2 Coríntios 13 - Bíblia

Majnakowatatshine Hiykoxikowakatka Piranapni

¹ Xawakni pa katatkani map-kata rixinri hixa nwaka nyanutka. Wane htshina Hoyakalu tokanu yonatkaluru: “Hepi ho mapa yine hektutu hiphujetatshine tokanu hpoyehixika ptowru piranako.”

² Wla ntshinanwakathi hixa, mitshikananu majnakowatatshinhi hiyrunu pimrine hektuwaka kamhatshin-koxa. Hepi kata rixinri hixa nwaka napkapinixka wane ntshinatkahi hiyáhoni xawakni howukmakno seyni wane ntshina hiyrunukotnaka. Xeyrunu hike yineru netwamonutanutka.

³ Klu tshinanu hixa haluk-himatlepotuxinri Cristo halikakakni hita nama hyanumaxyawaka. Cristo-ni muhrokkatu seyni halikaka tsru pixkonru hixa tshinanu.

⁴ Klu tshinanu yáholu cruz ruylaxika Cristo ruhrokahotko tshinanu seyni xawakni riweka Hoyakalu pixkonu tshinanu. Waneko pixka wix-kox-hixa. Hixa wale hihrokahoxikoluymalunwu seyni pa hchinikanurunwu waleyma wiweka Hoyakalu pixkonu tshinanu, wepixyawakaphi tshinanu.

⁵ Hetjexinwa, hyahoxinwa ho halikaklahe poyehi halixlehi. Hi he himatlu Jesus Cristo hwamanethi halikaka minjenhi hma mixyawakanupa?

⁶ Nkahwaklu himatyehitwu hixa hi halikaka minjenwu.

⁷ Hoyakalu wanjiyehithi hike hektutu hma kamhiywakanupa seyni hi koxa wanjiyehithi kihlewaka wtshinanwakaxikowakapa seyni potukawaka hkamhiywaka tshinanupni halikaka. Hike rixa yáholu halikaka minje pixkalune wikahwakko.

⁸ Klu tshinanu hike wumukata kamhaleta halikakalutu tokantshi wkamnixyawaka seyni halikaka halikakalutu tokantshi wimatshwaha.

⁹ Hiyáhoni wale tshinanu wpoyikowata wuhrojinmaka seyni hixa mixkowata. Hiyrun-koxa wanjitlu Hoyakalu potukalune hixyawakapa.

¹⁰ Hiyahokni xyekaka pirana nyonata, wane nma yaknukawa, wane nyinipa hi nujhalu hipokananu ntowuxyawakaphi nutajikolu Tsru Hixikatshriwa Cristo henejyanoyma. Xye towutlu nenekka hixa nepixyawakapa ntseruwnakajyawakaphi Cristo piranaya seyni hi hixa wnikawnakajyawaka tshinanu nenekka.

¹¹ Hiyáhoni Cristo tshinanu nmoletanune, nunhahi. Hihlexinwa. Hyijnakotanru nuykole. Pa hchinikanurunephi. Kihle hwachalephi. Hoyakalu hixa ruchinijyawaka hiyrun-koxa ruhlehchinikanrewle hix-yehi hwanu.

¹² Halikkakanu hichiniklewlu halikakalutuya. Ptowruneka Hoyakalu hayinetene halikhi.

¹³ Tsru Hixikatshriwa Jesus Cristo hihlenu henekachale hiyrun-koxa Hoyakalu hichinijyawakhi hiyrun-koxa Hoyakalu Hiwejikaluru himatkaklewle hixa ptowrunekhi yehi rawanu.