2 Coríntios 12 - Bíblia

Hiphujetkalurkaka Hoyakalu Hekhixyalu Paulo Piranapni

¹ Wanepnawaka ntokanuwnanu yahmaklu hike hkochpakanu. Hiyáhoni xawakni nunkakletanru Tsru Hixikatshriwa Cristo hekhixyano nupnaleya hiyrun-koxa pimri hiphujetkaluru rekhixyano.

² Nimatlu satu yineru Cristo halixatshri. Tenhohne rankapka quatorze rixinri mhalni. Hi nimatlu ho halikaklahe wane rapkapa himaneyma ho riwejinri tsonrahe wane rapkapya. Hoyakalu tsonu himata.

³ Nimatlu xye jeji halikakakni tenhohne rapkapa. Halikaka ho himaneyma potuklahe ho mamanetumnura hi nimata. Hoyakalu tsonu himata.

⁴ Hkochtshekka. Kihlewaka potuko rankapka. Waneya hyijnakotlu tokantshi mpoyaho hinkakletletkotu.

⁵ Xye pirana nitokanuwnanu. Wan-hixatshri jeji pirana tsonu nitokanuwnanu seyni hitako nopirana hi nitokanuwnanu seyni nuhrokle pirana halikaka nitokanuwnanu.

⁶ Ntokanuwninmaka hi mahchinikanutu pixka ntshinanu klu tshinanu halikaka pirana tsonmaka ntshinanu. Seyni hi ntokanuwnanu klu tshinanu hi naluklu yine kahwakpiraxyawakno nkamrure pnute ho ntokanu pnute.

⁷ Hoyakalu hekhixyapirankakno kihle pirankakal-potuko tshinanu nma malixkoxnawakanupwa nenekka satu nkojwajikolu nomaneya. Hatatjewa Satanás towreru hapokyehitno ruylajyawakapno nma malixkoxnawakanupwa.

⁸ Waneya map-katamka nanjitlu Tsru Hixikatshriwa Cristo xye kojwaklu yehi nuchpajyawakapa.

⁹ Waneya wane htshinatkano: “Nepixle poyahoxyatkayi klu tshinanu numukatle pot-hixko puhrojini.” Hiyáhoni nkopalpiranatlu nuhrokle piranapnawaka klu tshinanu nuhrojiniklunu Cristo pixkonu hit-yehi rawanutka.

¹⁰ Hiyáhoni kihle hchinikanno hihroklukaka tshinanu, hektuntshi, mahaxikalurkaka, kojwawaktshikaka, xyekaka salewaktshi Cristo tshinanni. Klu tshinanu nuhrojini halikaka kpixkonno.

Nuretkaluru Yokanaxikolu Himathexikowaka Piranapni

¹¹ Mahchinikanutu pixka nixa seyni hixakni wan-hixkakno. Hixakmakni haluklu kihlewaka htshinanwakaxyawakno. Klu tshinanu yáholu mujhakotno hita seyni hi psojikna napkataxyana mitshikananu nuretkalune yokanaxikolune.

¹² Halikaka ptowru hixatshri hetkaluru nkamha rimathexikowaka nuretkalurno. Hixa tskala nkamhiylu ptowruka nma chiretannuyma, hetkalurkaka, himyekaklewatatshrikaka, hiyakolukaka.

¹³ Klu tshinanu hanhe xawaka hixa hapkatleta pimrine Cristo halixatshine hapatjetatshin-yehkaka hetanuya? Xye tsonu pnuko hixika hi nepixikowaka nanjijekanathi. Xye pirana tshinanu nanjithi hi hichinikanru xye numtuknu.

¹⁴ Hetanu. Map-kata rixinri nupruka hixa nwaka nyiywakamkapa. Hike nalujyahi. Htiyirote hi nalujyahi nuchinikhi hixa halikaka. Klu tshinan-honra tsrune hijhanro tiyiro rapatjexyawakna hiwhenenna tshinanu, hi whentshine hijhanro tiyiro rurunna tshinanu.

¹⁵ Hiyáhoni numuwatanu psoluka nimwaleru nsalexyawaka hixa tshinanu. Haté nujhalu nsalexnawakwa psol-potuko hixa tshinanu. Hiyah-koxla nuchinikpotukanaxyawaka tshinanni hixa hi hichinikanretpotutatkano hita?

¹⁶ Haté hehe, hixa himatatkalu hike nepixikolu nujhiyhi. Seyni satkaka hetko xawaka wan-tshinno nimatkalnukni nyokwijexyahi.

¹⁷ Satkaklahe xawaka hixa nwaka nyokanreru tshowhuxyahi pa hixanu hita tshinanu?

¹⁸ Nanjitlu mitshi Tito tshinkaluru hixa nwaka rapkapyawaka. Hiyrun-koxa nyokanatlu satu Tito-yma Cristo tshinanu wmoletanru. Tito-lahe xawaka pa hixanu htshowhuxyahi? Hi he pixkakakanwu waleyma hiyrun-koxa pa hchinikanurunwu hixa tshinanu?

¹⁹ Hixlahe kahwakwu wpowratpiraxnawakwa hix-yehiya? Seyni hike. Cristo tshina hinkaklekjixyawakwu potuko wtshina hinkaklethi Hoyakalu hetanuya. Nuchinikanune, ptowru potuko wkamhaleru wkamhalu hixa wepixyawakamkapa tshinanu.

²⁰ Npiklu wane napojini pnuko hixatshinetkahi hixyawaka, nma muchinikanrexyawakanu pixka nixa yoptolexyawakatkahi. Hiyrun-koxa hix-koxa pnuko hixahotanno hmalujyawakanu pixka hixahotanno. Npik-koxlu wane napojini hejnu hima njemyawaka, hahxalu, jhekantshi, tserpiranawlu, hektuntshi, hapatlewlu, halixkoxikatshriwa, sejirewnalu.

²¹ Npiklu wane napojinpatnaka Noyakalute mturu hixkajyawakno hix-yehiya. Hiyrun-koxa pa katako nujhalu ntshiyahaxyawakapa hixolune hektuwaka kamhatshine mehchinikanutkanewa tshinanu, hektutu hkamhalerna tshinanu, rapoklewlena, hiyrun-koxa pimrikaka hma poyaho hicholetanutna tshinanu.