Atos 1 - Bíblia

Jesus Nurrene Kamrure Piranapni

¹ Teófilo tshinanupni twu yonawahlo, yonawahlo mitshikananu nyonreru, nyonatlu Jesus pirana, ptowruka Jesus kamhanru pirana hiyrunu runkakle pirana psoluka, Jesus hasruklewle yinuwaklekananuko;

² haté tenhohne ranikkoklunutka papko pirana potuko. Waneya Jesus tenhohne hma yaknuklunuwa ruykotna jejine, hnurrene, Hoyakalu Hiwejikaluru mixkonuyma waneya tenhohne ranikkatka Jesus.

³ Rali hipnalexinixka Jesus, riwekatnaka waneya quarenta hohne pejnu tsonu rimwatkana hnurrene hiwekatshriko rixyawakatka, hiyrunu rekhipotutna hiwekatshri rixyawakatka. Wane pchinika Jesus hiynumsatna hnurrene Hoyakalu pohirewaxyawaka pirana.

⁴ Jesus wannayma rapatjekanaxini ruykotna hnurrene Jerusalém poktshi hma muchpajyawakanupna seyni hkahwakanruna haté Hirtshi henejyana wale runkaklexyatkana. Wane htshinatkana Jesus: — Hita hinkajyatkahi.

⁵ Klu tshinanu halikaka João batiza-thi honhaya, seyni hi hix-hohnepnitshi hixa batiza-tko Hoyakalu Hiwejikaluruya.

Jesus Tenhohne Hanijikowaka Piranapni

⁶ Waneya hapatjekanatatshine hepomhalu Jesus. Wane htshinruna: — Tsru Hixikatshriwa, xawakniktshikla puhletanru Israel mitshikananu pixka rixyawakapa psol-tshijneko htowuxyawakatnaka?

⁷ Seyni Jesus hihitna: — Hixa hi hijhalu himaxyawaklu wale hohnekaka, hi hipapkoluko. Hirtshi nuretanru waleko hihchinikanuya.

⁸ Seyni Hoyakalu Hiwejikaluru hix-hoho rapojinipa hyoptotanru pixkontshi hiyáhoni nuphujtatjenephi Jerusalém poktshiya hiyrunu Judeia tshijne psoluka, Samaria tshijneya, haté hmahaxyawaka tshiji nuphujtatjeneyaphi.

⁹ Waneya wane rali tshinrexinixka, Jesus teno ranikkatka wanna hetanuya. Waneya satu hohimkohi katshpoklu Jesus haté hi rumukata hetletatkaluna.

¹⁰ Seyni wanna teno hyihakananumtawana Jesus hatskotka pchinika. Waneya chinpotukawa hepi jejine klatalu mkatshri hitakatshine wannastsi potuko hakanhiyatka.

¹¹ Waneya wane htshinna: — Jejine Galileia hajene, klu tshinanhe wane hwa hixa teno hyihjeta? Xyekni Jesus hixayma hwakanatatshri, tenhohne yatshritka waleko satkapanu hanukta rixa hatskoletatka hixa hetanuya wane potuko rixa hapokletanutnaka.

Jerusalém Poktshi Rawyawakna Jesus Nurrene Piranapni

¹² Waneya nuretkalune satokanwakatlu Jerusalém poktshi. Oliveiras mriji runyatkana satu quilômetro pchini.

¹³ Waneya Jerusalém poktshi rapojinixkana, hihruko nwaka hyamtna, pantshi teno hwahrukotatshri. Wane rawjexyawakna Pedro, João, Tiago, André, Filipe, Tomé, Bartolomeu, Mateus, Tiago, Alfeu whene, Simão honra Israel tshijne tshinanu mixkowatatshrini, hiyrun-koxa Judas, Tiago whene.

¹⁴ Nyi yine ptowruneka pa hchinikanurune hi rucho hanjihohneretna, wannaymalune Jesus molene jejine, Jesus hinro, hiyrun-koxa pimrone suxone.

Matias Nurexikowaka Piranapni

¹⁵ Waneklu papko Pedro yopkaka Jesus hasruklene hanikajite (cento e vinte yine hapatjetatka) waneya wane htshina:

¹⁶ — Jejine nomolene, hpoyahokakatkalu Hoyakalu tokanu yonatkaluru Hoyakalu Hiwejikaluru Davi-ni nama hinkakletakanatatkalu Judas tshinkaluru pirana walekni hanikna Jesus kachitjenepa.

¹⁷ Waleni wepir-potuko. Wale hepixjekanatwu wkamrure tshinanu.

¹⁸ Waneya htiyirote tshiji ranjixya hkamrure himtuknu tshinanu. Seyni waneko hyawniyanatka, himane rupchejyanatka, rixkapi hichpajyanatkalu.

¹⁹ Jerusalém hajene ptowruneka jempiranyehitlu, wale tshinanu wale tshijne rutakhiwakatluna “Aceldama” tshinikowaka, wannanruya wla htshina “Jratshijneru”.

²⁰ Waneya pnute hya hinkakletna Pedro: — Hoyakalu pirana yonatkaluru Salmos steno rawa: “Malepjiplu, hike wane hwanu.” — Hiyrunu wane koxa htshina yonretka: “Satuko jeji wale kachrijru jihlokanu nuretkaluru rixyawakpatka.”

²¹ — Wale tshinanu xawakni wnuretanru satu jeji hixa wepire rixyawakapa, Jesus Cristo hiwejinritnaka pirana wumuphujtatjeru rixyawakapa. Rujhalu wiyanjereru rixyawaka Jesus hix-yehi rawakanaxini,

²² João batiza-xinri Jesus hohnekananuko haté tenhohne ranikkoklunutka papko.

²³ Hiyáhoni hepi jejine htomhana. Satu jeji hepi hiwaklu José Barsabás. Satu hhiwakni Justo. Satu jeji Matias tshinkaluru.

²⁴ Waneya wanna ptowruneka hanjihohnetatka wane htshinna: — Hoyakalu, pixa tsonu himathethajitna yine. Pekhitanwu hanuru nyi hepi pnuretatka

²⁵ xye kamrurtshi hkamhiywakapa. Judas tshinkaluru hichotlu kamrurtshi hiyáhoni hyatka rawyawakpatka. Tsru Hixikatshriwa Hoyakalu, pekhitanwu katukta jihlokanru wale kachrijrupatka.

²⁶ Waneya satu hiknoklu hkamhana hnurexyawakapluna hiyáhoni hiknoklu hekhitlu Matias-patkani. Waneya repiretna onze Jesus nurrene.