1 Timóteo 6 - Bíblia

Towrertshine, Towuwatatshine Hiykoxikolu Piranapni

¹ Towrertshine kahwakpiratanna htowutjene ptowru potuko tshinanu. Waneyakni hike yineru hapatanru Hoyakalu hi koxa wasruklewleko towrertshine tshinanu.

² Hiyrun-koxa hitowrene hi heyikanru htowutjerna Cristo homkahitatshri rixini klu tshinanu Cristo tshinanu moletkakatshinni. Seyni pnute hkamrurewatanna klu tshinanu hkamrurna kihleru yoptotatshinepni Cristo halixatshine hiyrun-koxa hichinikkalunni. Xyekaka pirana pasrukjetanna, puykolewatanu.

Hoyakalu Pirana Hasruklewatatshinemka Piranapni

³ Satu yineru pnu pejnu htshina hasruklewlexini, halikaka tokantshi Wutsrukate Jesus Cristo hasrukle hma momkahitkanuklunu, Hoyakalu homkahru pirana,

⁴ wan-hixatshri yineru halixkoxikatshriwa. Hike rimata. Seyni ralukpotutlu hepomsalkaka, hihjekaklu mujhakotu. Wla hakanhakaklu hahxalu, yahotkaklu, mkahwakpirlentshi, hektu piranalu kamhachalu,

⁵ hihjekaklu mmahletu hkamhana yine mahchinikanune, halikaka pirana mimatkanetkani. Wanna kahwaklu Hoyakalu homkahlu pirana tshinanu tsru tiyiro rumukata kayletna.

⁶ Seyni halikakni tsru kayluni Hoyakalu homkahlu pirana tshinanu rapnanuhchinikanuxinna yine Hoyakalu homkahlu pirana tshinanu.

⁷ Klu tshinanu hikeko wimapoka xye tshijne wmatuxiniklunu hiyrun-koxa hikeko wumukata hanikleta xye tshijneya.

⁸ Hiyáhoni wnikanru, wimkalu wimwini kihlehchinikanupwu.

⁹ Halikakni tsru tiyiro kaypiratatshine hyahotalexikowakna hyana. Ptowru hixatshri hike mkochpakkatu halujikolu hektutu hyohnixnawa yineru. Xyekaka heneklu yineru salewaktshi hiyrun-koxa hamhikowaka raniklewata.

¹⁰ Klu tshinanu tiyiro halujikolu waleni ptowru hixatshri hektutu yinuwakatshri. Pimrine tiyiro ramotlerna tshinanu halixlewlu pirana hpupjexyana. Hiyrun-koxa hixo katshinolu hkamhiynawana hyohloxnawana.

Timóteo Htserutahchinikanuxyawaka Paulo Piranapni

¹¹ Seyni pixa, jejyi, Hoyakalu homkahitatshriyi wale chinikantshikaka pasujini. Pomkahitanru poyahokaklewlu, Hoyakalu homkahlu potuko, halixlewlu pomkahitanu, hichiniklewlu koxa. Pomkahitanru Hoyakalu pkahwakhohnekanatanru hiyrun-koxa pmasaxinwa.

¹² Kihle yahotlewleru pixka pixanu halixlewluya. Hiweklu hikeklu hohne mnikawnakatu pkachixinwa klu tshinanu xye tshinanu tomhakaluryi. Peyinuwakle pixka pixanu kihlewaka ptshina hiphujtalexnawa hixolune hetanu mitshi.

¹³ Hiyáhoni Hoyakalu hetanu ptowruka hiwekatshri hiyrunu Cristo Jesus hetanu, ntowutanyi. Cristo pixka pixanu Pôncio Pilatos hoji sreta rawakanaxini, kihle hiphujetle rixnawa.

¹⁴ Kajnakopyi Hoyakalu yokanre tshinanuya. Powralupyi, potukalu potpakyi haté rapojinpotuko Wutsrukate Jesus Cristo.

¹⁵ Rapokpapkolupotuxinipa Hoyakalu wan-hixkakanru. Hoyakalu honra Hoyakalu satupkalutu, Tsru Hixikatshriwani, himalwutkalurni. Waleni pohirtshine pohire hiyrun-koxa tsru hixikatshinwa hitsrukatni.

¹⁶ Wale tsonni mupnakatu, Hoyakalu katawaka riwejya. Hike himukata hapoklestsitanru. Hike yineru hetlu Hoyakalu, hi koxa rumukata hetletanruna. Walepni kahwakpirhohnekanatkalurupa hiyrun-koxa tsru pixkontshipa hikeklu hohne mnikawnakatupa. Seyoka.

Tsru Ktiyiroterune Piranapni

¹⁷ Xye tshijne hwatshine tsru ktiyiroterune wane ntshina hiykolethi. Hi halixkoxikatshinepwahi. Hiyrun-koxa hi tiyiro himat-nikawnatshri hmunanhanu. Seyni halikaka Hoyakalu ptowru potuko wumuwle wenekjeru wmunanhanu.

¹⁸ Ptowutanna kihle rixyawakapna pimrine, phurune hixkakanna kihler-kamrurtshiyma. Ptowutanna jenekaklerune rixyawakna, kapikaklerunepni.

¹⁹ Hiyáhoni wan-hixatshinepa halukkaluru rapatjeyehixinwana ptowru potuko poyehitatshri hinatshripa tshinanu hiweklu halikakalutu hkayaxyawakapna tshinanu.

Timóteo Ruykoxyawakatnaka Paulo Piranapni

²⁰ Timóteo, puslahinwa pmunanhikoluya. Pkotspalaxinwa hektut-pirana hipiranachakaka tshinikoluya. Hiyrun-koxa yanumsalkaka hike mkochpakkatu pirana, himatkaltshi pirana htshinka seyni hike pkotspalaxinwa.

²¹ Satuko yineru xye himatkaltshi himwatshine htshinnawana waneyakni hpupjexyaluna halixlewlu pirana romkahixyawakna. Hoyakalu hihlenu renekachale pixaymapa.