1 João 5 - Bíblia

Halixlewlu Xye Tshijne Hallixikowaka Piranapni

¹ Ptowru yineru Jesus tshinkaluru Cristo rixyawaka halixatshri, Hoyakalu matkaklerni hiyrunu katukta hamotanru Wuru Hoyakalu ramot-koxlu Hiwhene.

² Hoyakalu wamoxiniklunu hiyrunu wkamhiniklunru htowuxyawakwu, wimata Hoyakalu whenene hamoxini.

³ Klu tshinanu wkamhiniklunru Hoyakalu towuxyawu wekhitlu Hoyakalu wamota. Hiyrunu tokantshi htowuxyawu hi kyapreru womkahixyawaklu.

⁴ Hoyakalu matkaklene hallitanru xye tshijne. Xye tshijne hallitatshri, waleni walixle. Xyekni wkaykakjeru.

⁵ Katnihe xye tshijne hallitatshri? Xye tshijne hallitatshri waleni Jesus, Hoyakalu whene rixyawaka pirana halixatshri.

Maplu Cristo Hiphujtatatshri Piranapni

⁶ Honha, hrahtshiyma hinatshri, waleni Jesus Cristo. Hi honha tshinanu tsonu runatka seyni honha hiyrun-koxa hihraha rimapokatka. Hoyakalu Hiwejikaluru xye pirana hiphujtatatshri, Hiwejikaluru halikakalutni.

⁷ Klu tshinanu mapna hiphujtatatshine tenhohneya, Wuru Hoyakalu, Hoyakalu tokanu hiyrunu Hoyakalu Hiwejikaluru. Nyi mapamkana seyni satupkalu.

⁸ Hiyrun-koxa maplu hiphujtatatshri xye tshijneya: Hoyakalu Hiwejikaluru, honha hiyrunu hrahtshi. Seyni nyi mapa pa hchinikanurunni.

⁹ Yine hiphujtaler-pirana wyoptojeta, seyni Hoyakalu hiphujtaler-pirana potu halixkalurni. Hoyakalu hiphujtaleru waleni, Hiwhene pirana.

¹⁰ Hoyakalu whene halixatshri xye hiphujtaluru ruphujeta. Seyni katukta hi halixlu Hoyakalu, kaylokleru htshinru Hoyakalu klu tshinanu hi ralixatkalu Hoyakalu tokanu, Hiwhene pirana.

¹¹ Xyekni Hoyakalu hiphujtaler-pirana. Hoyakalu henekwu hiweklu mnikawnakatupa. Hiyrun-koxa xye hiweklu Hiwhene yehi rukchijika.

¹² Katukta himwalu Hiwhene rimwakoxlu hiweklu. Seyni katukta hi himwalu Hoyakalu whene, hi koxa rimwalu hiweklu.

Hoyakalu Wapohchinikanreru Piranapni

¹³ Xyekaka pirana nyonanwakathi hixa Hoyakalu Whene hiwaka halixatshinhi, himaxyawakaplu hiweklu hikeklu hohne mnikawnakatupa hwiya, hiyrunu Hoyakalu Whene hiwaka halixyawaka.

¹⁴ Hiyrunu xyeni wmunanhaleru wukchikleru Hoyakaluya. Kluneruktako wanjitanu Hoyakalu hikchikhihlenreru, wale yijnakotwu.

¹⁵ Hiyáhoni wimaxinri hyijnakoxyawakwu Hoyakalu, kluneruktako wanjixinri, wimatkoxlu wyoptotanru wanjireru kluneruktako.

¹⁶ Satu yineru hexiniplu Cristo tshinanu hmoletanru hektuwaka hkamhiywaka, seyni hektuwaka mamha menu hkamhini, Hoyakalu ranjitanu riwekkajyawakaplu. Xye ntshinreru hektuntshi hipuktshi meneklewatkatu. Seyni rawa satu hektuntshi hipuktshi heneklewatatshri. Hi xye pixkalutu tshinanu, nanjihohnekjixa.

¹⁷ Ptowru hixatshri hektutu kamrure hektuntshini. Seyni rawa hektuntshi hipuktshi meneklewatkatu.

¹⁸ Wimatlu, ptowru yineru Hoyakalu matkakleru hi hektuwaka hkamhajeta. Hiyrunu Hoyakalu matkakleru himat-hislahnawa hiyáhoni kamtshi hi yotnekanru.

¹⁹ Wimatlu Hoyakalununetkawu. Wimatkoxlu xye tshijnemka ptowruka htowuta kamtshi.

Cristo Halikaka Hoyakalni Hiyrunu Rimalwuxikowaka Piranapni

²⁰ Hiyrun-koxa wimatlu Hoyakalu Whene hapokatka hiyrunu renekwu himatkaltshi wimathexyawaklu halikakalutni wale. Halikakalutuymalunetkawu. Waleni Hiwhene Jesus Cristo. Xyekni Hoyakalu halikakalutu hiyrunu hiwekluni hikeklu hohne mnikawnakatupa.

²¹ Mturune pixkalune, hislahinwa mayawletshicha hma momkahixyawakanupa.