Atos 10 - Bíblia

Hoyakalu Towreru Hakanhayehitlu Cornélio Piranapni

¹ Cesareia poktshi rawakanata satu jeji Cornélio hiwakatletatshri. Xye romano soldado-ne pohire italiano tshinkalune.

² Cornélio powra hchinikanuru hiyrunu Hoyakalu homkahitatshri rixyawaka. Wale hiyrun-koxa wanna ptowruneka hipji hajene. Cornélio henekachajetna judeu-ne hike mwikane hiyrun-koxa hanjihohneru ranjijexyalu Hoyakalu.

³ Pa hohne kayi nwaka três hora hetko Cornélio Hoyakalu pixkonuya retpotutlu satu hiwejikaluru Hoyakalu towreru tenhohne hichpajikatshri. Waneya hiwejikaluru Hoyakalu towreru tenhohne hichpajikatshri yanwakatlu Cornélio. Waneya Hoyakalu towreru wan-tshinru: — Cornélio.

⁴ Cornélio hetpotutlu. Hpikatka. Waneya Cornélio wan-tshinru: — Klunerni, Tsru Hixikatshriwa? Waneya wane htshinru Hoyakalu towreru: — Hoyakalu hoji sreta rapokatka panjihohnere hiyrun-koxa petwamonrekaka. Hoyakalu hichinikyi.

⁵ Hiyáhoni xawakni jejine pyokanatanu Jope poktshi hyinripna htomhiywakapluna satu jeji Simão tshinkaluru. Wale yokle hiwaka Pedro.

⁶ Pedro Simão-pji rawjeta. Waleni couro-mta jihlekleru. Mar powhastsi hwapjitatshrikni.

⁷ Waneya hyinixka hiwejikaluru Hoyakalu towreru tenhohne hichpajikatshri, Cornélio hiynumsatatshri, htomhatkana hepi htowrene hiyrun-koxa htomhalu satu soldado kahchinikanuru.

⁸ Waneya Cornélio hinkakna wale pirana psoluka waneya Jope poktshi hyokanatna.

Hoyakalu Powraxyawaklu Ptowru Nikkaluru Piranapni

⁹ Waneya wale prika hanikaj-hohnestsitkani, Pedro teno hruko ratskota ranjihohnexyawakapa. Wane pchinika runamtna Cornélio yokanatanune hatnu hapo. Jope poktshistsi rapokna.

¹⁰ Hnatshita Pedro. Raluka nikleta. Hnijituwatka pchinikna pimrine Pedro Hoyakalu pixkonu tshinanu retatkalu.

¹¹ Retlu tenhohne hitpukatshri. Waneya ret-hijrukletlu tsru mkatshri sama pixka hixatshri. Quatro tsojri hostuxikaluru hijrukatshri. Tshijistsi rapoka.

¹² Wane hitokote rawamta ptowru hixatshri niktshine, quatro jixirune, niktshine yosrolotatshine, kamejirune koxa.

¹³ Waneya Pedro yijnakotlu satu tokantshi wan-tshinatshri: — Ppalnanu, Pedro. Puylatanru, pnikanru.

¹⁴ Hiyáhoni Pedro wan-tshina: — Hike, Tsru Hixikatshriwa. Hita hikeklu hohne niklu pa hixanu kaptsholu ho tshipetkaluru.

¹⁵ Seyni tokantshi hinatnaka Pedro yehi wan-tshinatshri: — Kluneruktako Hoyakalu powratanru hi kaptsholu ptshinanru.

¹⁶ Map-kata wan-rixatka. Waneya mkatshri sama tenhohne hanikkatka.

Pedro Yoptotna Cornélio Yokanatanune Piranapni

¹⁷ Pedro hi himatahnaputlu wale nanwaka klukta xawaka reta Hoyakalu pixkonu tshinanu. Waneklukawa Cornélio yokanatanune jejine Simão-pji repomsayehitna waneya Simão-pji hiphaptote rapokna.

¹⁸ Htomhana kapjirune waneya repomhana: — Hi he hewi rawjeta Simão, Pedro yoklethiwakletatshri?

¹⁹ Seyni Pedro hichinikanretakanaxiniwalu Hoyakalu pixkonu tshinanu retleru, Hoyakalu Hiwejikaluru wan-tshinru: — Hetanu, mapa jejine hijhayi.

²⁰ Hiyáhoni palpokoxinwa, pserpikanu. Pimotsatanna. Hi pkojwakahchinikanutanu klu tshinanu Hitako yokanatna.

²¹ Hiyáhoni Pedro serpikatka. Waneya wane htshinatkana jejine: — Hitakni hijhanruno. Klu tshinanhe hina?

²² Waneya wanna wan-tshina: — Soldado-ne pohire Cornélio yokanatwu. Cornélio jeji kihle hchinikanuru, Hoyakalu kahwakpiratatshri, kihle piranyehiru ptowruneko judeu yehiya. Satu hiwejikaluru Hoyakalu towreru tenhohne hajeru towutlu Cornélio rawapakjixyawakyi Cornélio-pji pyiywakapa pyijnaktokanuxyawaklu.

²³ Hiyáhoni Pedro tshanixna hjihlojyawakapna. Renekna rumjiywakna. Waneya wale prika hyotunota Pedro. Wannayma wane hyatka. Pimrin-koxa Hoyakalu halixatshine mkoje Jope hajene himotsatlu.

Cornélio-pji Rapojyawaka Pedro Piranapni

²⁴ Waneya wale prika Cesareia poktshi rapokna. Cornélio kahwakakanatna. Rapatjetanunetka himolene hiyrun-koxa rimatletanunepotu.

²⁵ Waneya Pedro pantshi hjihlokpiraxinixka, Cornélio yoptotaplu. Tshiji rapokamta Cornélio Pedro jixistsi. Hyoptsojita Pedro-stsiya. Hpoyahnutatkalu Pedro.

²⁶ Hiyáhoni Pedro palnakaklu. Waneya wane htshina: — Ppalnanu. Hit-koxa yinerno.

²⁷ Waneya riynumsakakakanaxiniwana Cornélio-yma, Pedro pantshi jihlokatka hyoptotna hixolune yine wane hapatjexikatshine.

²⁸ Waneya Pedro wan-tshinna: — Hixa himatlu hinanchitkalurni judeu hapyehixyawakaplu pa neruko ho rimapatjexyawakapna. Seyni Hoyakalu hekhitatkano hikeni yineru malukkotu, kaptsholu Hoyakalu yhaleya.

²⁹ Hiyáhoni nepukkatka hi nkojwakahchinikanutatka seyni nunhapkata. Xawakni naluk-himatleta kluneru tshinanhe hixa hepukno?

³⁰ Waneya Cornélio wan-tshina: — Quatro hohne xye hohneymakananuko nanjihohnekanata nopjiya, kayi nwaka três horas-tkani. Waneya waneklukawa potuko satu jeji yopkakhinapletno katajiru hitakatshri.

³¹ Waneya wane htshina: “Cornélio, Hoyakalu yijnakotatkalu panjihohnere hiyrun-koxa penekachalkaka hike mwikatu tshinanu ruchinikyi Hoyakalu.

³² Hiyáhoni pyokanatanru satkaka yineru Jope poktshi nwaka repujyawakaplu jeji Simão Pedro hiwakatletatshri. Wale Simão couro-mta jihleklerupji rawa, mar powhastsi hwapjitatshri.”

³³ Hiyáhoni waneklukawa nyokanrewata pix-yehi. Kihleyi pixa punyawaka. Xawakni hixa ptowrunekwu hapatjetatshinwu hewi Hoyakalu hetanuya, wkahwakachatlu wyijnakoxyawaklu Tsru Hixikatshriwa Hoyakalu hinkaklewjixatkayi.

³⁴ Waneya Pedro yinuwaka yanumleta wane htshina: — Xawakni nimata Hoyakalu kahwaklu satkaka yineru pixkakaklu rixyawaka.

³⁵ Klu tshinanu Hoyakalu hihlehchinikanutlu ptowru yineru Hoyakalu kahwakpiratatshri hiyrunu Hoyakalu halujyawaka kamhatshri, hanuruneruktako rixini.

³⁶ Xyekni tokantshi Hoyakalu yokanatanru israel-nerune nwaka, kihler-potuko tokantshi ruhlewahchinikanuxyawaka pirana, Jesus Cristo-ya. Xyekni ptowru potuko Tsru Hixikatshriwa.

³⁷ Hixa himatlu tokantshi pohitkaluru Judeia tshijne psoluyako hapokatshri Galileia tshijne yinuwajya. João Batista batiza-xyawaklu Jesus waneya hyinuwaka hinkaklewletatka.

³⁸ Hiyrun-koxa hixa himatlu Jesus Nazaré hajeru pirana. Hoyakalu hipkakhohotlu Jesus Hoyakalu Hiwejikaluru hiyrunu tsru pixkonu reneklu Jesus. Waneya Jesus ptowru sretako hyapakananumta. Kihleru hkamhakananumta Jesus. Rutskalakna ptowruneka tsru kamtshi himwakanatatshine klu tshinanu Jesus-ymalu Hoyakalu.

³⁹ Hiyrunu hixa hiphujtatatshinwu wale ptowruka Jesus kamhanru, judeu tshijneya hiyrun-koxa Jerusalém poktshiya. Seyni wanna hiylatlu Jesus, cruz rixpatluna.

⁴⁰ Seyni Jesus-ni Hoyakalu hiwekkakatnaklu map-hohne rixinri. Hiyrunu Hoyakalu hitshitlu Jesus hix-yehi rakanhiywaka.

⁴¹ Hi ptowru yineru rakanhayehimta Jesus seyni hixa tsonu mnukawa Hoyakalu nurrenwu. Hoyakalu hali hiwekkaklexinixnaklu Jesus waneya wkatanu waleyma wnika wura.

⁴² Hyokanatwu yin-yehiya wunkaklexyawakaplu, wuphujtaxyawakaplu Jesus-kni, Hoyakalu hitakanru towutatshri rixyawakapa hiwekatshineya, hipnatshineya koxa.

⁴³ Ptowruneka Hoyakalu tokanu hinkakletatshine hiphujtatlu Jesus pirana, satkaka yineru Jesus hiwaka hmunanhiywakapa ruknojikowakapa rektunna.

Hoyakalu Hiwejikaluru Hapokhohotna Judeu Mixkane Piranapni

⁴⁴ Waneya xye pirana hyanumsaxiniwa Pedro Hoyakalu Hiwejikaluru hapokhohotna wanna ptowruneka tokantshi yijnakokanatatshine.

⁴⁵ Waneya rimyekna Cristo halixatshine judeu-ne, Pedro himotsatatshine klu tshinanu judeu mixkane hoho koxa rapokatka henekachalu Hoyakalu Hiwejikaluru.

⁴⁶ Klu tshinanu judeu-ne yijnakotatkana judeu-ne mixkane hyanumsaxyawakna, rimalwuxyawakluna Hoyakalu hoyaknu tshinanu panrukakaya waneya Pedro wan-tshina:

⁴⁷ — Nyi yine yoptotatkalu Hoyakalu Hiwejikaluru hixa pixka. Hiyáhoni kathe xawaka tshipetna nyi yine h-batiza-xikowakna honhaya? Hikeni.

⁴⁸ Hiyáhoni Pedro batiza-jixatkana Jesus Cristo hiwakaya. Waneya ranjitluna Pedro pimri hohnetshi wanna yehi rawyawakapa.