1 Tessalonicenses 3 - Bíblia

Paulo, Timóteo Yokanaxinri Piranapni

¹ Hiyáhoni hi pnute wakotatka hix-yehi wyiywaka wujhahchinikanuta hixapka Atenas poktshi wutujyawakapa.

² Waneya Cristo tshinanu wmoletanru, Timóteo tshinkaluru, wyokanatatka. Wale Hoyakalu kamrure kamhajetatshrini, wikamrurewatanruni, kihle piranalu potuko hiwekkaklewatatshri pirana, Cristo pirana hinkaklewlu tshinanu. Wyokanatlu hpoyahokajyawakaphi hiyrun-koxa repixyawakaphi halixle pirana tshinanuya.

³ Hi satukna yineru himaletkotka halixlu piranaya xye salewaktshikaka tshinanuya. Klu tshinanu hix-potuko himatlu xye salewaktshikaka Hoyakalu hitshrerni hixa tshinanu.

⁴ Klu tshinanu hix-yehi wwakanaxini, wunkakatkahi waneyapwu salewaktshi, xawakni wakanhayehitjeru salewaktshi pixkalutu. Hiyrunu hixa himatlu wane potuko rixatka.

⁵ Hiyáhoni wale tshinanu nmakotahchinikanutkan-tshinanu Timóteo nyokananwakathi hixa halixle pirana nimatyehixyawakapa. Nimaxyawakaplu ho kamtshi kyahtalewakleru yahtaletatkahi xawaka ho wmahijeru kamrurewletatkahe hixa tshinanu.

⁶ Seyni xawakni hix-yehi ruchpajyatka Timóteo waneya hewi rapokatka. Runkakwu hixa pirana, kihler-pirana halixlewle pirana hichiniklewle pirana. Runkakwu hixa hichinikpotuxyawakwu pirana. Hix-hima hi hituk-hichinikletwu. Hixa haluk-hetlepotutwu, hixa waluk-hetlexyawakhi pixka.

⁷ Hiyáhoni Cristo tshinanu wmoletanune hixa halixle pirana tshinanu wuhlehchinikankakatka ptowruka wsalewakluya hiyrun-koxa wkojwakahchinikanuxinriya.

⁸ Xawakni halikaka wiweka Tsru Hixikatshriwa Cristo poyehiwa halixlekajyawakhi pirana tshinanu.

⁹ Hiyáhoni xawakni wpoyahnutlu Hoyakalu wane pnutetka hixa tshinanuya. Wpoyahnuwata wpoyikowle wyoptoleru Hoyakaluya hixa tshinanuya.

¹⁰ Ptowru hohneruka hohohne, hoyetshno koxa wanjipotutlu Hoyakalu wumukata hetlepotuxyawakhi wtseruxyawakaplu halixle hmahaxinri.

Paulo Tessalônica Hajene Ranjihohneyehixyawaka Piranapni

¹¹ Wanjitlu wuru Hoyakalu hiyrun-koxa Wutsrukate Jesus hkosekhapoxyawakwu wapkapyehixyawakaphi.

¹² Wanjitkoxlu Tsru Hixikatshriwa Hoyakalu htseruwnakajyawakhi hichiniklewlu piranaya. Hixkakluko hichinikkajinripa hiyrun-koxa pimrine ptowruneka hichinikpotuxinripa. Hixa wuchinijyawakhi pixka hixanna pimrine.

¹³ Waneypakni hmixkotahchinikanutanhi potukalune hixyawakapa, mukolukanuwnakanephi Wuru Hoyakalu hetanu, runinipa Wutsrukate Jesus ptowruneka hpotukatanuneymakananuko.