2 Timóteo 2 - Bíblia

Jesus Cristo Soldado-te Kihler-piranapni

¹ Hiyáhoni pixa, noturu pixkalutu, pmixkotahchinikanuxinwa Hoyakalu hihlenu renekachale Cristo Jesus-ya.

² Pirankaka pjemakanatanru, nunkakle hixo hetatshine yehi, xyekaka pirana pasrukanna jejine pmunanhalene. Waneyakni pimrin-koxa rumukata hasrukletanna.

³ Hita pixka pixanu salewnalu pakotachatanu. Jesus Cristo soldado-te kihleru pixka pixinwa.

⁴ Kyahotkakakleru haluka poyikowkakletlu htowutjeru. Hiyáhoni wan-hixatshri soldado hi rujhalu hma towuxikowakanuko hkamhiywaka.

⁵ Hasuklu hasukamxikatshri hi yoptotanru rumlujikolupa hma momkahitkanuklunru hasuklu hixannu.

⁶ Susanateru hijhalu rusanate hajeru hnijyawaka wale hapka.

⁷ Pujhahchinikanutanu wane ntshinyawakyi. Klu tshinanu Tsru Hixikatshriwa Hoyakalu himatjemkakanyi ptowru pirana potuko.

⁸ Puchinikanru Jesus Cristo, Davi klopicha, hipuktshi ruchpajyatka riwejyawakatnaka, kihle piranalu potuko hiwekkaklewatatshri pirana tshinyawaka pixka, nunkakletjereru piranni.

⁹ Xye tshinanu nsalewna. Kachitkalurno hektutu kamhatshri pixka. Seyni Hoyakalu tokanu hi kachitkaluru.

¹⁰ Hiyáhoni nakotachatlu ptowru potuko Hoyakalunerune nuretkalune tshinanu. Wane nixjeta rumukata hiwekkakletkona Jesus Cristo-ya hiyrun-koxa rumukata Hoyakalu yehi hwalexyawakapna hikeklu hohne mnikawnakatupa.

¹¹ Xye tokantshi potukalni: “Cristo-yma wupnini, waleyma koxa wiwekanu.

¹² Salewnalu wakotachaxini, Cristo-yma wpohirewatanu. Hi nimathetlu, wtshinanwakaxiniplu Cristo, hi himathetanunwu hixapni.

¹³ Cristo wpupjehetanuxini, hi ruknokanwu wale. Klu tshinanu hi rumukata yohikletokanuta htshinyawakatka tshinanu.”

Kamrurewatatshri Mpatewatkatupa

¹⁴ Xyekaka pirana puchinkapkakanna pkoseklene. Hoyakalu hetanu tshinanu pujretpotutanna hma yanhakkajyawakanupna tokantshikaka tshinanu. Yanhaklu tokantshikaka tshinanu hikeko hkochpaka seyni rumtukachatna yijnakotatshine.

¹⁵ Pujhahchinikanutanu Hoyakalu ppoyahnuwkajyawaka. Kamrurewatatshri mpatewatkatupyi. Hoyakalu tokanu halikakalutu mpupje hasruklewletkatupyi.

¹⁶ Tokantshi muhletu, yanumsalu tshinachatatshri pkatjixini. Klu tshinanu xye pixkalutu herutna yine Hoyakalu halujyawaka hma momkahixyawakanna.

¹⁷ Xye pixkalutu hasruklu chretshi tseruwnapiratatshri pixkalutni. Himeneu hiyrunu Fileto tshinkaluru hasruklewle wan-hixatshri.

¹⁸ Wanna pupjexyalu halikak-potuk-tokantshi. Klu tshinanu wanna wan-tshina hiwejikol-hohne hima hiknohatka. Hiyáhoni pimrine rumtuk-halixletna.

¹⁹ Seyni poyehi potuklu Hoyakalu poyehitleru. Xye poyehitlu: “Tsru Hixikatshriwa Cristo himatna walenunetkani.” Hiyrun-koxa satu hima: “Ptowru neruka Tsru Hixikatshriwa Hoyakalu hiwaka kochtshekatshine, hasujinri hektuntshi.”

²⁰ Yapkaklu phurupji twa hixo kakojero stonokaka. Twu stonokaka hi ouro hi prata kamhikolu tsonni. Seyni wane koxlo tostonokaka hahmuna ho kajpa kamhikaluru. Pimri stonokaka kahwakpiratkalune tsonu tshinanu rutakka seyni pimri stonokaka mkahwakpiratkone tshinanu tutakka.

²¹ Hiyáhoni xawakni katukta hektuntshi powraxinwa, kastonolu kahwakpiratkalune tshinanupa pixkalutu rixinwa. Kastonolu Hoyakalunu pixkalutupni, kapjitu poyaho kamruretlexyawakaplu, ptowru hixatshri kihleru tshinanupa.

²² Maklujine hixjexyawaka pasujini. Halikak-potu pirana pomkahitanu. Hiyrun-koxa pomkahitanru halixlewlu, hichiniklewlu, hihlehchinikanru pimrineyma Hoyakalu tomhatshine, powratahchinikanutatshineyma.

²³ Hepomsalkaka hipukalnu, mahijerutatshripa pasujini. Pimatlu xyekaka yahotkaklukaka yinuwakatshrini.

²⁴ Tsru Hixikatshriwa Hoyakalu towreru hi himukata yahotkakleta seyni rujhalu ptowru yineru tshinanu kihlehchinikanuru rixyawaka, himat-hasruklewatatshripni. Hakotahchinikanutatshripni.

²⁵ Pkamnitjene puykotanu kihle hchinikanurukyi. Pa katako Hoyakalu henekanna rehchinikanuxyawakna halikak-potu pirana rimaxyawakapna.

²⁶ Hiyahokni tsru kamtshi hitsekletpo pixkalutu ruchpajinna raluka kachretanune pejnu.