2 Tessalonicenses 3 - Bíblia

Paulo Hanjitlu Ranjihohneyehixikowakapa Piranapni

¹ Xawakni tokantshi rumunrerupa nmoletanune Cristo tshinanu hanjihohneyehitanwu. Hanjitanru Hoyakalu teyaka hipal-leplu Tsru Hixikatshriwa Hoyakalu tokanu hiyrunu hma mimalexikowakanupa seyni ruphujetko htokanu hix-yehi ruphujexikowakatka pixka.

² Hiyrun-koxa hanjitanru Hoyakalu wkochpajikolupa jejine mchinikanune, hektutu kamhatshin-yehi. Klu tshinanu hi ptowrunek-yine kalixaklerunni.

³ Seyni Tsru Hixikatshriwa Hoyakalu munanhahohnekanatkalurni, hixa poyehiwa hchinikankakatshrini ptowru hektuntshi yehi ruslahinhi.

⁴ Tsru Hixikatshriwa Hoyakalu wmunanhaleru hixa pirana tshinanu tshinanni wimatlu ptowruka wtowuxyahi hkamhajeta hiyrunu hpaklu kamhaletanru.

⁵ Hiyrunu wanjitlu Tsru Hixikatshriwa Hoyakalu, hpotukatahchinikanuxyawakaphi Hoyakalu hichiniklewle pixka potuko himwatshinephi, hiyrunu wanjitlu Cristo hapojinri kahwakatshinpotuphi, mchiretanunephi.

Hiykolu, Kojiretlu Piranapni

⁶ Cristo tshinanu wmoletanune wtowuthi Wutsrukate Jesus Cristo hiwaka tshinanu, hkotspalaxinwa ptowru Cristo tshinanu moltshi tshinikatshriwa majnakowatatshri yehi, wujrexikolu wujretakanaxyahi pirana momkahitkatu yehi hkotspalaxinwa.

⁷ Klu tshinanu hixa himata yimwu. Klu tshinanu hixa tskala wwakanaxini hi pnu pejnu wixakanata.

⁸ Hike yineru nijitu wnikachata. Seyni hohohne, hoyetshno koxa wyaprewakanata, wkamrurewjepotukanata, satukna wma deve-xyawakanupa.

⁹ Hi wma mumukata yoptolexyawakanru hixa hepixle, seyni wekhixyawakaphi hanu hixatshine potu hijhalu hyimikowakna.

¹⁰ Klu tshinanu hixa tskala wwakanaxini wla wtshinhi: “Hma kamrurewatkanuklunu yineru, hike hnikanuna.”

¹¹ Klu tshinanu wjempiranyehithi hixa satkaka hima pnu pejnu hixjeta. Hi hima raluka kamrurewletna seyni hima rejnuhimjechajetna.

¹² Hiyáhoni xawakni wan-hixatshine wujreta. Wtowutna Wutsrukate Jesus Cristo halujyawaka tshinanu hkamrurewachatanna hiyrunu wannako hnijitukna hnijinna hike mixkanepni.

¹³ Seyni hixa wmoletanune Cristo tshinanu hi hamanu kamhaletanru kihleru.

¹⁴ Seyni satu yineru majnakowaxiniplu wujretle pirana, xye wyonawahle hwatshri himathetpotutanru wale. Hi hiyananru wan-hixatshri hpatewaxyawakapa.

¹⁵ Seyni hma kamnitjetu pixka hixa hetletanru seyni himole pixka hixa hijretletanru.

¹⁶ Hiyáhoni xawakni nanjitlu Wutsrukate Jesus Cristo wapnanuhchinikankakjeru ptowru hohneruka rapnanuhchinikankajyawakaphi ptowru potuko tshinanuya. Wutsrukate hixayma rawjetanu.

Haliklewlu Piranapni

¹⁷ Hita, Paulo-no, halikhi, nyonatlo twu nomyoyma potuko. Wla nixa yonretlu nhiwaka ptowru yonawahlo mahle sreta.

¹⁸ Nanjitlu Hoyakalu, Jesus Cristo henekachalu hihlenu hixa ptowruneka tshinanupa.