1 João 1 - Bíblia

Tokantshi Hiweklu Heneklewatatshri Piranapni

¹ Tokantshi hiweklu heneklewatatshri wyonanwakathi, xye tshijne yinuwajinikananuko hwatshri pirana. Xye tokantshi wyijnakotatka hiyrunu wetlu wiyhaleya. Wi potuko wexyalu, wutyaklu wimyoya.

² Xye hiweklu hiphujewnatshrini hiyrunu wetlu. Hiyáhoni xawakni wuphujtatlu. Wunkaklewyehithi hiweklu hikeklu mnikawnakatupa pirana, Wuru Hoyakalu yehi hichpajikatshri hiyrunu hix-yehi potuko hiphujewnikatshritka.

³ Ptowru wetleru pirana, ptowru wyijnakotanru pirana wunkakhi, hixa pixka hixahchinikanutatshine hixyawakapa, hix-koxa. Klu tshinanu halikaka hixa pa hchinikanurunwu Wuru Hoyakalu tshinanu hiyrun-koxa Hituru Jesus Cristo tshinanu.

⁴ Xye pirana wyonanwakathi wumuwle tseruwnapotuxyawakapa.

Hoyakalu Katalu Rixyawaka Piranapni

⁵ Xye piranakni wjemyalu Jesus Cristo hiyáhoni xawakni wunkakhi hixa. Xyeni wale pirana, Katalni Hoyakalu hiyrunu hi rawya mapchahalu.

⁶ Pa hchinikanurunwu Hoyakaluyma wtshininiklunwa seyni mapchahawakayma wyaniniklunu, wweyawata hiyrunu hi womkahitlu halikakalutu.

⁷ Katawaka wyaniniklunu wale pixka, hixa hatajnutatshinepwu pa hchinikanurukakatshinepwu hiyrunu Hituru Jesus hraha powratjetwu ptowru hektuntshi tshinanu.

⁸ Hektuntshi mwikanwu wtshininiklunwa, wyokwijechaxnawa hiyrunu hi wimwalu halikakalutu.

⁹ Seyni wmajnákonu wuphujtayehixinri Hoyakalu, ramtakahchinikanyehitlu wektunu hiyrunu hpowratanwu ptowru hektutuya klu tshinanu potukalni hiyrunu htshinyawak-potuko hkamha Hoyakalu.

¹⁰ Hikeklu hohne hektuwaka wkamhatka wtshininiklunwa hatatjewa kaylokleru wtshinru Hoyakalu hiyrunu hi wimwalu htokanu.