1 Coríntios 13 - Bíblia

Hichiniklewlu Piranapni

¹ Numukatkamka yine nrukaka ho hiwejikalune Hoyakalu towrerune tenhohne hajene nrukaka nyanumaxinimka seyni nma muchinikkanuklunru nimwastsireru hatatjewa hita ferro chpata ho lata-mta hitpetkaluro pixka nixa tsne, tsne, tsne hixatshro pixka nixachata.

² Hoyakalu tokanu numukata hinkakletletkamka hiyrun-koxa nimatkamkalu ptowru piranako yohimatkaluru pirana hiyrun-koxa ptowru potuko himatkalewlu pirana nimatkamka, hiyrun-koxa nalixle pixkonu tshinanu haté teno mriji numukata yokmanjixleta seyni nma muchinikanretkanukluna nimwastsirene waneya hikepno hita.

³ Yáhomaklu ptowru potuko nimwaleru nenekachaxinna hike mwikane nohluxyawakapmakna ho nomane nenekachaxinna hyoxijikowakapa seyni nimwastsirene nma muchinikkanuklunu hike potuko nkochpaka hita.

⁴ Hanhe rixa hichiniklewlu? Waleni mchiretanutu, kihle hchinikanru. Hi hhahxalewata. Hi htserpiranaxnawa hiyrun-koxa hi ralixkoxnawa.

⁵ Hi hektutu hkamha. Hi walenupka rujha. Hi hjihekanuwhapkakanata. Hi rujhalu hektutu.

⁶ Hichiniklewatatshri hi hektutu tshinanu rumuwata seyni halikak-halikaka pirana himutlu wan-hixatshri.

⁷ Ptowru potuko rakota. Hikeklu rutuk-halixleta. Hoyakalu ralixa ptowruy-potuko. Ptowru potuko rakotachata.

⁸ Hichiniklewlu hi himat-nikawna. Halikaka Hoyakalu tokanu hinkakletlu himat-nikawna. Pa nrukaka hyanumaxyawaka yineru koxa himat-nikawna. Himatkalewlu pirana koxa nikawnanu pa hohne.

⁹ Klu tshinanu wimatkale Hoyakalu henejyatkawu hiyrunu Hoyakalu tokanu wunkakletleru wale hi psolukni.

¹⁰ Seyni rapojinipa hike mmahaxikatu, wale psojitekananu nikawnanu.

¹¹ Mturu nixakanaxini, mturu pixka nixa yanumleta, mturu pixka nixa himatjemleta hiyrun-koxa mturu hchinikanu pixka nixa. Seyni tsru nixinixka mturu hixannu nuchotatka.

¹² Klu tshinanu xawakni hi wuhle hetlepotutlu Hoyakalu hatatjewa hanihapi rexika. Seyni pa hohnepa hihoj-potuko wexinri. Xawakni psotsonu nimata seyni pa hohnepa nimathetpotutanru, wale rixa himathetlexyawakno pixka.

¹³ Xawakni rawa Hoyakalu walixyawaka hiyrunu Hoyakalu wkahwakachaxyawaka hiyrun-koxa pimrine wuchinijyawaka. Xye mapa. Seyni nyi mapa pimrine wuchinijyawaka waleni tsru potuko.