2 Timóteo 3 - Bíblia

Rumunrerumnutka Hohnekaka Piranapni

¹ Hichinikanru xye: Rumunreru hohnekaka waneplu kyowikolkaka.

² Klu tshinanu wanepna yine wanna nanwaka tsonu halujikatshinwa, tiyiro halukatshine potu, tsru hikahwajikatshinwa, halixkoxikatshinwa, hike mkahwakpiratkane, tsrune majnakowyehitatshine, poyahnu mtshinkane, Hoyakalu malukkane,

³ mamotlewatkane, metwamonrene, jejnuhimaklerune, mimata towuxikatwa, kmatsyirune, kihleru heyikatshine,

⁴ kyokwijeklerune, kchiretakleru, wanna nanuko tsonu hislahikatshinwa, wannako ralujyawakna halukatshine Hoyakalu halixlu pnute.

⁵ Hoyakalu hchinikanu potukalu homkahitatshine rikahwajnawana seyni rekhixnawana Hoyakalu pixkonu pirana malixkanetkani. Nyi putspalaxin-pixa.

⁶ Klu tshinanu nyi pixkalune pantshikaka hjihlokachatna. Hyokwihchinikanutna suxone mchikohchinikanune, hihchinikanna katseplu tsru hektuntshi. Ptowru hixatshri ksotanuru hyokwixikna.

⁷ Ptowru hohneko rujha himatletmakna seyni hikeklu rukchikluna halikakalutu pirana rimatjemyawakna.

⁸ Janes, Jambres tshinkalune Moisés-ni kamnitatshine pixkalune rixna nyi jejine. Halikak-potuk-tokantshi hkamnitna. Nyini himtukahchinikanutkalune. Hi kihle piranyehirunni halixlewluya.

⁹ Seyni wannapni hi howuka yanuna. Klu tshinanu rimathetkona ptowruneko yehiya mahchinikanune rixyawakna Janes hiyrunu Jambres pixka.

Paulo Hiykoxyawaklu Timóteo Piranapni

¹⁰ Seyni pixa hetjetlu nasruklewle hiyrun-koxa nixjexyawaka. Pimatkoxlu nuchinikanretleru, nalixle, nkahwakachale, nuchiniklewle, nma kownojikotu,

¹¹ nkojwajikolkaka, nsalewninrikaka pimata. Pimatlu nsalewnale pirana Antioquia, Icônio, Listra poktshikakaya. Seyni Tsru Hixikatshriwa Cristo kochpakatkano walekaka kyowikowakkakaya.

¹² Halikaka ptowru Hoyakalu halujyawaka haluk-homkahretatshri pejnu Cristo Jesus-yma kojwakkalunepni.

¹³ Seyni jejine hektu hchinikanune, kyokwirewaklerune hektutu pnut-potu hkamhanna. Hyokwirewatanna hiyrunu hyokwitkona.

¹⁴ Seyni pixa pomkahitanru pasrujikolu pirana, palixpotutanru klu tshinanu pimatlu pasrukakanatjene hixannu potuko.

¹⁵ Pmatureyakananuko pimatatkalu yonatkaluru Hoyakalu tokanu potukalu. Walekni Hiwekkaklewatatshri pirana pimatjemkajikolu, Cristo Jesus halixikolu tshinanu.

¹⁶ Hoyakalu henekle riwekkaklewaxyawaka ptowru potuko yonatkaluru Hoyakalu pirana. Xye kihleylu hasruklewlu, ruykolewaxyawaka tshinanu, chinikantshi potukalu rasruklewaxyawaka tshinanu, htseruwaka hchinikanrewaxyawaka tshinanu, hiweklu potukalu rasruklewaxyawaka tshinanu.

¹⁷ Hiyahokni Hoyakalu hayinerute potukalu hixatshripni. Ptowru kihleru kamhalu poyaho kamhaletatshripni.