2 Timóteo 4 - Bíblia

Paulo Hiykoxyawaklu Timóteo Piranapni

¹ Rapojinipa Cristo Jesus Tsru Hixikatshriwa rixyawakapa, hjihyehitanna hiwekatshinewa, hipnatshin-koxa. Hiyáhoni Hoyakalu hetanu hiyrunu Cristo Jesus hetanu ntowutpotutyi Timóteo.

² Punkakletanru tokantshi hiwekkaklewatatshri pirana. Pkamhapotutanru punkaklewaxyawaka hipapkolu potuko hiyrunu hipapko minje koxa. Yine majnákonu puykotanu, ppoyikotanna, ptowutanna yine halikak-potu romkahixyawakna, pasruklewatanu ptowru mchiretannutshiyma.

³ Klu tshinanu rapokhohnetanu Hoyakalu tokanu halikakalutu hma malujyawakanupna seyni wannako ralujyawakna romkahitanna. Hiyrun-koxa hasruklewatatshine phuta ralukanna wannako hjempirerna raluka jemletanruna pirana tsonu hasruklewatatshinepa.

⁴ Hiyáhoni ruchyajnakotna halikakalutu pirana hma jemyawakanupna. Seyni hinkaklucha tsonu rujhanna.

⁵ Ha pixa ptowruko kahchinikanuruyapyi. Salewaktshicha pakotachatanu. Hoyakalu pirana jinkakletakleru pixyawaka tshinanu pkamhapotutanru kamrurtshi renejyayi. Pyapretakanru kihle piranalu potuko hiwekkaklewatatshri pirana punkaklexyawaka.

⁶ Klu tshinanu hi howukchini nupnanutka niwekle hiyokhatko henekachalu pixka Hoyakalu tshinanuya. Rapokatka nupninri papkopatka.

⁷ Kihle yahotle nixa yahotlewletatka. Hasuklu hichinixyawaka pixkawaka napokatka. Halixlu nomkahitatka haté xawakni.

⁸ Hiyáhoni xawakni waneru satu sahyi pixkalutu nyochmakjiwuxikolupa numlujikolu npotuknu pirana, Tsru Hixikatshriwa Jesus Cristo, henejinipno wale hohnepa. Waleni wkamrure wenru heneklewatatshri potukal-potuko hetamayxaklerewatatshri. Hi hita tsonu reneksahyetanu seyni ptowruneka Jesus hapojinripa kahwakatshin-koxa, xye hinatshripa hohne hichinikatshine pejnu reneksahyetanu.

Paulo Waleko Hipirana Hinkaklexyawaka Piranapni

⁹ Pumukata yanwaklexinno, punhapkatanu.

¹⁰ Klu tshinanu Demas tshinkaluru hiknokamtatkano. Xye tshijne hajeru tsonu hichinikanretatshrini wale. Tessalônica poktshi nwaka Dalmácia tshijne hyatka. Crescente tshinkaluru Galácia tshijne nwaka hyatka. Tito tshinkaluru Dalmácia tshijne nwaka hyatka.

¹¹ Lucas tshinkaluru tsonu hitaymatka. Marcos tshinkaluru pujhanu panijyawakaplu pixaymaplu. Klu tshinanu wale himukata hepixletanno kamrurtshiya.

¹² Éfeso poktshi nwaka nyokanatlu Tíquico.

¹³ Trôade poktshi, Carpo-pji nuknokamtanru n-capa-te. Panikanru xako puninipa. Papel-mtakaka koxa, yonatkaluromta halikaka panikanu.

¹⁴ Alexandre tshinkaluru, yomuwa jihlekleru hixo kata himtukahchinikanutno. Ha Tsru Hixikatshriwa Hoyakalu hapnutanru hkamrure tshinanu.

¹⁵ Puslahinwa pix-koxa waleya. Klu tshinanu wale kamnipotutlu wunkakle.

¹⁶ Mitshikananu nuhyehixiniklunwa hi satukna hitastsi hwa. Seyni rutspalaxyanona ptowruneka. Nanjitlu Hoyakalu hma mapnokaxyawakanupna.

¹⁷ Seyni Tsru Hixikatshriwa Jesus Cristo himwastsitno. Hmixkowahchinikankakatkano npoyaho hinkakletlu hiwekkaklewatatshri pirana psoluyaka ptowru neruka, judeu mixkaneya hjemyawakluna. Leão nama pixkalutu hkochpajyano.

¹⁸ Tsru Hixikatshriwa Jesus kochpakanno ptowru hektutu kamrurtshiya. Riwekkakanno tenhohne hajeru pohirewaxyawaka tshinanu. Himalwutkalurni wale ptowru hohneruka mnikawnakatupa! Seyoka.

Rumunreru Halikle Piranapni

¹⁹ Palikanna Priscila tshinkaluro hiyrunu Áquila tshinkaluru. Hiyrun-koxa palikanna Onesíforo-pji hajene.

²⁰ Corinto poktshi rutuka Erasto tshinkaluru, Trófimo tshinkaluru Mileto poktshi nwaka nuknokamtlu klu tshinanu hyeyixa.

²¹ Katshikleru papko wkatanuko xako pyahot-hapokletanu. Ralikyina Cristo hiwaka wmoletanune Êubulo, Pudente, Lino hiyrunu Cláudia tshinkalune hiyrunu pimrin-koxa ptowruneka ralikyina.

²² Timóteo, nanjitlu Tsru Hixikatshriwa Jesus Cristo piwejinriymapa. Hoyakalu hihlenu henekachaleymapyi.