1 Timóteo 5 - Bíblia

Tsrune Kahwakpiraxikowaka Piranapni

¹ Hi ptshihetjetanru tsru yineru seyni puykotanru hatatjewa hirtshi henekahchinikanrewaxyawaka pixka. Maklujine puykotanu hatatjewa pepurune puykoxyawaka pixka.

² Tsrone puykotanu punro puykoxyawaka pixka. Maklojine puykotanu pepurone puykoxyawaka psol-powranuymako pixka.

Hipnahnurutatshrone Hislahikowaka Piranapni

³ Hislahana hipnahnurutatshrone, halikaka hipnahnurutatshrone rixinna.

⁴ Seyni sato hipnahnurutatshro kwuhenero tixini ho tomekahine twini wannakni hapka rujhaluna Hoyakalu halujyawaka hkamhiywakna wannako hipjina repixyawakna tshinanu. Rutsrukatenna rapnutanna ruslahikolna tshinanu. Klu tshinanu kihleru wan-rixyawakna hiyrun-koxa Hoyakalu hikchikhihlenutlu wan-hixjetatshri.

⁵ Xawakni halikaka hipnahnurutatshro pirana hapaluchatatshro potu, Hoyakalu munanhatshro tixini, tma mutuk-hanjiretkanuklunru Hoyakalu hiyrun-koxa tanjihohnejexini hoyetshno, hohohne koxa.

⁶ Seyni tiwekka pchinika poyikowlu tsonu tomkahixini hipnatshro pixkalutotkani.

⁷ Xyekaka hiykolu ptowuxinna hma mukolujikowakanupna.

⁸ Seyni katukta hi hislahanna waleko himolene, hipjiko hajenewa, walekta hichotatkalu halixlewlu pirana romkahixyawaka. Wan-hixatshri malixkatu pnute hektutu kamhatshrini.

⁹ Hipnahnurutatshro, sessenta mhaleruto ho pnute mhaleruto tsonu tuslahikowaka tutakko Cristo halixatshine hapatjetatshineya. Hiyrun-koxa pa katapka hnuruwtapatshro tixinipni.

¹⁰ Hiyrun-koxa kihle piranyehiropni. Mturune ttseruwaka tuykohihlenutna hiyrunu kyoptohihlenrewakleropni ho Cristo halixatshine Hoyakalu homkahitatshine jixi terokajexini ho salewnatshine tepixini ho ptowru kamrurtshi kihleru hepixlewatatshri tomkahpotuxini, tuslahko Cristo halixatshine hapatjetatshineya.

¹¹ Seyni hipnahnurutatshrone tsrotsolejine hmixkanuklunupna hi putakanna repixikowakapna Cristo halixatshine hapatjetatshineya. Klu tshinanu Cristo homkahixikowaka hyinuwaka hayoklexinipna hhanuruwatanutnakna.

¹² Waneyakni rukolujinwana klu tshinanu ruknokatkaluna mitshikananu htshinyawakna.

¹³ Hiyrun-koxa rasruhinpatkana mmerenpatkani. Pa pji pejnu hyapachatanutkana. Hi hma mernu tsonupnina seyni hyanumsalepotukananna ptowru pirana halikaka pirana pot-minje htshinapanna. Muhlepiranatu jinkakletaklerone rixnawana.

¹⁴ Hiyahokni hipnahnurutatshrone tsrotsolejine minje pirana hitaho hhanuruwhapkatanna. Kwuhenepna. Ruslahapjitanna. Hiyáhoni wan-hixatshronepa hike hikoluklu hkamhinwuna wkamnitjeru hektutu hma tshinanwakaxyawakanupwuna.

¹⁵ Klu tshinanu satkaka hipnahnurutatshro pupjeta Satanás kamtshi romkahixyawakapna.

¹⁶ Sato suxo Cristo halixatshro kamolero hipnahnurutatshro, walako hepixanro. Wanna Cristo halixatshine hapatjetatshine hi hepixanro wan-hixatshro hiyáhoni rumukata hepixletanna hipnahnurutatshrone halikak-potu halixatshrone.

Cristo Halixatshine Hapatjetatshine Kosekatshine Piranapni

¹⁷ Cristo halixatshine hapatjetatshine kosekatshine kihle hinotlerune, kahwakkalunepni. Wan-hixatshine hijhalu hwenuthihlenuxikowakna. Wanna honukla hiwekkaklewatatshri pirana jinkakletaklerune potuko hiyrun-koxa Hoyakalu hasrukle hasruklewatatshine potu wan-hixko.

¹⁸ Klu tshinanu Hoyakalu tokanu yonatkaluru wan-tshina: “Boi hitaklu tataji hkaplokkakkoklunu hi rostunamatko boi.” Hiyrun-koxa wane htshina yonatkaluru: “Kkamrurewakleru himukata yoptoletlu hkamrure wenru.”

¹⁹ Hi pyijnakotanru Cristo halixatshine hapatjetatshine kosekatshri jihyehixikolu. Seyni hepi ho mapa hiphujtaxiniplu halikaka pirana rixinipa. Waneya pyijnakotanru halikaka.

²⁰ Halikaka hektuwaka kamhatshri ptowruneka jemanu rujretko. Waneyakni pimrin-koxa pik-majnakowletanu.

²¹ Hoyakalu hetanu, Cristo Jesus hetanu, hiwejikalune Hoyakalu towrerune tenhohne hajene potukalune hetan-koxa, ntowutpotutanyi nomkahjixanyi: Ptowru potuko pixinipa xye hiykolukaka pomkahpotutanu hi kakoje pixa hichinikletanna yine seyni ptowruneko pixkakaklu hixa hetjeretatshripyi.

²² Hi pchireta hitakletanru Cristo halixatshine hapatjetatshine kosekatshinepa. Hi hektune majnákonu pyoptotanu seyni powralu pimrexinwa.

²³ Hi honhapka puranu seyni vinho-ha psohajiji puranu pisatu tshinanu, hixo kata pyeyixjexinri tshinanu.

²⁴ Satuko yineru hektunu hi pyohimlu, rimapatjetkoklunutka wkatanu hohnekananuko. Seyni satuko hektutu kamhatshri hi pimathetkohapkalu.

²⁵ Waneko pixka rixa kihleru kamhalu. Pimrinenu hiphujetka. Waneya pimrinenu hi himukata yohimletko.