2 João 1 - Bíblia

Haliklewlu Piranapni

¹ Hita, Cristo halixatshine kosekatshrino, yonanwakatlo Tsro pixkaluto, nuretkaluro. Towhenene pixkalun-koxa, nuchinikanune halikakalutu pirana tshinanu nyonanwakata. Hi hita tsonu hichinikhi seyni ptowru yineru halikakalutu pirana himatatshine koxa hichinikhi.

² Halikakalutu pirana wimwaleru tshinanu, hixa hwatshri hike rixiniko mnikawnakatupa.

³ Hoyakalu hepixle hixaymalutu, retwamonrewle hiyrunu hapnanuhchinikanru Wuru Hoyakalu hichpajikatshri hiyrunu Jesus Cristo Wuru Whene yehi hichpajikatshri, halikakalutu piranaya, hamotlewluya.

Hamotkaklu Piranapni

⁴ Npoyikowpotutatka njempiranyehixinixkana satkaka piwhenene homkahixyawaklu halikakalutu tokantshi htowutakanaxyawakwu Wuru Hoyakalu pixka.

⁵ Hiyáhoni xawakni Tsro pixkaluto, nanjityi. Himka herotu yokanruru nyonanwakatyi seyni mitshikawluru hyinuwaklekananuko yokanruru, wjemleru tokanuko nyonanwakatyi. Waleni wuchinikkajyawaka.

⁶ Xyeni hichiniklewlu. Womkahixyawakaplu htokanu htowuxyawu. Xyeni wale htokanu hyokanrer-pirana. Homkahixyawakaplu htokanu hyinuwaklekananuko wjemleru pirana pixka.

Yokwijrewpiratatshine Piranapni

⁷ Klu tshinanu hixo yokwijrewpiratatshine xye tshijne hiphujewniyatka. Hi ruphujetluna Jesus Cristo kahituru potuko rixa hapoklexyawakatkalu xye tshijne. Wan-hixatshri yokwijrewpiratatshrini hiyrunu Cristo kamnitjerni.

⁸ Hislahinwa, hma mamtajyawakanuplu hkamrure seyni hyoptoxyawakaplu himlujikolupa psoluka.

⁹ Ptowru yineru majnakowatatshri, Cristo hasrukle momkahitkatu hi Hoyakaluymalutni wale. Seyni Cristo hasrukle homkahitatshri Wuru Hoyakaluymalutni hiyrun-koxa Hiwheneymalutni wale.

¹⁰ Satu hapokanwakaxiniphi xye hasruklewlu munkakletkatu, hi hyoptotanru hipjiya hiyrun-koxa hi halikanru.

¹¹ Klu tshinanu katukta yoptohihlenutlu wan-hixatshri yineru hatatjewa repiretlu hkamrure hektunuya.

Hmahapiraxyawakatka Piranapni

¹² Hi heppik-pirana naluka yonrenwakathi seyni hi naluka yonretlu papel-mta caneta-ya klu tshinanu naluk-hapyehrethi. Waneklu potu winam-potuko wuhle hiynumsakaklexini hiyrunu wpoyikowpotutanu.

¹³ Pimole suxo pixkaluto, nuretkaluro whenene halikanyi.