1 Timóteo 4 - BíbliaRunkakletahnaputna Hasruklewatatshine Yáhole Piranapni 1 Hoyakalu Hiwejikaluru hinkakpotutwu hnikawnahohnexini klu papko satkaka hiknokanru halixlu pirana. Wanna hiwejikalurune yokwijetanunepni hiyrun-koxa kamtshine hasruklewle hyijnakotanna. 2 Xyekaka kayloklerune hasruklewleni, weyawachatatshine tokanni. Hihchinikanna rupniyatkana hatatjewa yomuwa hameru ho tshitshime yoxjehchinikanutatkana. 3 Nyi jejine himaletlu hnunrowlu. Rinanchitluna nikkaluru. Seyni Hoyakalu hiyakotlu xyekaka nikkaluru wniklerupa rixyawaka hiyrun-koxa wale wpoyahnuxyawaka. Hixa Cristo halixatshinwu, halikaka pirana himatatshinwu wane wixanu. 4 Hoyakalu kamhaleru ptowruka kihlerni. Hikeni Hoyakalu kamhaleru hiknokko seyni ptowru potuko hyoptotanu hihlenu hchinikanuyma, Hoyakalu hpoyahnutanu. 5 Klu tshinanu ptowru potuko powratka Hoyakalu tokanuya hiyrun-koxa hanjihohneruya. Kamrurewhihlenutatshri Jesus Cristo Kamrure Tshinanu Piranapni 6 Nyi hiykolukaka puchinikkajinna wmoletanune Cristo tshinanu. Kihleru kamrurewatatshripatkayi Jesus Cristo kamrureya. Wane pixini ptseruwakahchinikanutanu tokantshi halixkaluruya hiyrun-koxa hasruklewlu halikakalutuya pomkahitanru pirana. 7 Seyni hinkaklucha hike mkochpakkatu pirana, tsrotsolejine hinkaklecha hi hyijnakotanu. Halikaka pasrujinwa Hoyakalu halujyawaka pkamhiywakapa. 8 Klu tshinanu wimane hasrujikowaka psotsonu repixlewaxya. Seyni Hoyakalu halujyawaka homkahixikowaka ptowru potuko repixlewaxya. Klu tshinanu repixlu wiwekle xawakni papko hiyrun-koxa hiweklu hinatshripa Hoyakalu hinkaklexyawu. 9 Halikaka piranni xye hima. Hiyáhoni rujhalu ralixkoxikowaka psolu hchinikanuymako. 10 Wale tshinanu wyapretaklewata hiyrun-koxa wkamrurewpotuta wale piranaya klu tshinanu wmunanhanru Hoyakalu Hiwekatshri, ptowru yinerumka hiwekkakjerni, wale halixatshine halikakalun-potni. 11 Xyekaka pirana pasruklewatanu xako. Hiyrun-koxa punkakanna ptowruneka puykole hkamhiywakna. 12 Hi pitshitanna yine reyijyawakyina makluji pixyawaka tshinanu. Seyni Cristo halixatshine tshinanu pyimakko tokantshi pyanumaxinri tshinanu, pixjexyawaka tshinanu, hichiniklewluya pyimakko, halixlewluya pyimakko, powralu pixjexyawaka pyimakko. 13 Nma mapokkanuko pchini hi pucho hethaletanu, hi putuk-hiykolewletanu, hi putuk-hasrukletanna yine nmapokkanuko pchini. 14 Hi petachatanru pixkontshi penejikolu pixa hwatshri pyoptoleru, hinamtatshri pirana hinkakletatshine punkakletahnaputjene. Xye honra pyoptotatka mitshikananu tsruneya hapatjetatshine kosekatshine himyona rutakhohoxinixkayina. 15 Xye kamrurtshikaka puslahanu hiyrun-koxa wale penejinwa. Wane pixjetanu ptowruneka yehi rimathetko ptseruwniywaka Cristo piranaya. 16 Puslahinwa pixa nanwaka hiyrun-koxa pasruklewle. Pomkahitanru. Klu tshinanu wane pixini papnokaxikowaka yehi piwekkajinwa hiyrun-koxa pyijnakotjene. |
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Missão Novas Tribos do Brasil