1 Tessalonicenses 4 - BíbliaHoyakalu Hikchikhihlenreru Potukalune Hixjexyawakapa Piranapni 1 Hiyáhoni wane pnute Cristo tshinanu wmoletanune, wanjithi hiyrun-koxa wuykothi, Wutsrukate Jesus tshinanu, wan-hixa hiykotkota hanu potu haluk-hixleta Hoyakalu hikchikhihlenreru tshinanu xawakni hkamhaleru hpaklu kamhaletanru. 2 Klu tshinanu hixa himatlu wasrukle wunkakjekanaxyahi hixa tshinanu Wutsrukate Jesus towuxyawu piranni. 3 Xyekni ralujyahi Hoyakalu, potukalune hixyawakapa, ptowru hapoklewluko kotspalaxikatshinwahi. 4 Satkaka hixa jejinhi haluka wan-hixletna hhanunrone Hoyakalu halujyawak-potuko hiyrun-koxa kihleruya yine hetanuya. 5 Hi suxo haluklerucha hkamhanu, pimrine pixka Hoyakalu mkahwakpiratkane pixka hi hixanu. 6 Hiyáhoni jeji suxoyma pirana wkochtshekleru tshinanu, hi xako himtukanru hmoletanru Cristo tshinanu klu pirana tshinanuktako. Klu tshinanu Tsru Hixikatshriwa Hoyakalu hapnokatanna xyekaka kamhatshinepa. Wtshinyawakatkahi mitshi, xawakni wane pnute wixa hiykoletatkahi. 7 Klu tshinanu Hoyakalu hi tshanixatkawu hektutu kapatmenuru wkamhiywaka tshinanu seyni kihleru, Hoyakalu halukanruko wkamhiywaka tshinanu halikaka. 8 Hiyáhoni katukta hiknoklu xye tokantshi, hi yineru ruknoka seyni Hoyakalu Hiwejikaluru wenekjeru, ruknoka halikaka. Wuchinikkakle Wekhire Piranapni 9 Cristo tshinanu moletkakatshine hichinikkajyawaka pirana tshinanu himka nujhalu nyonyehixyawakhi. Klu tshinanu hixako hasrukakanatka Hoyakaluya hichinikajyawaka hixkakluko. 10 Klu tshinanu hixa wan-hixna ptowruneka hmoletanune Cristo tshinanu Macedônia tshijne hajene. Seyni wanjithi wane pnute nmoletanune Cristo tshinanu wane pnute potu hixanu. 11 Hijhalu kihle poko hixyawaka. Hixanuko himuprukanu. Hixako himyoyma hkamrurewaxini wtshin-towutlexyawakhi pixka. 12 Wan-hixini kihle piranyehirunephi malixkane yehiya. Waneyakni hi pimrine hkahwakanu hmahaxinri tshinanuya. Cristo Xye Tshijne Satojyawakapa Piranapni 13 Cristo tshinanu nmoletanune, naluklu himatjemyawaklu hipnatshine pirana hanu potu rixna, hma wamonuwaxyawakanupa pimrine pixka, hike mkahwakane pixka, hmixyawakanupa. 14 Klu tshinanu walixiniplu Jesus hipniywaka pirana hiyrun-koxa riwejyawakatnaka hipnatshine tskalaya pirana walixini waneko pixka rixa hwapletanna Hoyakalu hipnatshine Jesus halixatshinni Jesus-yma. 15 Xawakni wunkakhi Wutsrukate Jesus tokanu htshinyawak-potuko. Hix-hima hiwekatshinewa Tsru Hixikatshriwa Jesus hininri hohnepa, hi wkosejinna hipnatshinetka. 16 Klu tshinanu mitshikananhapka waneyaplu sapletshi towutkaluru himapa, waneyapa hiwejikaluru Hoyakalu towrerune tenhohne hajene towutatshri plama hima, waneyapa Hoyakalu kowne hima, waneyapa Tsru Hixikatshriwa Jesus potuko tenhohne hserpijini. Waneyapa hipnatshine Cristo tshinanu yotunohapkatanu. 17 Waneya wane pnute hixa hiwekatshinwu hixetatshinwu, wannaymakananuko hwapkalunepwu hohimkohiya, tenhohne wyoptoxinri Tsru Hixikatshriwa Jesus. Hiyáhoni wumuthohnekanatanutkalu Tsru Hixikatshriwa Jesus. 18 Hiyáhoni xawakni hapnanuhchinikankakanu xye tokantshiyma. |
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Missão Novas Tribos do Brasil