1 Coríntios 14 - Bíblia

Hoyakalu Tokanu Hinkakletatshri Potu Hijhakaluru Seyni Pa Nrukaka Himat-yanumaxikatshri Hi Hijhakalur-potu Piranapni

¹ Pimrine hichinijyawak-potu homkahitanu. Hoyakalu henekachalkaka Hiwejikaluruya koxa hikamtu seyni Hoyakalu tokanu hinkaklexyawakapa jmereypotpakhi.

² Klu tshinanu pa nru yanumaxikatshri Hoyakalu Hiwejikaluru pixkonuyma tshinanu hi yine riynumsata seyni Hoyakalu riynumsata. Klu tshinanu hike himatjemlu. Hoyakalu Hiwejikaluru pixkonuyma hyanumaxyalu halikaka pirana yine mimatanutu.

³ Seyni halikak-potu Hoyakalu tokanu hinkakletatshri hyanumaxini jematshine tshinanukni runkaklewata. Tseruwakahchinikanru pirana runkakna. Ruykotna hiyrun-koxa hapnanuhchinikanru pirana runkakna.

⁴ Pa nru yanumaxikatshri, Hoyakalu Hiwejikaluru pixkonu tshinanu wale nanwaka htseruwakahchinikanuxnawa. Seyni Hoyakalu tokanu hinkakletatshri htseruwakahchinikanutna Cristo halixatshine hapatjetatshine.

⁵ Hitamka halukhi hixa ptowrunekhi pa nrukaka hyanumaxyawaka Hoyakalu Hiwejikaluru pixkonu tshinanu. Seyni wane pnute naluklu Hoyakalu tokanu hinkakletatshine hixyawaka. Klu tshinanu Hoyakalu tokanu hinkakletatshri potu hijhakaluru seyni pa nrukaka himat-yanumaxikatshri Hoyakalu Hiwejikaluru pixkonu tshinanu, hi hijhakalur-potni wale pa nrukaka himata yokakatshri mwaknuklunu. Halikaka rawini pa nrukaka yanumaxikatshri tokanu hiphujetatshri htserutahchinikanutna Cristo halixatshine hapatjetatshine.

⁶ Hiyáhoni xawakni hixa napyehixini waneya pa nru nyanumyehixinhi, hanhe xawaka rixa hepixletanhi nma munkakkanuklunhi Hoyakalu hinkajyano pirana ho himatkalewlu pirana Hoyakalu heneklewaxya, ho satu hinkaklu Hoyakalu piranaya, ho satuko hasruklewlu?

⁷ Waneko pixka rixa, yine tokanu mpohijetanhimatu. Hetanru tokluru ho tumleji ho violão. Hanhe xawaka rixa himatjemletluna jematshine klu hima htokatna phujewaka hma tshina tokletkanuklunna?

⁸ Tpohinewaxini kowi seyni tma pohinewpotutkanuklunu katu halpokoxinwa hiylalu hnapu?

⁹ Hix-koxa waneko pixka hixa, phujetanuwak-potuko hma tshina yanumletkanuklunu htokanuya. Kathe himatjemanru hixa htokanu? Halikaka hike mimatjemkanuklunru hixa htokanu, hatatjewa hihimachani.

¹⁰ Hi pejnu himakananru pnu pejnu tshinhimatatshri xye psol-tshijneko hwatshri. Hiyrun-koxa satkaka xye tokantshi hi htshinachata.

¹¹ Seyni hita nmimatjemkanuklunru hanukta htshina niynumsatjeru, waneya pa neruko nkahwaklu. Hit-koxa pa neruko hkahwakanno wale.

¹² Jmerpotuphi henekachalkaka tshinanu Hoyakalu henejyawu walenuko Hiwejikaluruya. Hiyáhoni xawakni hijhapotutanru satkaka henekachalu Cristo halixatshine hapatjetatshine hchinikanu hepixatshri potuko.

¹³ Hiyáhoni katukta pa nru yanumaxini rujhalu Hoyakalu ranjixyawaka rumukata hiphujtalexyawakaplu htokanu htshinakanaxyawaka.

¹⁴ Klu tshinanu pa nru nanjihohnexini Hoyakalu pixkonu tshinanu, halikaka niwejinriymamka nanjihohneta seyni hi nohchinikanuko himatjemlu nanjihohnere.

¹⁵ Hiyáhoni wla nixanu. Niwejinriyma nanjihohnetanu hiyrun-koxa nohchinikanuyma nanjihohnetanu. Nchikalewatanu niwejinriyma hiyrun-koxa nohchinikanuyma nchikalewatanu.

¹⁶ Wane hmixkanuklunu Hoyakalu himalwuxini hiwejinriyma hanhe xawaka rixa hixayma hapatjeretna herone wla htshinyawakapna hehe wane potuko ptshinru xye pirana hma mimatjemkanuklunupluna ptshinakanaxyawaka.

¹⁷ Hehe, himka kamturu Hoyakalu pimalwuxyawaka pa nruya seyni pimrine jematshine hi repixanunna hihchinikanuyna.

¹⁸ Npoyahnutlu Hoyakalu pa nrukaka nyanumaxyawaka hixa ptowrunekhi pnute.

¹⁹ Seyni Cristo halixatshine hapatjetatshine tskalaya nalukmaklu yáholu cinco tokantshi nyanumaxyawaka nohchinikanuyma pimrine nasrujyawaka. Klu tshinanu yahmaklu dez mil tokantshi pnute pa neru tokanu nyanumaxikmaka hi repixlewata.

Pa Nru Hyanumaxyawaka Waleni Hetkaluru Malixkane Tshinanu Piranapni

²⁰ Cristo tshinanu nmoletanune, hi mturune pixka hixanu hihchinikanuya seyni halikaka hektutu hmasatanu. Halikaka hihchinikanuya tsrune hixinwa.

²¹ Wane htshina tokantshi yonatkaluru Hoyakalu henejyawu: Wane htshina Tsru Hixikatshriwa Hoyakalu: “Nyi yine niynumatanu. Niynumatanna pa neru namaya hiyrun-koxa pa nrukakayma nunkakjixinna. Seyni hi wanekluko hyijnakotannona nonerune”, htshina Tsru Hixikatshriwa Hoyakalu.

²² Klu tshinanu pa nrukaka hyanumaxyawaka Hoyakalu pixkonu tshinanu, waleni hetkaluru malixkane tshinanni, hi Cristo halixatshine tshinanni. Seyni Hoyakalu tokanu hinkakletlu, waleni hetkaluru Cristo halixatshine tshinanu, hi malixkane tshinanni.

²³ Satu yapkaklu, Cristo halixatshine hapatjetatshine ptowruneka hapatjexini wannapka waneya ptowruneka pa nru pejnu hyinuwaka yanumlexinipna. Waneya hjihlojinipna herone ho malixkane hi he jipukalerune rikahwakkona?

²⁴ Seyni ptowruneka Hoyakalu tokanu hinkaklexini waneya hjihlokamxinipa satu malixkatu ho herotu, hjemamxiniplu hixa tokanu waneya rimathexinwa muhletu rixyawaka hiyrun-koxa tokantshikaka hjemanru tshinanu hiykotatkalu.

²⁵ Hihchinikanu hichinikanretlerkaka yohimatkaluru ruphujetko. Waneya ruphamtanu Hoyakalu hetanuya, rimalwutanru Hoyakalu. Waneya wane htshinanu: “Halikakni hix-yehi rawa Hoyakalu.”

Kihle Rixpotuxikowaka Hapatjexikowaka Piranapni

²⁶ Cristo tshinanu nmoletanune, xyekni naluka tshinreta. Hixa hapatjexini satkaka waneylu chikaltshi. Satu waneylu hasruklewlu. Satu waneylu hiphujetkaluru Hoyakalu piranaya. Satu waneylu pa nru hyanumaxyawaka Hoyakalu pixkonuyma, raw-koxa himata yokakatshri. Ptowru potuko hkamhanu halixatshine hapatjetatshine repixyawakapa.

²⁷ Satu yineru pa nru hyanumaxini, Hoyakalu pixkonu tshinanu, hepipka yanumatanu. Hi mapa pnute yanumatanu. Satkaka hapka yanumatanu. Waneya satu yokakanru.

²⁸ Seyni yokakatshri mwaknuklunu potshkeplu pa nru yanumpiraxikatshri Cristo halixatshine hapatjexyawakaya. Wale nanwaka tsonu hiynumsaxinwa hiyrun-koxa Hoyakalu riynumatanu.

²⁹ Hiyrun-koxa wan-hixanu, ho hepi ho mapa yine Hoyakalu tokanu hinkakletanu, waneya pimrine hijhahchinikanutanu.

³⁰ Seyni satu yineru wane tuplakanatatshri koxa pa pirana hyoptoxinipa Hoyakaluya hinkaklewakanatatshritshi potshkepa.

³¹ Klu tshinanu hixa ptowrunekhi himukata hinkakletletlu Hoyakalu tokanu hiyáhoni ptowrunekhi hasrukkalunephi hiyrun-koxa hapnanuhchinikankakkalunephi.

³² Hoyakalu tokanu hinkakletatshri runkaklewaxini rimatan-koxa, runkakle hi towutanru seyni halikaka wale towutanru runkaklewle.

³³ Klu tshinanu Hoyakalu hi sejirewnakjixa seyni raluklu kihlepoko rixyawaka. Wan-rixanna ptowruneka Jesus halixatshine potukalune hapatjetatshine hapatjexikowakkakaya.

³⁴ Suxone potshkepa Cristo halixatshine hapatjexikowakkakaya. Klu tshinanu hi ritshitkana hyanumaxyawakna seyni hyijnakotanna. Moisés yonreru wan-tshina suxone hi towutlewatanu.

³⁵ Seyni suxone raluk-himatlexinipluna pa pirana, hipjina wannako hhanurna repomhinna. Klu tshinanu kapatmenro Cristo halixatshine hapatjexikowaka tyanumaxini suxo.

³⁶ Hixaklahe hakaniklu Hoyakalu tokanu? Hi he xawaka hix-yehi rapokachata halikaka Hoyakalu tokanu?

³⁷ Satu yineru Hoyakalu tokanu hinkakletatshri rikahwajinipwa hiyrun-koxa Hoyakalu Hiwejikaluru himwatshri rixahoxinipwa, rimathetanru xye nyonaxyawaka pirana waleni Hoyakalu yokanreru piranni.

³⁸ Seyni satu yineru haluka majnakowlexiniplu xye nyokanre pirana, hike yijnakotan-koxlu wale.

³⁹ Hiyáhoni Cristo tshinanu nmoletanune, jmererunpotuphi Hoyakalu tokanu hinkaklexyawaka. Hiyrun-koxa hike xako himaletanru Hoyakalu pixkonu tshinanu pa nrukaka himat-yanumaxikatshri.

⁴⁰ Ptowru potuko kihlerupni hixa tskalaya hiyrun-koxa hihlepokotkalurutkani.