1 João 2 - Bíblia

¹ Nowhenene pixkalune, xyekaka pirana nyonanwakathi hektuwaka mkamhiywakanupa seyni hektuwaka hkamhini satu yineru, wimwalu wuhlepokoyehitjeru Wuru Hoyakalu yehiya. Walekni Jesus Cristo, potukalu kamhatshri.

² Jesus Cristo tshinanukni wektunu hiknokka, hi hixa wektunu tsonu tshinanu seyni psol-tshijne hajenenni hektunu tshinan-koxa.

³ Hoyakalu yokanre wkamhiniklunu waneya wimatlu Hoyakalu halikaka wimata.

⁴ Satu wan-tshinini “nimatlu Hoyakalu”, seyni hma momkahitkanuklunru Hoyakalu yokanre, halikaka kayloklerni wale yineru hiyrunu hi rawya halikakalutu.

⁵ Seyni katukta kamhajetlu Hoyakalu tokanu, halikaka Hoyakalu hamotle wale yehi rawanutka. Wan-rixikowaka tshinanu wimata Hoyakaluymalunetkawu:

⁶ Katukta wan-tshina “Hoyakaluymalutno”, htshinini, raluka Jesus Cristo hiwekle pixka rixa hiwekletan-koxa wale.

Herotu Yokanruru Tokantshi Piranapni

⁷ Nuchinikanretlene, hi herotu yokanrur-pirana nyonanwakathi seyni mitshikawluru hyinuwaklekananuko himwaler-pirana. Xye mitshikawluru yokanrur-pirana walekatkani hyijnakotanru pirana.

⁸ Seyni herotu yokanrur-pirana nyonanwakatanutnakhi. Waleni halikakalutu Jesus Cristo-ya hixay-koxa, klu tshinanu mapchahalu hiknohpiratatka hiyrunu katalu halikakalutu mixkowamtatka.

⁹ Katukta wan-tshina, katawaka rawyawaka seyni rahnanutlu himole, mapchahawakakowalu.

¹⁰ Katawaka rawa himole hichinikanretatshri hiyáhoni hi rawya hitspetkaluru.

¹¹ Mapchahawaka rawakowa hahnanutamoletatshri. Mapchahawaka riyana hiyáhoni hi rimata hanukta hyanu, klu tshinanu mapchahalu tshinanu hi rapkathojita.

Kamtshi Hallirixikolu Piranapni

¹² Mturune pixkalune, nyonanwakathi klu tshinanu hektunu hiknojikatka Jesus Cristo hiwaka tshinanu.

¹³ Nyonanwakathi, tsrune pixkalune klu tshinanu hixa himathetlu hyinuwajikolu hwahohnekanatatshri. Maklujine pixkalune, nyonanwakathi klu tshinanu hixa hallitatkalu kamtshi.

¹⁴ Nyonanwakathi hixa mturune pixkalune klu tshinanu hixa himathetlu Wuru Hoyakalu. Nyonanwakathi tsrune pixkalune klu tshinanu hixa himathetlu hyinuwajikolu hwahohnekanatatshri. Maklujine pixkalune, nyonanwakathi hixa klu tshinanu hixkohchinikanurunhi hiyrunu himretlu Hoyakalu tokanu hiyrunu hixa hallitatkalu kamtshi.

Hi Xye Tshijne Hamoxyawaka Piranapni

¹⁵ Hi het-sotanutanru xye tshijne hi koxa xye tshijne hajeru hejnu. Xye tshijne ret-sotanuxini satu yineru hi ramotlu Wuru Hoyakalu.

¹⁶ Klu tshinanu ptowruka xye tshijne hwatshri, yiner-mane het-sotanreru, yhaltshi het-sotanrewle, hiyrunu ptowru halixkolewlu, hi Wuru Hoyakalu yehi hichpajikatshrini seyni xye tshijne hichpajikatshrini wale ptowruka.

¹⁷ Xye psol-tshijneka hmahakananumxya ptowru het-sotanrewluymakananuko seyni Hoyakalu halujyawaka kamhatshri hikeklu hohne hnikawnanu.

Cristo Kamnitatshine Piranapni

¹⁸ Mturune pixkalune, hi howukatkalu xye tshijne nikawniywakapa hiyrunu hixa jempiranyehitlu Cristo kamnitatshri hinatshripa. Xawakni koxa hi heppikatkana Cristo kamnitatshine. Xye tshinanu wimathetlu hi howukatkalu xye tshijne nikawniywakapa.

¹⁹ Hix-yehi ruchpakamxyana seyni hi wepirene rixjekanatna klu tshinanu wepirene rixkamkana hi ruchotatkawuna. Seyni ruchotatkawuna rimathetkanna halikaka wepirene hmixyawakanna.

²⁰ Seyni pixkontshi henekkalunhi Hoyakalu Potukaluya hiyáhoni ptowru potuka himata.

²¹ Hi nyonanwakathi halikakalutu tokantshi hma mimatjemyawakanu tshinanu seyni nyonanwakathi klu tshinanu himatlu halikakalutu tokantshi. Hiyrun-koxa halikakalutu tokantshi hi rawyalu weyawlu.

²² Katnihe kaylokleru? Kayloklerni Jesus tshinkaluru Cristo hmixyawakanu tshinatshri halikaka. Cristo kamnitatshrini Wuru Hoyakalu hiyrunu Hiwhene malixkatu.

²³ Katukta hi halixlu Whentshi tshinkaluru hi rawya Wuru Hoyakalu, seyni katukta halixlu Whentshi tshinkaluru, Wuru Hoyakalu koxa rawya.

²⁴ Halixanru tokantshi hyinuwaklekananuko hyijnakotanru pirana. Pnute hya halixlexinri tokantshi hyinuwaklekananuko hyijnakotanru pirana hix-koxa Whentshi tshinkaluru himwanu hiyrun-koxa Wuru Hoyakalu himwanu.

²⁵ Reneklewatanu runkaklexyatkawu xyeni, hiweklu hikeklu hohne mnikawnakatupa.

²⁶ Xyekaka nyonanwakathi hyokwijpiratjene tshinanu.

Pixkontshi Wenejikolu Piranapni

²⁷ Seyni pixkontshi henejikolu himwakowa hiyáhoni hixa hi haluklu satuko hasrujyawakhi klu tshinanu pixkontshi henejikolu hasrukjethi. Hiyrunu rasruklewle halikakalutni hi weyawluni. Hiyáhoni htshina hasruklexyawakhi pixka hixa himwaletanru Cristo.

²⁸ Mturune pixkalune, waleymalunephi hiyáhoni ruphujewniniklunupa hike wpikanu hiyrunu hi wpatewatanu wale hetanu rapojiniklunupa.

²⁹ Hiyáhoni xawakni himaxini potukalu rixyawaka Cristo, himatan-koxlu ptowru yineruko Hoyakalu halujyawaka kamhatshri Hoyakalu matkakleru rixyawaka.