barjesus.

⁷ Tshiji towutatshri Sérgio Paulo tshinkaluru repireta. Jimatkaleru potu Sérgio Paulo tshinkaluru. Waneya Sérgio Paulo tomhakjixna Barnabé, Saulo klu tshinanu Hoyakalu tokanu raluka jemleta.

⁸ Seyni kahontshi Elimas tshinkaluru kamnitna. (Elimas, walekni Barjesus hiwakni grego-nruya.) Raluk-himaletletlu tshiji towutatshri Jesus hma malixyawakanupa.

⁹ Waneya Saulo, walekni Paulo tshinkaluru, katsepoylu Hoyakalu Hiwejikaluru hyopukhapotutlu Elimas.

¹⁰ Paulo wan-tshinru: — Pixa Satanás whenyi! Pkamnitlu ptowru halikakalutu. Katsepoyyi yokwijrewlu hiyrunu weyawlu. Hi he putukanu Hoyakalu tokanu halikakalutu pkoprotajyawaka weyawlu pikahwajyawaklu?

¹¹ Xawakni Tsru Hixikatshriwa Hoyakalu yotnekanyi mayhaletu pixyawakapa. Pimri hohnekaka hike pa hixanu petanutka, hi koxa katalu tkatshi hichpajyawaka petanutka. Waneklu potuko ptowruka ruwnayhalexyatka Elimas tshinkaluru. Hyanachata, rujhamkalu satu yineru kanojixyawaklu himyoya.

¹² Waneya xye rexinixka tshiji towutatshri, ralixatka. Rimyejyatkalu Tsru Hixikatshriwa Cristo hasruklewleya.

João Marcos Satokanwakatlu Jerusalém Piranapni

¹³ Waneya Paulo waleymalunekananu Pafos ruchpajyana hyahap-hatna haté Perge poktshi Panfília tshijne sreta rapokna. Seyni João Marcos hichomtna waneya hsatkapatka Jerusalém poktshi.

¹⁴ Seyni wanna Perge hyahap-haxyana haté Antioquia poktshi, Pisídia tshijne sreta rapokna. Waneya hapnanuxikalur-hohne rixini hyanwakatluna judeu hanjihohnewaklepji. Waneya wane htuplatna.

¹⁵ Rali hethaletkoklunutka Moisés yonre hiyrun-koxa Hoyakalu tokanu hinkakletatshine yonawahle waneya hanjihohnewakapji chefe-tene hinkaklewjixna Paulo-ne: — Wimolene, waneyhi satu tokantshi hiykolu pirana yine tshinanupa? Rawini hinkaklewatanu.

Paulo Hinkaklewata Antioquia Poktshiya Piranapni

¹⁶ Waneya Paulo yotunota, rekhitna himyoya potshke rixyawakapna. Waneya wane htshina: — Jejine, israel-nerune hiyrun-koxa hixa ptowruneka Hoyakalu kahwakpiratatshine, hyijnakotanu.

¹⁷ Israel Hoyakalute nuretna wutsrukatenni. Tsru potu rixkajyawakna yine Egito tshijne rawakanaxinna. Waleko kochpakatkana Egito-ya tsru hpixkonuyma.

¹⁸ Waneya quarenta mhale pchinika retachatna rixjexyawakna popriwakaya.

¹⁹ Hoyakalu nikatna sete nerunkaka Canaã tshijneya hiyáhoni Hoyakalu rayinetene henektshijita.

²⁰ Quatrocentos e cinquenta mhale pchinika wan-rixna. Wane pnute Hoyakalu henekna jemahchinikanyehirewatatshine haté Hoyakalu tokanu hinkakletatshri Samuel-klu papko.

²¹ Waneya hixolune yine hanjitlu satu phuru htowuxyawakna. Hoyakalu henekna Saulo, Quis whene, Benjamim-neru. Quarenta mhale pchinika phuru rixatka Saulo.

²² Waneya rali kochpakletkatka Saulo, Hoyakalu henekna Davi hpohirna rixyawakapa. Hoyakalu wan-tshinanwakatlu Davi: “Netlu Davi, Jessé whene, wale poyikowkakno hiyrunu ptowruka nalujyawaka hkamhanu.”

²³ Hiyáhoni Hoyakalu hanikyehitna Israel satu Davi klopichane wanna hiwekkakatshri rixyawakapa, hanu rixa kojiretletna mnukawa, walekni Jesus.

²⁴ Hma mapokkanuklunuwa Jesus, João hinkaklewyehitna Israel whenene. Runkakna satu batismo hehchinikanru pirana, ptowru israel-nerune tshinanupa.

²⁵ Waneya ralipiraxinixkalu hkamrure João wan-tshina: “Kathe pkahwakno? Hita hi waleno hkahwaklerno! Seyni hita pnute runanu wale. Hita hi tsru hixikatshriwano h-sandalha-tetslu nkochpirojyawaka.”

²⁶ — Jejine, nomolene, Abraão klopichane whenene hiyrun-koxa katukta kahwakpiratlu Hoyakalu hixa tskalaya hyijnakotanno: Hixa tshinanu hyokanatka xye Hiwekkaklewatatshri pirana.

²⁷ Jerusalém hajene haté htsrukakalutene koxa hi rimathetluna Jesus yine Hiwekkakatshri rixyawaka. Yáholu ptowru hapnanuxikalur-hohne rethata hi rimatjemluna Hoyakalu tokanu hinkakletatshri tokanu. Seyni wanepnawaka mitshikawako yokanatkaluru hakanhatka Jesus jihyehixikolu hohne.

²⁸ Hike rukchijyaluna ruylaxikolupa seyni wanepnawaka Pilatos ranjitna ruylaxikowakapa.

²⁹ Waneya rali kamhalexinixkaluna ptowruka Hoyakalu tokanu yonatkaluru tshinyawaka pixka mnukawa, cruz hoho hkochtshejyanatkaluna waneya yomletshi rutakanatkaluna.

³⁰ Seyni Hoyakalu yotunkaklu hipuktshiya.

³¹ Wane wkatanu hix-hohne retkatnaka rimotsaneyma Galileia Jerusalém yapatshine. Wannakni Jesus hiphujtatatshine ptowru yineru tshinanu.

³² Hiyáhoni wunkakhi kihler-potuko tokantshi hiwekkaklewatatshri pirana Hoyakalu mitshi hinkaklexyana wutsrukatenni,

³³ wale renekatkawu hixa, wutsrukatenni whenenwu Hoyakalu hiwekkajinixkalu Jesus. Wane potuko htshina yonawahleta Hoyakalu pirana yonatkaluru hepi rixinri Salmo: “Pixni Noturyi. Xawakni nwuhenetyi.”

³⁴ Hiyrunu Hoyakalu wan-tshinanwakatlu Jesus hiwejinixnaka pirana, hikeklu hohne hipuktshi nikatanru. Hiyáhoni mnukawa wane htshinatka Hoyakalu: “Nenekanhi hihle hchinikanrewlukaka potukalni ntshina hinkaklexyatkalu Davi.”

³⁵ Wane koxa htshina satuko Salmo-mtaya: “Hi pucho hijpahlechatanru Pixanu Potukalu.”

³⁶ Waneya Paulo pnute hya hinkakleta: — Davi kamhalu Hoyakalu halujyawaka riwejinri pchinika. Waneya rupnatka, rutsrukatenni yehi hkapnaxika waneya himane hijpahatka yomletshiya.

³⁷ Seyni Hoyakalu yotunokajinri, wale hi hijpaha yomletshiya.

³⁸ Hiyáhoni jejine, nomolene, hixa ptowrunekhi himatanu xako, Jesus tshinanu runkakletka hektuntshi hiknojikolu pirana.

³⁹ Moisés yonreru pirana hi powratlewata seyni Jesus tshinanu ptowru Cristo halixatshripa powratko ptowru potuyako.

⁴⁰ Xakoka! Hislahinwa hma makanhayehixyawakanuphi Hoyakalu tokanu hinkakletatshine hinkajyatkawu mitshi:

⁴¹ “Hjemanu, jeyikaklerune! Hixa himyekachatanu wane pnute hipnanuna, klu tshinanu satu kamrurtshi nkamhanu hixa hiwekka pchinika seyni hixa hi halixanru yáholu hinkakka.”

Judeu-ne Heyijyawakna Paulo, Barnabé Piranapni

⁴² Waneya hanjihohnewakapji ruyakamxyana Paulo, Barnabé, ranjitkana hapnanuxikalur-hohne hinatshripa wale pirana runkajyawakapna hiyrunukotnaka.

⁴³ Waneya hnikawninixka hapatjeru hixolune judeu-ne hiyrun-koxa judeu mixkane seyni judeu hixjexyawaka homkahitatshinetka homkahitatkalu Paulo, Barnabé. Waneya Paulo, Barnabé hiykotna wanna ptowruneka hpoyehitahchinikanuxyawakapna Hoyakalu hihlenuya.

Paulo Barnabé Hiknokamxyawakna Judeu-nerune Piranapni

⁴⁴ Waneya rapojinixka hapnanuxikalur-hohne, psokaklu tsru poktshi hajene ptowruneka hapatjeta hyijnakoxyawakapluna Hoyakalu tokanu.

⁴⁵ Seyni retkoklunutkana judeu-ne hixolune yine hapatjetatka wanna hahxapotutna Paulo-ne. Waneya judeu-ne heyiklu Paulo-ne raluk-hiknokletluna Paulo hinkakle.

⁴⁶ Seyni Paulo, Barnabé htsernu hchinikanuyma runkaklewatna wane htshinna: — Raluk-hinkaklehapkatna hixa judeu-nhi Hoyakalu tokanu. Seyni hixa malujyawakanru tshinanu hiyrunu hiwejinri hikeklu hohne mnikawnakatupa hixa malujyawakanru tshinanu hixa wuknokanu xawakni judeu mixkane wunkakanu.

⁴⁷ Klu tshinanu xyekni htowutwu Tsru Hixikatshriwa Hoyakalu mnukawa: “Hixa nutaka katalu hixyawakapa judeu mixkane tshinanu hiyrun-koxa hiwekkaklewatatshri pirana hanikanwakaxyawakna psol-tshijne hajeneka haté hmahaxyawaka tshiji.”

⁴⁸ Waneya judeu mixkane xye hjeminiklunna hpoyikowatna hiyrunu rimalwutluna Tsru Hixikatshriwa Hoyakalu tokanu. Hiyáhoni ralixna ptowruneka nuretkalunetka hkayaxyawakapna hiwejinri mnikawnakatupa.

⁴⁹ Waneya Tsru Hixikatshriwa Hoyakalu tokanu hipalaxyalu wale tshijne psoluyaka.

⁵⁰ Seyni judeu-ne yokchatna suxone tsrokakalone Hoyakalu himalwutatshrone hiyrun-koxa tsru hitakkalune tsru poktshi hajene. Hiyáhoni wanna yinuwaklu salewaktshi Paulo, Barnabé tshinanu haté hkochpakna wale tshijneya.

⁵¹ Seyni Paulo, Barnabé sandalha pahi ruplokna rimaxikowakapa ruknokatkana waneya Icônio poktshi nwaka hyatkana. [Judeu-ne hasruha wan-hixleta.]

⁵² Seyni Cristo halixatshine poyikpotukna katsepoyna Hoyakalu Hiwejikaluru.