Biblia Todo Logo
Bìoball air-loidhne

- Sanasan -

1 Pedro 5 - Bíblia


Hoyakalu Carneiro-tene Xkehi Piranapni

1 Cristo halixatshine kosekatshri koxno hita, Cristo salewnale hetatshrino hiyrunu Hoyakalu hiphujewnale hinatshripaymalutno. Hiyáhoni Cristo halixatshine kosekatshine hixa tskala hwatshine nanjipotuta.

2 Hoyakalu carneiro-tene pixkalune hix-yehi hwatshine xako hohlutanu. Hinotanna wanna seyni hi mmerene pixkalunephi seyni halikaka jmererunephi. Hi tiyiro himtuklewatatshri hkayapiraxyawaka tshinanu hislahlewatanu seyni halikaka hijhanu hanu potu himukata hepixletna.

3 Hi tsru towutatshine pixka hixahoxinwa seyni kihleru kamhajetatshinephi carneiro-ne pixkalune himukata homkahrexyawakaphi.

4 Waneya Carneiro-ne Hinotatshri Pixkalutu Tsruru Potuko hapojinipa, satu sahyi himlujikolu mnikawnakatu hyochmakjiwuxikolupa.


Henekahchinikanru Hiyrunu Haliklu Piranapni

5 Hiyrun-koxa hixa maklujinhi hyijnakotanna tsrune. Halikaka hixa ptowruneka hyijnakkakanu. Hmasaxinwa ptowru potuyako. Klu tshinanu Hoyakalu kamnitna halixkotachaxikatshinwa seyni repixna masaxikatshriwa renekachaleyma.

6 Hiyáhoni Hoyakalu hepixle himukatatshri potuko mixkonu tshinanu hmasaxinwa. Wan-hixatshinepa hepixko Hoyakalu nurrewaxinri papkopa.

7 Ptowru potuka hihchinikanu kojwakjeru Hoyakalu henekanru. Klu tshinanu Hoyakalu hichinikhi, repixanhi.

8 Hiyokatshine pixkalunephi, tsru hislahle hixinwa klu tshinanu tsru kamtshi, hkamnitjeru yotaljeta mhenoklu hahlalatatshri yine hnikpiratanune rujhini pixka.

9 Xye pixkalutu himaletanu, hixkolunephi halixluymako. Himatanu, xye salewaktshi pixkalutu koxa retna pimrine himolene Cristo tshinanu, xye tshijne hwatshine.

10 Seyni Hoyakalu ptowru kihleru heneklewatatshri, wale hoyaknutshi hike mmahaxikatu tshanixwu, Cristo Jesus tshinanu, hpotukatanhi, hpoyehiwkakanhi, hmixkowkakanhi, rapnanuhchinikankakanhi, hsalewnale pchini tsonurutu hiknohinipa.

11 Himalwutkalurni Hoyakalu ptowru potuko towutatshrini hikeklu hohne mnikawnakatupa.

12 Yonatatshri Silvano tshinkaluru. Hixa tshinanu moltshi halikakalutni suslahakleru potukni wale. Wale yonaxyano pso piranajiji Hoyakalu towuxyahi pirana. Hiyrun-koxa yonawahloyma nuphujetlu Hoyakalu halukleru halikakalutu himwatshine hixyawakapa pirana.

13 Cristo halixatshine hapatjetatshine Babilônia poktshi hwatshine hixayma nuretkalune halikhi. Hiyrun-koxa Marcos tshinkaluru, noturu halixlu tshinanu halikhi.

14 Hichinikakluyma hyoptokakanu. Hixa ptowruneka Cristo Jesus-ymalunhi kihle hchinikanurunephi.

NT

Primeira edição 2008

©Missão Novas Tribos, Sanford, FL

 

Gênesis

ISBN 978-85-98634-82-1

ISBN Digital 978-65-993898-6-3

©2017 Missão Novas Tribos do Brasil

Missão Novas Tribos do Brasil
Lean sinn:



Sanasan