1 Tessalonicenses 2 - Bíblia

Paulo Kamrure Pirana Tessalônica Poktshiya Piranapni

¹ Klu tshinanu hixako himatlu, Cristo tshinanu nmoletanune hix-yehi wapkapyawaka pirana. Hi wmahijeru hapkaplechatatka.

² Hixa himatlu mitshikananu Filipos poktshi wsalewnakanaxini, Tessalônica wmapokakanatkanuklunuwa, wyotnetkatka. Wanepnawaka mpikkanwu Hoyakalu tshinanu wunkakhi Hoyakalu pirana, kihle piranalu potuko hiwekkaklewatatshri pirana, yáholu wimaletpiratka.

³ Klu tshinanu wunkakle hi pupjeru hinkaklewluni. Hi hektuhaj-wixle tshinanu piranni. Hi yokwirewatatshri piran-koxni.

⁴ Seyni Hoyakalu hikchikhihlenutlu hixa hnurexyawaka kihle piranalu potuko hiwekkaklewatatshri pirana wunkaklexyawaka tshinanu, wane potuko wixa. Hi wujhalu yine halujyawaka wkamhiywakapa seyni Hoyakalu halujyawaka wujha kamhaletanu. Hoyakalukni wetumhahajitjeru.

⁵ Klu tshinanu hikeklu hohne tokantshicha wyokwijehchinikanuxyahi. Hixa himatlu wale pirana. Hiyrun-koxa hi satu pa hixanu wkayaxyawakapa tshinanu wunkaklewata hix-yehiya. Hoyakalni wuphujtatjeru.

⁶ Hi wujhalu yine himalwuxyawakwu, hi hix-yehiko, hi pimrine yehiko.

⁷ Wumukata satu pa hixanu henekkotmaka hix-yehiya Cristo nurrene wixyawaka tshinanu seyni hike. Klu tshinanu hix-yehi wwakanaxini kihle hislahle wixjekanathi tsro pixka twuhenene tuchinijyawaka tachitshakawhenexyawaka pixka.

⁸ Hixa wuchinikpotuxyawaka tshinanu, hi kihle piranalu potuko hiwekkaklewatatshri pirana tsonu Hoyakalunu waluk-hinkaklethi seyni wiwejinriko wenekpirathi klu tshinanu hixni wuchinikanunhi.

⁹ Klu tshinanu hixa, Cristo tshinanu nmoletanune hichiniklu wyaprewakanaxini, wsalewnakanaxini. Hoyetshno, hohi koxa wkamrurewakanatatka satukna hixa wma kojwajyawakanupa wunkakakanathi kihler-potuko tokantshi, kihle piranalu potuko hiwekkaklewatatshri pirana Hoyakalunu.

¹⁰ Hixa hiphujtatwu hiyrunu Hoyakalu hiphujtatwu wixjexyawaka pirana hixa Cristo halixatshinhi yehi wwakanaxini, hike mixkanwu potukalunwu, mukolukanuwnakanwu hix-yehiya.

¹¹ Hixa himatlu hirtshi hwuheneyma pixka, waneko pixka wixhi hixa ptowrunekhi.

¹² Wumutjekanathi, wapnanuhchinikankakjekanathi, wuykojekanathi Hoyakalu halujyawaka himukata kamhaletanu hixa hiwejinriya. Tomhakalunhi waleko hpohirewaxyawaka hajene hixyawakapa hiyrunu royaknu himwatshine hixyawakapa.

Tessalônica Hajene Hoyakalu Tokanu Romkahpotutna Piranapni

¹³ Wale tshinanu hi wutuk-himalwuretlu Hoyakalu. Hix-yehi wwakanaxini, Hoyakalu pirana wunkakjekanathi, hixa jemlu hiyrunu halixatkalu. Hi yine tokanucha pixka htshinahotatkalu seyni Hoyakalu tokanu potuko hjematka. Wale halikaka Hoyakalu tokanni. Hixa hitokote kamrurewaxikatshrini.

¹⁴ Klu tshinanu Cristo tshinanu nmoletanune hixa hiknohjerutka pixkalutu potuko hiknohatkana wanna, Judeia tshijne hajene Hoyakalu hapatjetanunkaka halixatshine Cristo Jesus-ymalune yehi. Klu tshinanu waneko pixka hixa salewnaleta hixa, hixako himolene tshinanu, wanna salewnatka judeu-neko tshinanu.

¹⁵ Wanna Wutsrukate Jesus-ko ruylatna. Hoyakalu tokanu hinkakletatshin-koxa ruylatna. Hix-koxa hkamnitna. Hi psojikna hpoyikotluna Hoyakalu hiyrunu ptowrunek-yine hkamnijetna.

¹⁶ Rimaletwuna wunkajyawakna judeu mixkane, hiwekkaklewatatshri pirana hma miwekkajikowakanupna. Wan-rixa poyahokaklehohnekanatluna rektunna. Seyni xawakni rapnokatkona psoluka Hoyakaluya.

Tessalônica Poktshi Nwaka Hyapiraxyawakatnaka Paulo Piranapni

¹⁷ Ha hixa wmoletanune Cristo tshinanu, wutspalkajika pchinika tsonu hix-yehi hiyrunu wimaneya tsonu seyni wuchinikanretjexyawakhi hike. Hiyáhoni wane pnute wyapretak-hetletmakhi.

¹⁸ Hiyáhoni pa katkaka waluka yanwaklethi, hita Paulo-no halikaka haluklu. Seyni Satanás kamtshi himaletatkawu.

¹⁹ Klu tshinanu klunerni wkahwakleru ho wumuwlepa ho wumlujikolu poyikowkaklewatatshri? Hi he hixpakni, Wutsrukate Jesus hetanuya runinpatka?

²⁰ Klu tshinanu hixni wumlujikolunhi hiyrunu wumuwlenhi.