Atos 11 - Bíblia

Pedro Hinkajyawakna Jerusalém Hapatjexikatshine Piranapni

¹ Waneya nuretkalune hiyrun-koxa Cristo halixatshine hapatjetatshine Judeia tshijne psoluyako yijnakpiranyehitna judeu mixkane koxa yoptotlu Hoyakalu tokanu.

² Hiyáhoni Pedro Jerusalém yanwakaxinixka judeu-ne yanhaklu Pedro.

³ Wane htshinna: — Pixakni jihlokyehitna mjiprojhaptojimtatkane neru yehi. Wannayma pnika.

⁴ Waneya Pedro hinkakna wanna wale pirana psoluka hyinuwakleya haté hmahaxyawaka. Waneya wane htshina:

⁵ — Jope poktshi nwakanaxini nanjihohnekanaxini waneyakta Hoyakalu pixkonu tshinanu nexyalu tenhohne hichpajikatshri jijrukaluru quatro tsojri rostuxika. Hit-yehi rapoka.

⁶ Waneya nyopukhatlu, netpotutlu. Netlu quatro jixirune tshiji hajene hiyrunu nikalu kmatsyirune hiyrunu yosrolotatshine hiyrun-koxa kamejirune tenhohne yapatshine neta.

⁷ Hiyrun-koxa tokantshi njema wane ntshinjeru: “Pedro, ppalnanu, puylatanru waneya pnikanru.”

⁸ Waneya nuhita: “Hike, Nutsrukate, klu tshinanu hikeklu hohne nniklu nikalu malukkotu ho minikole.”

⁹ Waneya rimepeta tokantshi tenhohne hichpajikatshri wan-tshina: “Wale honra Hoyakalu hihlelerutka hi wane ptshinanru malukkotni.”

¹⁰ Waneya map-kata wan-rixatka waneya wale ptowruka tenhohne hya satokletatka.

¹¹ Waneya waneklukawa potuko pantshi nwakanaxini rapokna mapa jejine. Wanna Cesareia poktshi hyokanaxikatkana hita nwaka.

¹² Waneya Hoyakalu Hiwejikaluru towutno nyiywakhapkapatka wannayma hike npikanu. Hiyrunu nyi seis jejine Cristo halixatshine hitaymatka hita hapakatka. Waneya Cornélio-pji wjihlokatka.

¹³ Waneya wale hinkakwu hanu rixa hakanhalyehitatkalu satu hiwejikaluru Hoyakalu towreru tenhohne hajeru hipjiya hyotunota waneya wane htshina: “Jope poktshi pyokanaxinna jejine Simão htomhiywakapa wale yokle hiwakni Pedro.

¹⁴ Walekni hinkakanyi tokantshi hiwekkaklewatatshri tokanu piwekkakko pixa hiyrun-koxa ptowruneka pipji hajene.”

¹⁵ Waneyakta hajeyrino nyinuwaka yanumletawa, rapokhohotatkana Hoyakalu Hiwejikaluru, hixa mitshikananu pixka rixa rapokhohokanaxinwu.

¹⁶ Waneya nuchinikatkalu Tsru Hixikatshriwa tokanu wan-tshinyawaka: “Halikaka João batiz-jekanatna honhaya seyni hixa batiza-tkotka Hoyakalu Hiwejikaluruya.”

¹⁷ Hiyáhoni Hoyakalu henejinna waleko renekachaleko koxa hixa pixka rixa henekletna Wutsrukate Jesus walixiniklunu hiyáhoni hanhe nixa himaletletanru Hoyakalu?

¹⁸ Waneya xyekaka tokantshi hyijnakoxinixkana nuretkalune rutshrokna. Ranjitluna Hoyakalu wane htshinruna: — Hiyáhoni Hoyakalu henekkoxna judeu mixkane riwejyawakna rehchinikanre tshinanna.

Cristo Halixatshine Hapatjetatshine Antioquia Poktshi Hajene Piranapni

¹⁹ Waneya Estêvão hiylatkoklunutka Cristo halixatshine hapatjetatshine hipalatatka salewaktshi tshinanu. Hiyáhoni Fenícia poktshi rapokna, Chipre poktshi, Antioquia poktshi koxa rapokna runkaklewatna hiwekkaklewatatshri pirana seyni judeu-ne tsonuko runkakna.

²⁰ Seyni satkaka wanna Chipre poktshi hajene hiyrunu Cirene poktshi hajene Antioquia poktshi hapokatshinetka hinkakkoxna judeu mixkane. Runkakletluna kihler-potuko tokantshi Tsru Hixikatshriwa Jesus pirana.

²¹ Tsru Hixikatshriwa Jesus mixkowkakatkana hiyáhoni hixo yine halixatka, rehchinikanutna. Tsru Hixikatshriwa Hoyakalu romkahitatkana.

²² Waneya Jerusalém poktshi hwatshine Cristo halixatshine hapatjetatshine yijnakpiranyehitna hiyáhoni Barnabé tshinkaluru yokanatka Antioquia poktshi.

²³ Waneya rapojinixka Barnabé retlu Hoyakalu ramoxyawakna hiyáhoni rumuwata. Waneya Barnabé mixkotahchinikanutna psoluka rajiyna Tsru Hixikatshriwa Hoyakalu romkahixyawakna hiyrunu hi ruchotanruna Tsru Hixikatshriwa Hoyakalu.

²⁴ Barnabé honra kihle hchinikanuru, katsepoylu Hoyakalu Hiwejikaluru, ralixle koxa. Hiyáhoni Tsru Hixikatshriwa Jesus ralixyawakna tshinanu hixolune yine hapatjetka.

²⁵ Waneya Barnabé Tarso poktshi yatka Saulo tshinkaluru rujhapyawakapa.

²⁶ Waneya rukchiklu Saulo waneya ranikatkalu Saulo Antioquia poktshi nwaka. Waneya satu mhale psoluka wane rawna rapatjejetna Cristo halixatshine hapatjetatshineyma. Rasrukna hixolune yine. Jesus homkahitatshine yinuwaka hiphujewnahiwakleta halixatshine htshinikowakna Antioquia poktshiya.

Ágabo Hinkaklethnapuxyawaklu Tsru Natshi Piranapni

²⁷ Waneya waneklu papko satkaka Hoyakalu tokanu hinkakletatshine Jerusalém hichpajya Antioquia poktshi rapokna.

²⁸ Satu wannaymalutu Ágabo tshinkaluru yopkaka, waneya Hoyakalu Hiwejikaluru hepixle tshinanu hyanumata. Wane htshina: — Tsru natshipni psol-tshijne hajeneko tshinanu. Hiyrunu phuru Cláudio-klu papko wane potuko rixatka.

²⁹ Hiyáhoni Antioquia hajene Cristo halixatshine wan-rixa hichinikanuwletna hyokanaxyawakna repixikolna Judeia hajene Cristo halixatshine. Satkaka yokanatlu hpoyaho yokanrexyawaka pso.

³⁰ Waneya tiyiro rapatjetna waneya renekluna Paulo, Barnabé hiyáhoni wanna tiyiro hanikanwakatna Judeia hajene Cristo halixatshine hapatjetatshine kosekatshine.