1 Coríntios 11 - Bíblia

¹ Hita yimjetatshinephi hita pixka Cristo yimjetatshrino.

Suxone Halixatshrone Hixjexyawaka Piranapni

² Kihleru ntshinanwakathi klu tshinanu hita hixjexyawaka hichinikjeta hiyrun-koxa nuykoxyahi pirana homkahjexyawaka tshinanu.

³ Naluklu himatjemyawaklu Cristo pirana ptowruneko yokanatatshrini. Hiyrun-koxa jeji suxo yokanatatshrini. Hoyakalu koxa Cristo yokanatatshrini.

⁴ Jeji ranjihohnexini ruchyajiwuxini ho Hoyakalu tokanu runkaklexini hi hkahwakpiratlu Cristo hyokanatjeru.

⁵ Seyni suxo tanjihohnexini Hoyakalu tokanu tunkaklexini tma muchyajiwutkanuklunu, hi tkahwakpiratlu thanuru. Wane tixini chichyajiwutkaluro pixka hixatshroni.

⁶ Suxo tma muchyajiwutkanuklunupa kihlero tchichyatlahixikowaka. Hiyáhoni tipatewaxinri tchichyajiwuxikolu ho tastakjiwuxikolu waneklu tuchyajiwutko.

⁷ Jeji hi rujhalu ruchyaljiwu klu tshinanu Hoyakalu yaholukni wale hiyrun-koxa Hoyakalu hpoyahnuta. Seyni suxo jeji tpoyahnuta.

⁸ Klu tshinanu jeji hi suxo psojite hkamhika seyni suxo halikaka jeji psojite.

⁹ Jeji hi suxo tshinanu hkamhaka seyni suxo halikaka jeji tshinanu tkamhaka.

¹⁰ Hiyáhoni suxo hijhalu tojiwu tuchyaxyawaka tekhixyawaklu thanuru towutle tshijicha hwatshroni, hiwejikalune Hoyakalu towrerune tenhohne hajene hetanu tshinanu.

¹¹ Seyni wiwejinriya Cristo tshinanu hi rawa jeji tsonu, hi koxa twa suxo tsonu seyni ptowruneko hwa.

¹² Klu tshinanu halikakni suxo jeji tuyakaxya seyni jeji koxa suxo matkaklu. Seyni ptowru potuko Hoyakalu hichpajya.

¹³ Hijhahchinikanyehkakanu hixkakluko. Kihle hetkolhe suxo muchyaljiwuto Hoyakalu tanjixini?

¹⁴ Hi he hixako hixannu hasrukhi jeji rojiwuwaxini, mkahwakpiratkotu rixlu rojiwuwle?

¹⁵ Seyni Hoyakalu heneklo suxo tojiwutsa. Tojiwutsa tuchyatjerupa tenekka.

¹⁶ Seyni satu yineru kahwajinri xye pirana npupjexyawaka waneya wla ntshinanru. Hikeni hiyrunuko xye pixkalutu womkahleru hiyrun-koxa Cristo halixatshine Hoyakalu hapatjetanune xyekaka tsonu romkahitna.

Jesus Cristo Hipnale Hichinijikowaka Piranapni

¹⁷ Xyekaka hiykolu nunkajinhi, hi nimalwuthi. Klu tshinanu hixa hapatjeru hkamhini hi repixna hapatjetatshine seyni rumtukna.

¹⁸ Klu tshinanu mitshikananhapka nyijnakotlu Cristo halixatshine hapatjexikowaka hapatjexini, hixa ptohkaka hitspaljexini waneya hima hkamnikakjeta. Hiyrunu xye pirana nalixa psotsonu.

¹⁹ Klu tshinanu rujhaklu hkaniprexikowakna hixkakluko ruphujewniywakapa halikaka pirana homkahitatshine hixa tskalaya.

²⁰ Klu tshinanu hixa hapatjexini, hi Tsru Hixikatshriwa Cristo hipnale hichinijyawaka tshinanu hnika.

²¹ Klu tshinanu satkaka kochtshekhapkatlu hnikanrupa. Waneya pimrine hike nikatka seyni pimrine himetatka.

²² Hi he kapjihi hnijyawaka hiryawaka? Hixlahe heyikna Cristo halixatshine hapatjetatshine Hoyakalunune? Hiyahokni hixa patetjetna hike mwikane hixa tskala hapatjexikatshine. Ha xawakni klu pirana ntshinanhi? Numukathe kihler-pirana ntshinanwakaxyawakhi? Hike, wale pirana tshinanu hi nimalwuthi.

²³ Klu tshinanu walekni Tsru Hixikatshriwa Jesus hinkajya piranno, walekni hix-koxa nunkakanu. Tsru Hixikatshriwa Jesus hkachixikolu yetshnopa, pão hkochtsheka.

²⁴ Hoyakalu hpoyahnuta Jesus waneya hjiknajrotlu pão waneya wane htshina: “Xyekni nomane, hixa tshinanu jiknahkaluru. Xye pixkalutu hkamhajetanu hita hipnale hichinijikowakapa.”

²⁵ Waneya waneko pixka rixlo copa stono, rali niklexinixkana. Wane htshina Jesus: “Twu copa stonha nunkakletleru waleni herotu nohraha piranni. Ptowru katako turiko copa stono wan-hixjetanu hita hipnale hichinijikolupa.”

²⁶ Klu tshinanu ptowru katako xye pão hnijini hiyrunu twu copa stonha hirini, waleni Tsru Hixikatshriwa Jesus hipnale runkakleta haté rapojinpatnaka.

²⁷ Hiyahokni katuktako Tsru Hixikatshriwa Jesus mane muchinikanretkatuko nijiniplu xye pão ho ruriniplo twu copa stonha Tsru Hixikatshriwa Jesus mane hiyrunu wale hraha hmajnakowaxya.

²⁸ Hiyáhoni rujhahchinikanuxinwa satkaka wale nanwaka. Wan-hixatshinhi nikanru xye pão hiyrunu hirinro twu copa stono.

²⁹ Klu tshinanu satu xye pão nijini ho twu copa stonha rurini hma muchinikanretkanuklunru Tsru Hixikatshriwa Jesus mane pirana waneya hnijinri hiyrunu rurinro waleko rapnokaxikolu yaholuni.

³⁰ Wale tshinanukni hixa hixolunhi hyeyixjeta, hihrokjeta hiyrun-koxa satkaka hipnatka.

³¹ Mitshikananhapka wujhahchinikanuxinwa hix-nanuko hi rawanu jikolukanuru Hoyakaluya.

³² Klu tshinanu hikolukanuwnatshinepwu, wapnokatko Tsru Hixikatshriwa Hoyakaluya wma mapnokaxikowakanupa xye psol-tshijneko hajeneya.

³³ Hiyáhoni Cristo tshinanu nmoletanune, hixa hapatjexini Tsru Hixikatshriwa Jesus hipnale hichinikanrexyawaka hkahwakkakanu.

³⁴ Satu yineru natshixinipa, hipjiko hnijini. Hiyáhoni hixa hi hikolukanuwnanu Hoyakaluya hapatjexinipa. Pimri pirankaka wane napojinipa nuhletanu.