1 Coríntios 15 - Bíblia

Cristo Hiwejinixnaka Piranapni

¹ Cristo tshinanu nmoletanune, nuchinikkakhi kihle piranalu potuko hiwekkaklewatatshri pirana, nunkakle pirana. Hixa nunkakatkalu. Hixa yoptotatkalu hiyáhoni xawakni hixa poyehi halixlerunetkahi wale pirana tshinanu.

² Wale pirana koxa hiwekkakhi, hixa himrexinri kihler-potuko tokantshi nunkaklewyehixyatkahi. Ho hmahijeru halixlexini tsonni.

³ Mitshikananhapka nunkajikolu pirana nunkakatkahi. Walekni, Cristo hipnapya wektunu tshinanu yonatkaluru Hoyakalu tshinyawaka pixka.

⁴ Waneya hkapnatka Cristo. Waneya map-hohne rixinri riwekatnaka, Hoyakalu tokanu yonatkaluru tshinyawaka pixka.

⁵ Waneya Pedro tshinkaluru hetlu waneya pimrine riyanjerene koxa doze hetlu.

⁶ Waneya wanna quinhentos pnute hetlu wanna ptowruneka Cristo homkahitatshinni. Pa hetkolutu rixluna. Hixo Cristo hetatshine hiwekawa seyni pimrinni hipnanatka.

⁷ Waneya Tiago tshinkaluru hetlu. Waneya ptowruneka Hoyakalu nurrene hetlu.

⁸ Waneya rapkatlepapkotka hita ruphujewnayehitatka. Hita hatatjewa pa papkoko matutatshrino.

⁹ Klu tshinanu ptowruneka nuretkalune pnute mujhakotno hita. Himka npoyahotlu Hoyakalu nuretanru ntshinikowaka klu tshinanu Hoyakalunerune Cristo halixatshine hapatjetatshine nkamnijekanata.

¹⁰ Seyni Hoyakalu hihlenu tshinanu, hitatkani hita. Hiyrun-koxa Hoyakalu hihlenu hi mahijerutatka hita tshinanu. Klu tshinanu nuretkalune kamrurewle pnute nixa kamrurewleta hita. Halikaka hi hit-potni seyni Hoyakalu hihlenu hitaymalutu kamrurewata.

¹¹ Hiyáhoni ho hita tshinanu ho wanna tshinanu hike rixa. Seyni hixa ptowrunekwu hinkaklewata. Wale piranakni halixatka hixa.

Halixatshine Hiwejinixnaka Piranapni

¹² Hi he wunkakle Cristo hipuktshi hichpajyatka riwejyawakatnaka piranni? Klu tshinanhe xawaka hixa satkaka wan-tshina hipnatshine hi hiwekanutnaka?

¹³ Hipuktshi hichpajikatshri mwaknumka Cristo-mka koxa hi hiwekanu.

¹⁴ Cristo hma miwekkanumka waneyamka wmahijeru hinkaklewletanu hiyrun-koxa hixamka mahijeru halixletanutka.

¹⁵ Hiyrun-koxa wane pnute wan-rixkamka Hoyakalu wweyata. Klu tshinanu wunkajyapiranhi Hoyakalu hipuktshi riwekkajyawaklu Cristo pirana. Hipnatshine miwejyawakanutnaka pirana halikaka rixkamka Hoyakalumka hi hiwekkakanru Cristo hipuktshiya.

¹⁶ Klu tshinanu hipnatshinetka hma miwekkanumkana, Cristo koxamka hi hiwekanutnaka.

¹⁷ Hiyáhoni Cristo miwekkanumkatnaka walixlemka mahijerutanu. Hiyáhomakni hixa hamhatshinenaphi hektunu tshinanu.

¹⁸ Wan-rixkamka Cristo halixatshineko hipnikanemka hamhachatatshinepmakni.

¹⁹ Xye wiwejinri tsonu tshinanu riwekkakkamkawu Cristo, hikemka pnute wkahwakanutka, waneyamka ptowru yinni pnute wamonnu wuchpajini.

Hipnatshine Tskalaya Mitshikananu Hiwekatshrini Cristo Piranapni

²⁰ Seyni halikaka Cristo hiwekatnaka hipnatshine tskalaya. Cristo hiwejyawaka tshinanu rimatka hipnatshine hiwekanutnaka.

²¹ Satupka yineru tshinanu rawa hipuktshi. Waney-koxa satupka yineru tshinan-koxa rawa hiweklutnaka.

²² Hiyáhoni Adão tshinanu ptowru neruka hipnanu. Waney-koxa Cristo tshinanu ptowru neruka hiwekkakko.

²³ Seyni satkaka yineru hiwekkakko waleko hipapkolu. Cristo-ni mitshikananu hiwekatshri. Waneya hapkata hiwekletatshinepni Cristo-nune runinipa wale.

²⁴ Waneya wane pnute xye hohne nikawnanu. Cristo nikaxiniplu ptowru hiweklunkaka towutle, ptowru towutatshine towutle, ptowru himukatlu koxa waneya ruru, Hoyakalu pohirewaxyawaka renekanru.

²⁵ Klu tshinanu Cristo hijhalu htowutlewaxyawaka haté ptowruneka hkamnitjene hkatsretanu Hoyakalu.

²⁶ Hapkatatatshri potukni hipuktshi wkamnitjeru. Hoyakalu nikatanru wale.

²⁷ Klu tshinanu Hoyakalu tokanu yonatkaluru wan-tshina: “Hoyakalu ptowru potuko hijixi hpuko rutakanru.” Seyni wimatjemyawaklu wla htshinini ptowru potuko htshinini, hi Hoyakalu kojeru hkochtsheka. Ptowru potuko Cristo reneka Hoyakalu htowuxyawakaplu.

²⁸ Ptowru potuko Cristo renekko htowuxyawakaplu waneya waleko whentshi, Hoyakalu towutlewle hpuko rutajinwa. Xye Cristo ptowru potuko htowuxyawaka renekjerni Hoyakalu. Hiyáhoni Hoyakalu towutanru ptowru potpako.

Hma Miwekkajikowakanumkapna Hipnatshine Piranapni

²⁹ Xawakni nepomhanhi hipnatshinni tshinanu batiza-tkalune pirana tshinanu. Hipnatshinni hi hiwekahotna seyni haklu tshinanhe satkaka yineru batiza-tka hipnatshinni tshinanu?

³⁰ Ha hix-koxa, haklu tshinanhe ptowru hora-ko kyowikowaka wwahohnekanata?

³¹ Cristo tshinanu nmoletanune, ptowru hohneruka hipuktshistsi nwa. Xye ntshinhi nunkakhi. Cristo Jesus Wutsrukate tshinanu nalixkothi.

³² Hewi, Éfeso poktshi, hejnune kmatsyirune nyahotkamka. Hiyáhoni xye niwekle tsonu nkahwajini kluhe repixinno? Hipnatshinetka hikeklu hma miwekkanumkatkana wlamka wtshinanu wuya wnikanu, wuranu klu tshinanu yetshikawa wupnanutka.

³³ Hi yokwijetkalunephi. Klu tshinanu hektutu himatletkaluru himtuklu hixannutshi kihleru.

³⁴ Hsatokanu, hihlepokoxinwa. Hi Hoyakalu tokanu hmajnakowaxini. Klu tshinanu satkaka hi Hoyakalu halukleru rimata. Wane ntshina npatetjexyawakaphi.

Hipnatshri Hixmanexyawakpatka Piranapni

³⁵ Seyni satu hetkoko wla htshinanu: “Hanhe xawaka rixa hipuktshi hiwekkajikaluru? Hiyrun-koxa hanhe rixmanetna wan-hixatshine?”

³⁶ Mimatkat-potukni wale pirana hepomhatshri. Hitataji honra putajinri rupnahapkatanu wan-rixini tsonu ruptshekanu.

³⁷ Hiyrun-koxa putaktatajreru hi hiptshe potuko putajyalu seyni hitatajichani, ho hahosu ho chiji ho satu hixatshri pejnu tatajiko.

³⁸ Seyni Hoyakalu henekmanetlu hitataji hanu pot-raluk-hixkakletlu. Pa neru tataji pejnu waleko himane renekka.

³⁹ Kahituru hi pa hiturutni. Seyni pnuko rixhituta yineru, nikalune pnuko hixhituta, chimane pnuko hixhituta, kochitshine pnuko hixhituta.

⁴⁰ Wanetkalu tenhohne hajeru mantshi sahikaka hiyrun-koxa xye tshiji hajeru manekaka. Seyni tenhohne hajeru mantshi sahikaka hihlenu satuko hiyrun-koxa xye tshiji hajeru manekaka hihlenu satukotkani wale.

⁴¹ Tkatshi pnuko rix-hatnutka, ksuru pnuko rixhatnutatnaka, katahiri hatnu satuko. Haté katahirkaka kakoj-hatnu rixna satkaka.

⁴² Waneko pixka rixanna yine Hoyakalu, hipnatshine riwekkajinipa. Mantshini himat-hijpahatshri kapnatko, hitataji pixka, seyni wale riwekkakko hikeklu hohne mnikawnakatupni.

⁴³ Mantshi kapnatka rumtuknu tshinanu. Seyni riwekkakko kihlepotpaklu. Hiyrun-koxa hihropowatatshri hkapnaxika seyni hixkolu hyotunokajikotka.

⁴⁴ Mantshi xye tshijikni. Hkapnatka seyni riwekkakkoklunpatka Hoyakalu Hiwejikaluru mantshi mixkotatshri tshinanu. Rawa xye tshiji hajeru mantshi hiyáhoni raw-koxa Hoyakalu Hiwejikaluru mantshi mixkotatshri.

⁴⁵ Wane htshina Hoyakalu tokanu yonatkaluru: “Hoyakalu hiyakotlu Adão waleni mitshikananu yineru mantshi hiwekatshri rixyawakapa.” Seyni hapkatatatshri Adão waleni hiwejikaluru hiwekkaklewatatshrini.

⁴⁶ Halikaka mitshikananu hakanhatshri hi hiwekatshrini. Seyni xye tshijneko kamhikolni. Waneya wane pnute rakanhatka hiweklu mnikawnakatu.

⁴⁷ Mitshikananu Adão waleni tshiji hajeru tshiji kamhikolni. Seyni hapkatatatshri Adão waleni Tsru Hixikatshriwa tenhohne hajerni.

⁴⁸ Xye tshijne hajene, xye tshiji kamhikolu pixka rixna. Hiyrun-koxa tenhohne hajene tenhohne hichpajikatshri pixka rixna.

⁴⁹ Hiyáhoni tshiji hajeru pixka wixyahluta hiyahok-koxni Tenhohne Hajeru yáholu pixka wixan-koxa.

Hiwekatshineko Hemanexikowaka Piranapni

⁵⁰ Nmoletanune Cristo tshinanu, xyekni naluka tshinrethi hixa. Hittshi hiyrunu hrahtshi kamhakaluru hi himukata jihlokletlu Hoyakalu pohirewaxyawaka. Hiyrun-koxa himat-nikawnatshri hi renekka hikeklu hohne mnikawnakatu rixyawaka.

⁵¹ Hyijnakpotutanru xye hima yohimakanatkalur-pirana. Hi ptowrunekwu hipnanu seyni hixa ptowrunekwu hemanetko.

⁵² Pchini tsonujiji himruklu pa teyaknuplu hapkat-himpotutatshro kowiklu wan-hixko. Kowi hajpokko waneya hipnakanatatshinetka hiwekanutnaka, hikeklu hohne mnikawnakanpatkani. Ptowrunekwu hemanetanutka.

⁵³ Klu tshinanu mantshi himat-nikawnatshri hijhalu hyochmajyawaklu hikeklu hohne mnikawna menu. Hiyrunu hipnatshripatka hijhalu mimat-hipnakatu hyochmajnawakwa.

⁵⁴ Hiyáhoni himat-nikawnatshri hikeklu hohne mnikawnakatu hyochmakkoklunutka. Hiyrun-koxa himat-hipnatshri mimat-hipnakatu hyochmakkoklunutka, rakanhanutka Hoyakalu tokanu yonatkaluru hiwekkaklewatatshri tshinyawaka: “Hipuktshi nikatkatka. Kayatkaluru psoluko!”

⁵⁵ “Hipuktshi, ha hanurhe pkayleru? Hanurhe ppixkonu yine pumtujinri?

⁵⁶ Hipuktshi mixkowkakatshrini hektuntshi. Hiyrun-koxa hektuntshi mixkowkakatshrini yonruru pirana.”

⁵⁷ Seyni Hoyakalu wimalwutanu, wale honukla ptowru potuko wiknohkakjeru Wutsrukate Jesus Cristo tshinanu!

⁵⁸ Hiyáhoni Cristo tshinanu nmoletanune, poyehi halixlephi. Hi hituk-homkahrekamruretanru Tsru Hixikatshriwa Hoyakalu halujyawaka. Klu tshinanu himatanu Tsru Hixikatshriwa Hoyakalu halukleru kamhatshri hi hmahijerutanu.