1 Timóteo 2 - Bíblia

Hoyakalu Halukmaklu Ptowru Yineru Hiwejyawakapa Piranapni

¹ Mitshikananhapka nanjithi hanjihohnejexyawaka, hanjiruyma, hapohchinikanutanru Hoyakalu yine tshinanu hiyrun-koxa Hoyakalu hpoyahnutanu ptowru yine tshinanu.

² Wan-hixanu. Hanjihohneyehitanna pohirtshine hiyrun-koxa ptowruneka tsru hitakkalune tshinanu, hiyáhoni wumukata hwachaletanu, potshke hwalepwu, hike mixkanepwu, kihle piranyehirunepwu.

³ Kihlerni xye hiyrun-koxa Hoyakalu wiwekkakjeru haluklu wane wixyawaka.

⁴ Hoyakalu halukmaklu ptowru neruko hiwejyawakapa, halikakalutu pirana rimaxyawakapmakna.

⁵ Klu tshinanu rawa satupka Hoyakalu hikeni hiyrunu. Hiyrun-koxa satupkalu yine jihlepokyehikleru Hoyakalu tshinanuya. Waleni yineru Jesus Cristo.

⁶ Renejnawa ptowrunek-yine hektunu pixkonu hiyrun-koxa hipuktshi pixkonu hkochpajyawakwu. Rimaxikowaka Hoyakalu haluklu ptowru yineru hiwejyawakamkapa, hipapkolu potuko renekka Cristo.

⁷ Wale tshinanukni nutakka nuretkaluru yokanatkaluru nixyawaka hiyrun-koxa judeu mixkane nasrujyawakapa nunkaklexyawakaplu Cristo halixikolu pirana, halikaka pirana. Hi nweyawata, halikaka pirana ntshina.

Paulo Hiykoxyawakna Suxone Piranapni

⁸ Nanjithi, ptowruchako, jejine hanjihohnetanu jejine Hoyakalu halujyawaka kamhajetatshine rumukata yotuklemyotanna Hoyakalu nwaka ranjihohnereymana hike mixkanepni, mjihekanunepni, muhjekakkanepni.

⁹ Suxon-koxa nanjitna hmakawhihlenuxyawakapna, hi hektu hetko makawlerunepni seyni himat-patewatatshronepni. Hi kamapjiwutsluyma ruhlexinwana, hi ouro kamhikaluruymako, hi hijepretshiymako, hi kwenuru mkatshriymako.

¹⁰ Seyni kihler-kamrurtshiyma ruhlexinwana hijhakalurni suxone Hoyakalu homkahitatshrone htshinikolupna.

¹¹ Potshkeplo tasrukkoklunupa suxo. Psol-potuko yijnakotatshropni.

¹² Hi nitshitna suxone rasruklewaxyawakna hapatjexikowakaya hiyrun-koxa hi tsrone rutajinwana jejine pnute. Seyni potshkepna suxone.

¹³ Klu tshinanu Adão mitshikananhapka hiyakotka waneya Eva hiyakotka.

¹⁴ Hiyrun-koxa Adão hi yokwitka seyni suxo honra yokwitka waneya Hoyakalu yokanre tmajnakowaxyatka.

¹⁵ Wanepnawaka Hoyakalu hiwekkakanna suxone hmatuwhenexinna, romkahi halixlexinna, romkahi hichiniklewlexinna, powra hchinikanurone rixinna, Hoyakalu halujyawaka hma mutuka homkahretkanuklunna.