1 Timóteo 3 - Bíblia

Cristo Halixatshine Hapatjetatshine Kosekatshine Piranapni

¹ Halikaka piranni xye hima, katukta haluk-halixatshine hapatjetatshine kosekatshri hixleta rujhalu kamrurtshi kihleru.

² Hiyáhoni Cristo halixatshine hapatjetatshine kosekatshri haluklu hike mixkatu rixyawaka, pa hnunropkaplu, kihler-potuko himat-nuretatshripni, kchinikanurupni, mchiretanutupni, yanamtatshine hapojini kihle yoptole rixanna, himat-hasruklewatatshripni.

³ Hi katsholu jiraklerupni. Hi kyahotkakaklerupni seyni kchinikanurupni. Hi hihjekakatshripni, hi tiyiro herupni.

⁴ Himata hipji kosekatshripni hiyrunu hiwhenene kajnakolunepni. Ptowru kahwakpirluymalunepni.

⁵ Klu tshinanu hipji hma mimat-kosekyehitkanuklunu, hanhe xawaka rumukata wan-hixatshri kosejyawakna Hoyakalu halixatshine hapatjetanune?

⁶ Cristo halixatshine hapatjetatshine kosekatshri hi hajeyri halixatshripni, klu tshinanu wan-hixatshri ralixkotachaxnawa, hiyahokni hjihyehitko Satanás pixka.

⁷ Rujhalu kihle piranyehiru rixyawaka malixkane yehiya, klu tshinanu hma muhlepiranyehixiknuklunwa rutsekko Satanás-ya.

⁸ Waneko pixka rix-koxna Cristo halixatshine diácono-ne. Kihle piranyehirunepni, hi kachrijtatokanutatshinepni. Hi katsholu jiraklerunepni. Hi tsru tiyiro himtuklewatatshri kaypiratatshinepni.

⁹ Halixlewlu pirana halikakalutu Hoyakalu hekhirewle hinotatshinepni powratahchinikanuxikatshinepwa.

¹⁰ Nyi mitshikananhapka ret-hixanutkona. Waneya riknohinipna, waneyakni Cristo halixatshine hapatjetatshine kosekjetatshinepatkani, hike mixkanepa.

¹¹ Hhanunronna waneko pixka rixanna kihle piranyehironepni. Hi jejnuhimakleronepni. Ptowru potuyako muhrokahchinikanutkanepni potukalonepni.

¹² Cristo halixatshine hapatjetatshine kamrurewyehitatshinepa sato suxopka hhanunrotanu. Himat-hijretawhenetatshinepni hiyrunu hipji hajeru himat-kosekatshinepni.

¹³ Klu tshinanu kihle kamrureru yoptotanru kihle piranyehi rixinripa yine tskalaya. Hiyáhoni rumukata hiwekletanna halixlewlu pirana Jesus Cristo tshinanu pirana hike hpikanna.

Hoyakalupji Hixa Koseklexikowaka Piranapni

¹⁴ Xyekaka pirana nyonatanru nyokananwakatanhi hiyrunu hi howukchin-hetko napyehitanhi.

¹⁵ Seyni hohamok-nixinipa, nyonanwakatanhi hixa het-yonhaxyawakaplu Hoyakalupji hajeru himata kosejyawakapa. Hoyakalupji, wannani yine Hoyakalu hiwekatshri hapatjetanune Cristo halixatshine. Halikak-potukananu tokantshi yoptowaka hwastsihitatshri, hwahohleru pixkalunni.

¹⁶ Tsru mimat-hinkakletkotu waleni potuknutshi hchinikanu piranni klu tshinanu: “Jesus hiphujewna yineru mane rixnawa seyni riwejinriya potukalni. Hiwejikalune Hoyakalu towrene tenhohne hajene hetatkalu. Ruphujtatka psol-tshijneya. Xye tshijne halixlerni. Ranikka tenhohne.”