1 Timóteo 1 - Bíblia

¹ Twu yonawahlo Paulo yokanrerni Cristo Jesus nurrerno, Hoyakalu wiwekkakjeru tshin-towutlexyawakno tshinanu hiyrunu Cristo Jesus wkahwakle tshinanu.

² Timóteo tshinanupa, noturu halikak-potukananni palixle tshinanu. Hamotkalurupyi, hepixkalurupyi Hoyakaluya, hetwamonutkalurupyi, hike pikatshripyi Hirtshi Hoyakaluya hiyrunu Tsru Hixikatshriwa Cristo Jesus-ya.

Paulo Hiykolewata Pnu Pejnu Hixa Hasruklewletatshine Tshinanu Piranapni

³ Naluklu Éfeso poktshi putujyawaka. Nanjityi wane putujinripa Macedônia tshijne nyinpatka. Satkaka Éfeso poktshi hajene halikaka tokantshi minje rasruklewjetna. Hiyáhoni wane putukanu pumukata towutlexyawakna pnu pejnu hma mixa hasruklewlexyawakanupna.

⁴ Puykotanna yine hi psol-hohneruka hyanumlexinrina hinkakluchakaka hiyrunu hi tsrunni hiwakkaka mlejikananuko hkochtshetanna. Klu tshinanu xye pirankaka kamhalu hepomsalu. Xyekaka hi hepixlu Hoyakalu kamrure. Klu tshinanu Hoyakalu kamrure halixluymako hkamhaka.

⁵ Xye yokanruru henekka wuchinikanretkajyawaka hixkakluko. Xye hichiniklewlu himwatshine rujhaluna powra hchinikanurune rixyawakna hiyrunu rujhaluna halikakalutuko hkamhiywakna. Rujhaluna ralixyawakluna halikak-potuko.

⁶ Pimrine xye pirana hpupjexyana. Hyanumsalna hike repixa.

⁷ Ralukluna Moisés yonreru pirana hasruklewatatshine rixyawakna seyni hi rimatjemnawana klukta htshina. Hi koxa rimatjemlerna pirana runkakletna.

Klu Repixa Yokanruru Tokantshi Yonatkaluru Piranapni

⁸ Wimatlu Moisés yonreru kihlerni, yonruru pirana romkahixini yineru.

⁹ Hiyrun-koxa wimatlu Moisés yonreru hi hyokanatka kajnakolune tshinanu. Seyni yonruru henekka hektutu kamhatshine hiyrunu majnakowpiratatshine tshinanu, Hoyakalu momkahitkane tshinanu hiyrunu hektune tshinanu hyokanatka; mpowra hchinikanune tshinanu, malixkane tshinanu, jiylahiruklerune tshinanu, jiylahinroklerune tshinanu, yineru jiylaklerune tshinanu hyokanatka yonruru pirana.

¹⁰ Kapoklewaklerune tshinanu, jejinekakluko hapokletkakatshine tshinanu, yineru jichanpiklerune tshinanu, kayloklerune tshinanu, yokwijrewatatshine tshinanu, Hoyakalu tokanu halikakalutu kamnitatshine tshinanu hyokanatka tokantshi yonatkaluru.

¹¹ Hoyakalu tokanu honra, kihle piranalu potuko hiwekkaklewatatshri piranni. Xyekni tokantshi Hoyakalu hinkakjixno. Walekni kihler-potuko tokantshi hiwekkaklewatatshri pirana Hoyakalu poyahnutkaluru heneklewle.

Poyahnu Hoyakalu Hetwamonrewle Tshinanu

¹² Npoyahnutlu Wutsrukate Cristo Jesus klu tshinanu hita poyahokakatshri rexyano hiyáhoni renekno xye kamrurtshi waleko hkamrure. Hiyrunu renekmixkonutno.

¹³ Mitshikananu hektutu ntshinanwakjekanatlu Cristo. Nkamnijekanatlu ptowru pejnu hektutu nkamhanwakjekanatlu. Seyni Hoyakalu hiknokatkalu nektunu nma mimathetjekanatanutu. Wane nixjekanata malixkatu nixjekanaxiniwa.

¹⁴ Seyni Hoyakalu hihlenu reneklewle renekpotuthonukno. Hiyrunu Hoyakalu hihlenu reneklewleyma renekno halixlewlu hiyrun-koxa hamotlewlu Cristo Jesus himwaleru.

¹⁵ Xye ntshinreru halikakni hiyáhoni rujhalu ralixkoxikowaka psolu hchinikanuymako: Cristo Jesus xye tshijne hinpatka hektune riwekkajyawakapa. Hiyrunu wanna ptowruneka hektune pnuterutno hita.

¹⁶ Hiyáhoni wale tshinanu netwamonutka. Netwamonutka klu tshinanu Cristo Jesus halukhekhiretlu ptowruka hmachiretannu hitayma. Waleni hiphujetatshri hinamtatshinepa Cristo Jesus halixatshinepa hiweklu hike rixiniko mnikawnakatupa yoptotatshinepa tshinanu.

¹⁷ Ptowru potuko yokanatatshri, ptowru hohneko hwatshri, hikeklu hohne mnikawnakatu, metkotu, Hoyakalu satupkalutu tshinanu kahwakpirhohnekanatkalurupni, himalwuhohnekanatkalurupni psol-hohne potukananuko! Seyoka.

Kihleru Yahotkaklu Piranapni

¹⁸ Noturu Timóteo, xye hiykolu pirana nenekanyi. Xye hiykolu mitshikananu htshinyawakatkayina potuko ntshinanutnakyi. Xye pirana mixkotanyi kihle yahotkakle pixyawakapa.

¹⁹ Hiyrun-koxa pmunanha halixletanu. Powra hchinikanhohnekananupyi. Satkaka yineru hi homkahitanatkalu hihchinikanni kihleru hekhitatshrini hiyahokni hnikata halixletanatkana.

²⁰ Hepna wan-hixatshine Himeneu hiyrun-koxa Alexandre tshinkaluru. Satanás kamtshi himukatle nitshixyana. Hiyahokni rekhitkona Hoyakalu tokanu halikakalutu hma kamnixyawakanupna halikaka.