1 Tessalonicenses 5 - Bíblia

Halpokoxinwa Tsru Hixikatshriwa Cristo Hapojinripa

¹ Seyni Jesus tshinanu nmoletanune, hike mahata nyonyehixyawakhi Tsru Hixikatshriwa Cristo hapojinri hohnepa potuko pirana.

² Klu tshinanu hixako himatpotutlu Tsru Hixikatshriwa Cristo hapojinri hohnepa katshowhuru hoyetshno hapokatshri mpohitkotuko pixka rixa hinretanu.

³ Waneya wla htshinannina yinepni: “Kihle hwalerunetkawu, kihle pokolunetkawu,” waneklukawa mkahwakakanatkotu tsru nikawnalu rixkonna. Matuwhenpiratatshro tshinowle pixka rixa hapokletanu, hi satukna hasukanu.

Hislahikatshriwa Piranapni

⁴ Seyni hixa Cristo tshinanu nmoletanune, hi mapchahawaka pixkawaka hwajetatshinhi waneklu hohnepatka hma kachixikowakanupa katshowhurune hapokyehitanune mkahwakkone pixka.

⁵ Seyni hixa Cristo tshinanu nmoletanune ptowrunekhi katawaka yehi hwatshinetkahi hohohne hwatshinetkahi. Hi hoyetshno hwatshinetkahi. Hi mapchahawaka hwatshinetkahi.

⁶ Hiyáhoni xye tshinanu hi himkatshine pixkalunepwu pimrine pixka seyni hiyokatshine pixkalunepwu halikaka. Kahchinikanurunepwu.

⁷ Himkatshine hoyetshno rumkana. Himetatshine hoyetshno rimjetna.

⁸ Seyni hixa, hohohne hwatshinwu kahchinikanurunepwu. Statshi hislahatshri pixkalutu wutakastatanu. Waleni walixle hiyrun-koxa wuchinijyawakna pimrine. Jiwtshi hinotatshri pixkalutu hsahyetanu. Waleni wkahwakachale wiwekkakjeru.

⁹ Klu tshinanu Hoyakalu hi nuretatkalu rapnokaxyawakapwu seyni winotka wiwekkakko Wutsrukate Jesus Cristo tshinanu halikaka.

¹⁰ Rupnatka hixa tshinanu hiyáhoni ho wiwejiniwa ho wupninipa hike rixa, Cristo-yma wiwekanu rapojinipa.

¹¹ Hiyáhoni hepixkakanu htserutahchinikankakanu hixjekanaxyawaka pixka.

Paulo Hiykotna Cristo Tshinanu Moletkakatshine

¹² Cristo tshinanu wmoletanune wanjithi himathexyawakna hix-yehi kamrurewpotuxikatshine hinotjene, hasrukjene Tsru Hixikatshriwa Cristo piranaya.

¹³ Hkahwakpirpotutanna, hichinikanna repixikowakna tshinanu. Kihle himwachakaklephi.

¹⁴ Wmoletanune Cristo tshinanu, wanjithi hiykoxyawakna mmerene. Hpoyikotahchinikanutanna mmixkohchinikanune. Hepixanna hihroka halixletatshine. Hmachiretannuhonupna ptowruneka yehiya.

¹⁵ Hislahinwa hi satukna hektutu, hektutuyma hapnutanu. Seyni ptowru katako hijhapotutanru kihleruyma hepixkajyawaka hixkakluko hiyrun-koxa pimrine yehiya.

¹⁶ Ptowru katako poyikolunephi.

¹⁷ Hi hituk-hanjihohneretanu.

¹⁸ Hpoyahnutanru Hoyakalu ptowru potuko tshinanu. Klu tshinanu xye chinikantshikni Hoyakalu himalujyahi Cristo Jesus-ya.

¹⁹ Hi himaletanru Hoyakalu Hiwejikaluru.

²⁰ Hi heyikanru halikak-potuk-tokantshi hinkaklewlu.

²¹ Hyahotanru ptowru hinkaklewlu. Kihle piranalu himrexinwa.

²² Hasujinri ptowru hixatshri muhletu.

Paulo Himalujyana Tessalônica Hajene Piranapni

²³ Waleko Hoyakalu hihlewahchinikanrewlu wenekjeru Hoyakalu pixkalune hixkakanhi ptowru chinikantshiya. Nanjitlu Hoyakalu rinoxyawakapwu hixa psoluka wiwejinri, wihchinikanu, wimanen-koxa ptowru hikoluklu hiyrun-koxa ptowru jihyehixikoluya rapojinpotukananuko Wutsrukate Jesus Cristo.

²⁴ Htshanixjeru kamrurtshi poyahokakatshrini.

Hichiniklewlu Piranapni

²⁵ Nmoletanune Cristo tshinanu, hanjihohneyehitanwu.

²⁶ Halikkakanna ptowruneka Cristo tshinanu moletkakatshine hamluruyma Cristo hiwakaya.

²⁷ Nanjipotuthi Tsru Hixikatshriwa Hoyakalu halujyawaka tshinanu twu yonawahlo het-yonhaxyawaka ptowruneka Cristo tshinanu moletkakatshine yehi.

²⁸ Nanjitlu Wutsrukate Jesus Cristo henekachale hihlenu hixa tshinanupa.