2 Coríntios 1 - Bíblia

¹ Hita Paulo-no nuretkalurno. Hoyakalu halujyawaka tshinanu Jesus Cristo nuretno. Nyonata hixa tshinanu, Timóteo wimole Cristo tshinanuyma. Twu wyonata Cristo halixatshine hapatjetatshine Hoyakalunune tshinanu Corinto poktshi hajene tshinanu hiyrun-koxa ptowruneka Hoyakalu kotspalatanune Grécia tshijne psoluka hajene tshinanu.

² Hoyakalu henekachale hihlenu yoptotatshinephi. Hiyrun-koxa kihle hchinikanurunephi Wuru Hoyakaluya hiyrun-koxa Tsru Hixikatshriwa Jesus Cristo henekanwu.

Paulo Himalwuxyawaklu Hoyakalu Piranapni

³ Himalwutkalurni Wutsrukate Jesus Cristo hiru, royakalute kchinikanur-potukni Hirtshi. Waleni Hoyakalu ptowru neruka hapnanuhchinikankakatshri.

⁴ Wepixjerni Hoyakalu ptowru potuko wsalewnale tshinanu. Repixwu hiyáhoni hix-koxa himukata hepixletna pimrine hixa pixka hixa salewnaletatshine.

⁵ Hixa salewna Cristo salewnale pixka. Hiyáhoni Cristo tshinan-koxa wukchiklu wepixikolu tsru potuko.

⁶ Wsalewniniklunu hixa wepixyawaka hiyrun-koxa hixa hiwejyawaka tshinanupa wsalewna. Hixa wepixkoklunu hix-koxa hepixko hiyrun-koxa hyoptotanru hakot-hichinikanuwlexyawakapa salewnalu hakoxyawakapa hixa pixka salewnalu wakota.

⁷ Wmunanhahi hixa Hoyakalu hkahwakjexyawaka. Klu tshinanu wimatlu hixa hixayma hsalewniywaka tshinanu hix-koxa hepixka Hoyakaluya hixa pixka hixka.

⁸ Cristo tshinanu nmoletanune, waluk-himatkakletanhi wsalewnale pirana Ásia tshijne wwakanaxini. Salewaktshi tsru potuko weta. Hi hetkomka pnute salewaktshi wakotannatka haté wkahwaklu waneko wupniywakanatka.

⁹ Wkahwaklu hatatjewa hipuktshi wunkaklexika. Seyni xye ptowruka hakanha hixa rasrujyawaka wma munanhiynawakanupwa hixa nanwaka seyni Hoyakalu halikaka wmunanhanu. Waleni hipnatshine hiwekkakatshri.

¹⁰ Hoyakalu salewaktshi hkochpajyawu. Hiyrun-koxa hkochpakanwu ptowru hixatshri xye pixkalutu hipuktshi nwaka haniklewatatshri hamlenu tsrur-potuko hkochpajinwu. Hiyrun-koxa wmunanhanru Hoyakalu, rixa hepixlejekanaxyawakwu pixka hi rutuka jhamlewaka kochpaklexyawu.

¹¹ Hix-koxa hepixwu hanjihohneruya. Hiyáhoni hixolune hixa wanjihohneyehitjene tshinanu wepixko. Hoyakalu hihlehchinikanutanwu. Hiyáhoni hixolune yine poyahnutanhi wepixikol-tshinanu.

Paulo Corinto Poktshi Haluka Yalexyawaka Piranapni

¹² Xyekni walixkoxnawakwa, hi wkojwakahchinikanuta wixjexyawaka tshinanu klu tshinanu wekhithi wixa hiweklexyawaka pixka. Phujewak-potuko wixa kamhaletanru ptowruko hike weyawlu wunkakhi, Hoyakalu tshinanu. Hi yine himatkalnu tshinanni seyni Hoyakalu hepixle tshinanuya.

¹³ Klu tshinanu wyonre pirana, hixa tshinanu, hixa himathexyawaka tsonu, hiyrun-koxa hixa himatjemyawaka pirana tsonu wyonanwakathi. Nkahwaklu pa hohne hixa himukata himatjemlepotutlu.

¹⁴ Hixa himatjemle hi psolukawani hiyáhoni Wutsrukate Jesus hapojini hohne hixa halixkowyehitanwu waneko pixka wixa halixkowleyehitanhi hixa.

¹⁵ Xye nmunanhale tshinanu, xye pirana nimaxinixka hiyáhoni mitshikananhapka hixa nwaka naluka yaleta waneypakni hepi kata rixinri hpoyikowatanu hepi kata wane napkapyawaka tshinanupa.

¹⁶ Klu tshinanu Macedônia tshijne nyiywaka nuchinikanreta hix-yehi nyapamxyawakapa. Waneya Macedônia nuchpajinpatka hix-yehi nyapamtanutnaka. Wane nixinipa himukata hepixletkamkano hepixno Judeia tshijne nyiywakapa.

¹⁷ Hiyáhoni wane nixahchinikanuxini hixlahe kahwaklu wane ntshinachata? Ho wane nixahchinikanuxini xye tshijne hchinikanu pixkalhe nixahchinikanuchata? Hixlahe kahwakno hehe ho hike tshinachatatshrino?

¹⁸ Hoyakalu hiwaka halikakalutu nkochtshekanu, nunkajyapiranhi hi wane wtshinhi wale papkolutuko hehe wtshinhi howukchini hike wtshinhi.

¹⁹ Klu tshinanu Hoyakalu whene Jesus Cristo, hix-yehi hinkakletpiranaxika. Silas, Timóteo hiyrun-koxa hita Jesus Cristo pirana wunkakle payiywakalutni hi hehe, hike hi rixa. Seyni halikaka Hoyakalu tshinreni “hehe”.

²⁰ Klu tshinanu ptowruko Hoyakalu hinkajyapiranwu “hehe” tshinikatshriwa. “Wane pixanu Hoyakalu” wtshina Jesus Cristo tshinanu, Hoyakalu himalwuxikowaka tshinanu.

²¹ Klu tshinanu Cristo tshinanu wpoyehitahchinikanutjeru waleni Hoyakalu. Hixayma hpoyehitahchinikankakwu hiyrun-koxa hkotspalatwu walenuko wixyawakapa.

²² Hoyakalu himaxikolenwu rekhixyawaklu Hoyakalununetkawu. Hoyakalu henekwu waleko Hiwejikaluru waji rawyawakapa, Hoyakalu Hiwejikaluru psojite renekhapkatwu rimaxikowaka pa hohne wiwekkakko psoluyaka.

²³ Hoyakalu hiwaka nkochtsheka ruphujexyawakaplu nohchinikanu, wale honra himatahchinikanutno. Hixa hma salewnahchinikanuxyawakanupa tshinanu hi Corinto poktshi nyapamtawa hiyrunukotnaka.

²⁴ Hi hixa halixle pirana towutatshinwu wikahwajnawa seyni halikaka hixa poyikowle hepixatshinwu. Klu tshinanu hixa halixle tshinanu tsonu hpoyehiwahchinikanuta.