2 Coríntios 10 - Bíblia

Paulo Towutlewle Piranapni

¹ Hitakni, Paulo-no, wla mitshi ntshinnawa, hixastsi nwiniklunu kpoyikonerno seyni howuka nwiniklunu ktokanno. Hitakni hanjithi Cristo mayohnuyma hiyrun-koxa hchinikannuyma,

² wane napojinipa hi ktokanu hixkakanno. Klu tshinanu nimatlu numukata tokanuwnalyehitna pimrine wla tshinatshine xye tshijne kamrure homkahitatshinni wtshinjene.

³ Halikakni yinwu seyni hi wyapretaklu hixako wihchinikanu halujyawaka.

⁴ Klu tshinanu wyahotkakapreni wimuylalewapre hi yine kamhalerni seyni waleni hiyahotkakapi hixkolu Hoyakalu kamhalerni wkamnitjeru munanhaleru yotkakatshri. Chinikantshikaka muhletu wnikata,

⁵ hiyrun-koxa ptowru yine halixkowle pirana Hoyakalu himatyehixikowaka himaletatshri wnikata. Ptowru yine hchinikanu wyokanata, Cristo hchinikanu walixkajyawakna yine.

⁶ Waneya hixa hali hekhirexnatkawa halikaka hixatshine hixikatshinetkawahi, halpokotatshinepwu ptowru hixatshri hektuntshi wapnokaxyawakapa.

⁷ Kkahwaklu retachaklerunhi. Satu yineru Cristo himwatshri rikahwajiniklunwa hyahoxinwa hihchinikanuya klu tshinanu hix-koxa Cristo-nunwu wale pixkalunek-koxwu hixa.

⁸ Hi npatewata seyni ntserutahchinikanuxnawa Tsru Hixikatshriwa Cristo towutle henejya tshinanwu. Xye towutlu wenekka hixa wepixyawakapa htseruwnahalixlexyawakapa Cristo piranaya hi wenekka wnikathalixlexyawakaphi.

⁹ Hi nimyekakpiratkalhi hkahwajinno, yonawahlokaka nyokananwakaxyawaka tshinanhi.

¹⁰ Satkaka hetko xawaka wla tshinjeta: “Paulo yonawahle halikaka hixko towutlewle, htowutlewata seyni hewi potuko rawini hi kmixkonru hiyrun-koxa htokanu hike kochpakatshrini.”

¹¹ Wan-tshintokanutatshri himatanu wyonawahle howuka wwakanaxiniko pixka wixa kamruretanu wane wapojinipa.

¹² Hi wujhalu pixkakakanwu wixyawaka ho pimrine hijhakalune hikahwajikatshinwa wikahwajikowaka. Mahchinikanunni wan-hixatshine. Klu tshinanu wanna wannakaklukokni hyahotapre pixkalune rimathetkajyawakapna ho pixkakakanrahe ho hike.

¹³ Hixa hi koxa myahoxikowakanu tokanuwnikatshinwu. Seyni Hoyakalu henejyawu kamrurtshi pso potuko waneko pso potuk-koxlu wtokanuwninri. Haté xye kamrurtshi wkamrurewyehixyahi wale psojitek-koxatkani wale.

¹⁴ Klu tshinanu hi Hoyakalu towuxyawakwu pnute wkamha. Waneya mitshi hix-yeh-potu wapkapatka Cristo pirana, kihle piranalu potuko hiwekkaklewatatshri pirana wunkakapyawakaphi.

¹⁵ Hiyáhoni hi wtokanuwnanu yahoxikowakatka hichinixyawaka pnuteya satuko yineru kamrurewaxyawakaya. Hiyáhoni xawakni wkahwaklu hixa halixle htseruwnanu. Hiyrun-koxa wujhalu pnut-potu wkamhiywaklu kamrurtshi Hoyakalu henejyawu hix-yehiya.

¹⁶ Waneya wujhakoxlu wunkaklexyawaklu Cristo pirana, kihle piranalu potuko hiwekkaklewatatshri pirana, hixa sreta pnute hwatshin-yehiya. Hiyáhoni hi wtokanuwnanu kamrurtshi pimrine hali kamhallerutka wma kamhanutuko tshinanu.

¹⁷ Wane htshina Hoyakalu tokanu yonatkaluru: “Katukta haluka tokanuwnaletanu, Tsru Hixikatshriwayma htokanuwnanu.”

¹⁸ Klu tshinanu kihle kamrureru tshinikatshriwa hi ralukko seyni halikaka Tsru Hixikatshriwa Hoyakalu hikchikhihlenreru tsonu hiknohkakko.