2 Timóteo 1 - Bíblia

Paulo Halijyawakna Yine Piranapni

¹ Twu yonawahlo Paulo yokanrerni, Cristo Jesus nurreru, Hoyakalu halujyawaka tshinanu. Nyokanatka nunkaklexyawaklu hiwejikaluru hikeklu mnikawnakatu pirana Hoyakalu hinkakletleru pirana Jesus Cristo-ya.

² Twu nyonata Timóteo tshinanupa, noturu pixkalutu nuchinikanru. Nanjiyehitanyi Hoyakalu hihlenu henekachalu, hetwamonutkalurupyi, hapnanuhchinikanutatshripyi, Hoyakalu Wuru yehiya hiyrun-koxa Wutsrukate Cristo Jesus-ya.

Himalwuru Hiyrunu Hiykolukaka Piranapni

³ Nimalwutlu Hoyakalu, htowre kamhatshrino nutsrukatenni pixka. Powra hchinikanurno. Hoyetshno, hohi koxa hi nutuk-hichinikanretletyi pixa nanjihohnereya.

⁴ Nuchinikaktehaxinyi. Naluk-hetlepotutmakyi. Waneyamka numuwpotutanu.

⁵ Nuchinikanretlu palixle halikak-potu. Mitshikananhapka pajiro Loide wan-hixa halixleta hiyrun-koxa punro Eunice. Nimatlu pix-koxa wanna pixka pixa halixleta.

⁶ Hiyáhoni naluk-hichinikkakletanyi hi petachatanru xye pixkontshi Hoyakalu henekachaxyayi pyoptotlu nomyo nutakahohoxinixkayi mitshi.

⁷ Klu tshinanu Hoyakalu Hiwejikaluru renejyawu Hoyakalu, hi jhamleholu hchinikanni. Seyni halikaka Hoyakalu Hiwejikaluru pixkontshi renejyawu, pimrine wuchinijyawaka, hixko hchinikanu rixkakwu.

⁸ Hiyáhoni hi pipatewatanru Wutsrukate Jesus pirana puphujexyawaka. Hiyrun-koxa hi pipatewatanno hita, kachitkalurno Cristo tshinanu. Seyni Hoyakalu pixkonu pixa henekkaluru psolutu tshinanu ptsaklawna nsalewniywaka kihle piranalu potuko hiwekkaklewatatshri pirana punkajikolu pirana tshinanu.

⁹ Hoyakalu hiwekkakwu hiyrun-koxa htshanixwu wale hinerune wixyawakatka. Hi hixako wkamhanru tshinanu htshanixwu seyni waleko hihchinikanu tshinanni. Hiyrun-koxa Hoyakalu hihlenu renekachale tshinanu htshanixwu. Hmawkanuklunuwa hyinuwakle papko Hoyakalu henekwu xye kihleru renekachale Jesus Cristo tshinanuya.

¹⁰ Hoyakalu hihlenu renekachale rimathetka Wiwekkakjeru Jesus Cristo hiphujewnale tshinanu. Walekni hipuktshi nikatatka hiyrunu ruphujetlu hiweklu, hiweklu mnikawnakat-koxa kihle piranalu potuko hiwekkaklewatatshri piranaya.

¹¹ Hoyakalu nuretno, rutakno jinkaklewakleru nixyawaka, judeu mixkane nasrujyawakapa.

¹² Hiyáhoni wale tshinanu wla nixa salewnaleta. Wanepnawaka hi nuhrokahchinikanuta. Klu tshinanu nimatlu nmunanhalerni Cristo. Hiyáhoni hi nkaheklu himukatatshri potukni wale rimretjixikolu ruslahyawaka haté rapokhohnexinipa rapkatle hohne potuko.

¹³ Halikak-potuk-tokantshi, pixa nasrukjekanatanru tokantshi pomkahitanu. Pmixkota halixletanu wale tokantshiya hiyrun-koxa hamotlewlu piranaya, wimwaleru Jesus Cristo-ya.

¹⁴ Hoyakalu Hiwejikaluru, hixa himwatshri pixkonu tshinanu puslahanru pmunanhikolu kihleru.

¹⁵ Hixa ptowrunekhi himatlu halixatshine Ásia tshijne hajene hiknojyawakno pirana. Nuknokjeneymalunni Fígelo tshinkaluru hiyrun-koxa Hermógenes tshinkaluru.

¹⁶ Tsru Hixikatshriwa Hoyakalu hetwamonutanna Onesíforo-pji hajene. Klu tshinanu hixo kata rapnanuhchinikankakno. Hi ripatewatno hita, hostutkalurno.

¹⁷ Seyni Roma poktshi rapojinixka rujhapotutno haté rukchikno.

¹⁸ Nanjitlu Tsru Hixikatshriwa Hoyakalu renejyawakaplu kihle hchinikanu rixyawakapa Hoyakalu hetwamonutanru wale hohnepa. Pixa himatpotutlu hi pejnu kata kananu repixno Éfeso poktshiya.