1 Pedro 1 - Bíblia

Hali Hichiniklune

¹ Hita Pedro-no Jesus Cristo nurrerno. Twu yonawahlo judeu-ne mwachatkane tshinanupa. Ponto tshijne yatshine tshinanu, Galácia tshijne yatshine tshinanu, Capadócia tshijne yatshine tshinanu, Ásia tshinikowaka yatshine tshinanu, Bitínia tshinikowaka yatshine tshinanu.

² Hoyakalu nurrenhi waleko ralujyawaka tshinanu, Hoyakalu Hiwejikaluru yineru powratatshri tshinanu, hyijnakoxyawakaplu Jesus Cristo halujyawaka, hpolhohoxikolupa wale hrahaya. Hoyakalu hepixle yoptotatshinephi hiyrun-koxa kihle hwachalu hwapotutatshinephi.

Wpoyahnutlu Hoyakalu Riwekkaklewle Tshinanu

³ Wpoyahnutanru Wutsrukate Jesus Cristo Hiru, Royakalute. Herotu matuxikolu renekwu hiweklu wkahwajyawakapa Jesus Cristo hiwejinixnaka hipuktshiya tshinanu. Hoyakalu hetwamonre tsru potuko tshinanu.

⁴ Hoyakalu heneklewle yoptotatshinephi. Mnikawnakatupni wyoptotanru, meyikotni, mimat-himtuwnakatupni, rimretka tenhohneya hixa tshinanupa.

⁵ Hislahkalunhi Hoyakalu himukatleyma halixlu tshinanu, hiweklu hkayaxyawaka. Rekhipotuxikolupa hiweklu, hnikawnahohnexinpatka h-marca-xikolu.

⁶ Xyemka poyikothi seyni xawakni halikaka hwamonuwata xye hohne pchinjiji, ptowru hixatshri yahtaletlu hkojwakjeru tshinanu.

⁷ Seyni hsalewna, halixle hyahoxika, rimathexikowakapa ho halikaklahe halixlu ho hike. Ouro koxa moyakatu, rixirikka tshitshipawayma, waneko pixka rixko halixlu halukkaluru potuko, tshitshipawa pixkalutuyma hyahoxika. Wan-rixko yineru halixle rumukata himalwuretko, ruphujetko walixle, htserpiranatko walixle Jesus Cristo hapojinri klu papko.

⁸ Hma metanutni wale seyni hichinikanru. Hi hetanru xawakni seyni halixlu. Wan-hixatshinhi seyni himuwatatshinhi tokantshi mpoyaho hinkakletletkotuyma himuwjeta, tsru ruphujexikolu tshinanu.

⁹ Halixle waleni hiweklu heneklewatatshri klu tshinanu hsamenru hiwekkakka.

¹⁰ Wale hiwekkaklewatatshri piranakni. Hoyakalu tokanu hinkakletatshine mitshikawlune honra ruchtotapotutluna hiyrunu rujha himatjemletluna mapokatuwa pirana runkakletlerna pirana, klu pixkalutnihe xye halukkaluru hixa nwaka hapokatshripa.

¹¹ Rujha himatjemletluna kluneru piranni xye hiyrunu rujha himatletluna hiklu rakanhanu xye pirana. Klu tshinanu Cristo Hiwejikaluru mitshi wanna hitokote hwatshri runkakna mitshi Cristo mapokatuwa pirana, Cristo saletle hinatshripa pirana hiyrunu hsaletle wane pnutepa ruphujexikolupa pirana.

¹² Hoyakalu mitshi himatjemkakatkana, hi wannako tshinanupni xye pirana seyni hixa tshinanupni. Xyekaka pirana runkaklena hixa tshinanu, xawakni hinkakka kihle piranalu potuko hiwekkaklewatatshri pirana jinkakletakleruneya Hoyakalu Hiwejikaluru, tenhohne hichpajikatshri hepixleyma. Haté hiwejikalune Hoyakalu towrerune tenhohne hajene hijha himatletlu klunerni xyekaka pirana.

Hoyakalu Haluklu Potukalune Wixyawakapa Piranapni

¹³ Hiyáhoni xawakni hihchinikanu halpokotanu. Hiyokahchinikanutatshinephi. Hoyakalu hihlenu kahwakatshinephi haté nikawnahohnexinipa. Xye henekko Jesus hiphujewnini hohnepa.

¹⁴ Mturune kajnakolune pixkalunephi. Hi hyimanru mitshikawluru het-sotanruru hmahchinikanuklunuwa papko pixka.

¹⁵ Halikaka ptowru potuko hixjexyawaka potukalunephi, htshanixjeru Hoyakalu potukalu rixyawaka pixka.

¹⁶ Klu tshinanu wla htshina Hoyakalu tokanu yonatkaluru: “Potukalunephi klu tshinanu Potukalno hita.”

¹⁷ Wuru Hoyakalu hiwaka hmunanhini, yinecha mkahwakpiratkatu, ptowru yineru kamhanru hetatshrini tshinanu, xye tshij-hoho hwaka pchinika hkahwakpiratanru Hoyakalu ptowru tshinanuya.

¹⁸ Klu tshinanu himatlu hitsrukatenni hasrujikolu hike mkochpakkatni womkahjekanatanru pirana, hi prata hi ouro himat-nikawnatshri wenru tshinanu wiwekkaka.

¹⁹ Seyni hanjitka Cristo hrahaya, kwenur-potuko. Carneiro whene psojikna hektuntshi machretu pixkalutni Cristo.

²⁰ Hoyakalu nurehchinikanutlu wan-rixyawaka Cristo xye tshijne hma mkamhaknuklunuwa. Seyni xawakni rakanhakakatkalu Cristo, nikawnahohnepiraxinistsi potuko ramotle tshinanhi.

²¹ Wale tshinanu Hoyakalu halixa, Cristo hiwekkakjeru hipuktshiya hiyrunu Cristo hiphujetjeru. Wan-rixa kahwakachalu hiyrunu halixlu Hoyakalu yehi yoptoxikalurupa.

Hamotlu Halikakalutu Piranapni

²² Hiyáhoni xawakni halikaka tokanu homkahlu tshinanu Hoyakalu Hiwejikaluru hepixle tshinanu hpowratahchinikanuxnawa hpoyaho hichinikanretletna hmoletanune Cristo tshinanu ptowru hamotluya. Hiyáhoni hichinikkakanu. Hi hixachatatshinephi seyni hihchinikanu psolukayma hichinikkakanu.

²³ Himepe matletatshinhi, hi himat-nikawnatshri matuxikatshinhi halikaka mimat-nikawnakatu matkakatkahi. Hoyakalu tokanni wale, hiwekatshri hike rixiniko mnikawnakatu.

²⁴ “Klu tshinanu ptowru yineru peklo pixka hixatshrini. Hiyrun-koxa ptowru hixatshri yineru hihlenu kchana hwu pixkalutni. Peklo hiprihachata hiyrun-koxa kchana hwu hijrukachata.

²⁵ Seyni Tsru Hixikatshriwa Hoyakalu tokanu rawhohnekanatanu.” Xye tokantshi hinkakletkaluru tokanu hix-yehi, kihle piranalu potuko hiwekkaklewatatshri pirana.