3 João 1 - Bíblia

Haliklewlu Piranapni

¹ Hita, Cristo halixatshine kosekatshrino, yonanwakatlu Gaio tshinkaluru, nuchinikanretleru, namotleru halikakalutuya.

² Nuchinikanru, naluklu ptowru kihle hiknohle pixyawakapa hiyrunu pomta pixyawakapa, kihle samenuryi pixyawakapa.

³ Klu tshinanu rapojinixkana Cristo tshinanu wmoletanune pixa pirana runkaklexinixkana halikakalutu pirana himwatshri pixyawaka pirana npoyikowpotutatka. Halikaka, tokantshi halikakalutu yanikatshriyi.

⁴ Ptowru kata njempiranyehixinna nowhenene pixkalune tokantshi halikakalutu riyanyawakna, npoyikowpotuta.

Gaio Hihlepiranyehixikolu Piranapni

⁵ Nuchinikanru, kihle hislahleryi Cristo tshinanu wmoletanune tshinanu hiyrunu pmetjejetanune tshinanu.

⁶ Klanu hichpajikatshine hinkakletlu puchiniklewjexyawakna pirana. Runkakletluna Cristo halixatshine hapatjetatshine jemanuya. Pepixanna rumukata yalexyawakna, Hoyakalu hepixle pixka pixanna.

⁷ Klu tshinanu Cristo hiwaka tshinanu htshijnena ruchpajyana hiyrunu hike hepixlu hyoptotna judeu mixkane yehiya.

⁸ Hiyáhoni waluk-hepixletna wan-hixatshine halikakalutu pirana hepixatshinepa wixyawakapa.

Diótrefes Hiyrunu Demétrio Piranapni

⁹ Hitamka yonanwakatna Cristo halixatshine hapatjetatshine seyni Diótrefes tshinkaluru hi hikchikhihlenutwu. Ralukpotutlu tsru kahwakpiratkaluru rixyawaka rimwanune yehiya.

¹⁰ Hiyáhoni wane nyinipa hi namtakanru rixjexyawaka. Pnu pejnu hektuwaka htshinanwakatwu. Hi wale tsonu hkamha seyni hi hyoptohihlenutna Cristo tshinanu hmoletanune hiyrunu rimaletna hihle yoptolewlepiratatshine. Hiyrunu rakakna wan-hixatshine Cristo halixatshine hapatjexikowak-yehiya.

¹¹ Nuchinikanune, hi hyimanru hektutu seyni kihleru hyimanu. Kihleru kamhatshri Hoyakalu hayinerutni seyni hektutu kamhatshri hi rimathetlu Hoyakalu.

¹² Ptowru yineru kihlewaka tshinanwakatlu Demétrio tshinkaluru. Hkamhaleru halikakalutu koxa hiphujtatlu. Hix-koxa hiphujtatlu hiyrunu hixa himatlu wuphujtaleru halikakni.

Hmahapiraxyawakatka Piranapni

¹³ Hixo piranamka nyonanwakpirathi seyni hi naluka yonanwaklethi caneta tinta-teyma.

¹⁴ Klu tshinanu hi howukchini naluk-hapyehrethi. Waneklu potu winam-potuko wuhle hiynumsakaklexini.

¹⁵ Waneyhi hihlehchinikanrewlu. Wimathetjene halikanyi. Palikanna hhiwakaymana wimathetanune ptowruneka.