Atos 12 - Bíblia

Herodes Kamnixyawaklu Tiago Hiyrunu Pedro Piranapni

¹ Waneklu papko phuru Herodes yinuwaka kachretna satkaka yineru Cristo halixatshine hapatjetatshine hkamnixyawakna.

² Waneya Herodes hiylakjixlu hiylalewapiya, espada tshinkaluru, Tiago, João mole.

³ Waneya Herodes rexiniklunna wale poyikowkakatkana judeu-ne, Pedro koxa hkachijixatka. Xye wan-hixatka himretkaluru hohne pão myapjetkotu kamhikolu hohne.

⁴ Waneya rali kachretatkalu Pedro, Herodes preso rutaklu. Soldado-ne quatro ptohkaka quatro-kaka satkaka ptohkaka hislahakanatlu Pedro. Herodes honra haluka Pedro hkochpakhetanuxyawakna judeu-ne Páscoa hohne wkatanuko.

⁵ Waneya Pedro preso hwa ruslahkatka seyni Cristo halixatshine hapatjetatshine psol-mixkonuko Hoyakalu ranjihohneyehitluna Pedro.

⁶ Waneya Herodes haluka kochpaklexinixkalu Pedro rekhixyawakapna, wale yetshno Pedro himkakanata hepi soldado-ne hanikajiteya. Pedro hostutka hepi sretkanoko soldado-neya. Soldado-ne hinotatkalu preso hiphaptote.

⁷ Waneya chinpotukawa rakanhayehitlu Pedro satu hiwejikaluru Hoyakalu towreru tenhohne hichpajikatshri katalu hatatlu preso hruko. Waneya Pedro-thana rutpeta hiwejikaluru Hoyakalu towreru tenhohne hichpajikatshri. Hkomyeklu. Waneya wane htshina: — Wuya chinpotu pyotunotanu. Waneya yomuwatsa hijrukatka himyo hwatsakanatatshri.

⁸ Waneya hiwejikaluru Hoyakalu towreru tenhohne hichpajikatshri wan-tshinru: — Postuskotatanu. Pyochmakanro p-sandalha-te. Waneya wan-rixatka Pedro. Waneya hiwejikaluru Hoyakalu towreru tenhohne hichpajikatshri wan-tshinru: — Pistono kpixnuru pyochmakanu. Pomkahitanno.

Pedro Preso Hichpajyawaka Piranapni

⁹ Waneya preso yehi ruchpakamxya Pedro. Romkahimtlu Hoyakalu towreru. Seyni Pedro hi himatatka ho halikakla hiwejikaluru Hoyakalu towreru tenhohne hichpajikatshri kochpaklu ho rupnawlechala. Hoyakalu pixkonu hetkaluru rikahwaklu.

¹⁰ Waneya riknohamtluna mitshikananu soldado-ne xkehi yehi hiyrun-koxa wale hapkatatatshri soldado-ne xkehi yehi riknohna. Waneya rapokna hiphapto yomuwa kamhikaluru poktshi jihlojikowaka yehi. Seyni hiphapto hitpukamta wale nanwaka wanna tshinanu. Waneya ruchpakamtna satu hapo hyapamtna waneya chinpotukawa hiwejikaluru Hoyakalu towreru tenhohne hichpajikatshri hichomtlu Pedro waneya.

¹¹ Waneya Pedro hichinikanuwpotutatka. Waneya wane htshina: — Xawakni nimatlu halikakni. Halikakni Tsru Hixikatshriwa Hoyakalu yokanatlu htowreru hiwejikaluru tenhohne hichpajikatshri hkochpajyawakapno Herodes-myoya hiyrun-koxa ptowruka judeu-nerune haluk-hixlexyawakmakno.

¹² Rimatjeminixka Pedro wan-rixyawakatka hyatka, Maria, João Marcos hinropji nwaka hyatka. Hixo yine wane hapatjekanaxya. Ranjihohnekanatna.

¹³ Waneya Pedro hitpetlu hiphapto pantshi yoptowaka sreta. Maria towrero Rode hiwakatletatshro hetaplu katnihe.

¹⁴ Waneya timatjemtokanuxinixkalu Pedro, tumuwpotuthonuka haté hi tkotpuklu hiphapto seyni t-satokhonukatka tasukamxyawaka. Tunkaklewata Pedro hiphapto maleka sreta hwa.

¹⁵ Waneya wane htshinrona: — Pix-hetko hipukalewata! Seyni wala hinkakletlu halikaka pirana rixyawaka. Waneya wanna wan-tshina: — Wale hetko Pedro-ni samenrutka.

¹⁶ Seyni Pedro pnuteko hixa hitpereta. Hiyáhoni hiphapto hkotpukna retluna Pedro-katkani. Rimyekna.

¹⁷ Waneya Pedro hekhitna himyoyma potshke rixyawakna waneya runkakna hanu rixa kochpakletlu preso yehiya Tsru Hixikatshriwa Hoyakalu. Waneya wane htshina: — Xye pirana Tiago hinkakanu hiyrun-koxa wimolene Cristo halixatshine. Waneya wane ruchpajyatka pnuko hyatka.

¹⁸ Waneya wale prikatkani tsru kaheknanuwlu rixna soldado-ne klukta rixanatka Pedro-ni.

¹⁹ Ptowru sretaka rujhiylu Herodes seyni hi rukchikatkalu. Hiyáhoni repomsatna soldado-ne Pedro hinotatshine waneya ruylajixatkana soldado-ne. Waneya Herodes Judeia tshijne hichpajyatka Cesareia poktshi rapokatka. Wane rawatka pchini hohnejiji.

Herodes Hipninri Piranapni

²⁰ Phuru Herodes hahkajetna hepi poktshi hajene, Tiro poktshi hiyrunu Sidom poktshi hajene. Seyni wanna hepi poktshikak-hajene ptowruneka yanwakatlu Herodes. Mitshikananhapka rukchiklu Blasto hepixlewle, walekni Herodes towreru. Wane pnute Herodes nwaka hyanna hiyáhoni ranjitluna hmahnanuwaxyawakanupa klu tshinanu hyoptotluna nikkaluru htshijneyna Herodes tshijne hichpajikatshri.

²¹ Waneya h-marca-xikolu hohne Herodes makatlu phuru mkalu kihleru. Phuruko htuplawakle htuplata Herodes waneya runkaklewyehitna.

²² Waneya hsaplewatna yine: — Tukwala hoyakalu plama potuko hi yineru plamatkani.

²³ Hiyáhoni waneklu papko potuko hiwejikaluru Hoyakalu towreru tenhohne hajeru himtukatkalu Herodes-ni klu tshinanu hi hpoyahnutakjixlewatni Hoyakalu potu. Waneya homawlu nikanru waneya rupnanatka.

²⁴ Seyni Hoyakalu tokanu tseruwnatka hiyrunu rixolewnatka rupalatatka.

²⁵ Waneya hnikaxinixkaluna hkamrurna Barnabé hiyrunu Saulo Jerusalém poktshi hsatokna, ranikluna João Marcos tshinkaluru.