1 Coríntios 10 - Bíblia

Israel-nerune Henejikolu Piranapni

¹ Cristo tshinanu nmoletanune, hichinikanru xako hanu rixnixkana ptowrunniko wutsrukatenni Moisés homkahikanatatshinni. Wanna ptowrunniko Hoyakalu hoji hetakanaxinnina hohimkohi hpuko rawakanaxinnina waneklu papkolunni. Hiyrun-koxa Mar powha Serolu hyapamxinnina.

² H-batiza-tkanna wanna ptowrunnika hohimkohiya hiyrun-koxa mar powhaya klu tshinanu Moisés homkahitatshine rixakanaxinnina.

³ Wanna ptowrunnika niklu walerutu nikkaluru Hoyakalu Hiwejikaluru henejyana.

⁴ Wanna ptowruneka hirlu walerutu hirkaluru Hoyakalu Hiwejikaluru henejyana. Klu tshinanu sotlu honneha hiwekkaklewatatshri rurhatna, sotlu rimotsatjerna Cristo.

⁵ Seyni hixpotna Hoyakalu mpoyahonutkane hiyáhoni popriwaka ruylaxikanna wannani. Rupalmankakanna popriwakaya.

⁶ Xye pirana psoluka hakanha hixa rasrujyawaka tshinanu. Ruykotwu wmalujyawakanuplu hektuwaka. Wannani pixka wma mixyawakanapa.

⁷ Hiyrun-koxa hi mayawletshicha kahwakpiratatshinephi, wannani satkakni pixka. Wane htshina Hoyakalu tokanu yonatkaluru mitshikawlur-pirana wannani pirana: “Htuplatna yine. Hnikna, rurna. Waneya hpalnana hahsalu hkamhiywakapna.”

⁸ Hiyrun-koxa hi wapoklewatanu wannani satkakni pixka rapoklewatnina. Wale hkamhiywaka tshinannina vinte três mil yinni hipnana pa hohnepka tshinanu.

⁹ Hiyrun-koxa hi wyahotanru Tsru Hixikatshriwa Cristo hi wkahwakanru wektunu hma mapnokaxyawakanupa satkakni israel-nerunni pixka. Himnune hiylakanna wannani.

¹⁰ Hiyrun-koxa hi hihjekakanu hixa wannani satkakni pixka. Hiyáhoni hiylalewatatshri Hoyakalu yokanreru nikatanna yinni.

¹¹ Xyekaka hakanhayehitnina wutsrukatenni yapkaklu rixyawakapa pimrine tshinanupa. Hiyrun-koxa hixa ruykoxyawakapa tshinanu hyonatka walekaka pirana. Klu tshinanu wiwekle hmahle hohnestsi hwatshritkani.

¹² Hiyáhoni poyehi yopkakle hixahoxikatshriwa ruslahinwa hma yawniywakanupa.

¹³ Yahotaletlukaka hix-yehi hwatshri pimrine yahotjeru pixka potuko rixa. Seyni Hoyakalu htshinyawak-potuko hkamha. Hiyáhoni hi retachayehitanhi hma makoxyawakanu pnute hma mixyawakanupa yahtaletlewlu. Seyni yahtaletlewluko repixinhi hiknohyawakaplu hixa himukata hakotlexyawakaplu.

Mayawletshicha Kahwakpiraxikolu Hasujikolu Piranapni

¹⁴ Hiyáhoni nuchinikanune Cristo tshinanu, hasujinri mayawletshicha kahwakpiraxikolu.

¹⁵ Niynumathi kahchinikanurune pixka. Hixako hijhahchinikanutanu ho halikaklahe ntshinyawaka ho hike.

¹⁶ Copa stono hwatshri wurrerha pirana wuchinijyalu Jesus hipnale hixa tshinanu, wuhlewahchinikanutjeru wpoyahnuthaleru pirana. Xye copa stonha wurini, hi he xawaka Cristo hraha wapikka? Hiyrun-koxa pão wjiknajroxinri wnijinri, hi he Cristo mane wapijikolukatkani wale?

¹⁷ Klu tshinanu hixwu pão nikatshinwu. Seyni wale pão satupkalu, walerutu pão wnika. Hiyáhoni hixa hixolunwu pa manepkawu.

¹⁸ Judeu-nerune pirana hichinikanretanu. Henekachalu hiylaxikolu nikatshine hi he wannan-koxatkani henekachalu?

¹⁹ Klu piranhe naluka tshinreta xyekaka yapkaklu piranayma? Hixlahe kahwaklu wla ntshinyawaka kahwakpiratkalurni mayawletshichakaka ho hijhakalurni nikkaluru mayawletshicha renekachaxikowaka wanerhe htshinahotno?

²⁰ Hi koxa wane ntshina hasruklethi. Halikaka xyekni ntshina. Kluneruktako nikalu renekka mayawletshicha hiylatkalurupa tshinanu, kamtshine renekka hi Hoyakalu renekka. Hi nalukhi hixa kamtshineyma htsaklawniywaka.

²¹ Hixa hi himukata hirrexyalu hepi hirapi Wutsrukate Cristo tshinanu hiyrun-koxa kamtshi tshinanu. Hiyrun-koxa hixa hi himukata niklexyalu hepi nikawaka Cristo pão nikawakle hiyrun-koxa kamtshine nikawakleya tshinanu.

²² Ho whahxakajerhe Tsru Hixikatshriwa Hoyakalu? Hixlahe kahwajnawa Hoyakalu yohnik-mixkonu hixyawaka?

Hektuwaka Wuchoxyawaka Tshinanu Hiyáhoni Wuchinikkajyawaka Piranapni

²³ Satkaka yineru wan-tshina: “Ptowru walukanru wumukata kamhaleta.” Hehemka seyni hi ptowruka wkamhapiratanru kihlerni. “Wumukata kamhaletlu ptowru waluka kamhaletanru,” htshina satkaka yineru. Seyni satuko wkamhapiratanru hi ptowruko tseruwnakaklewata.

²⁴ Hi satukna hijhanru kihleru walenupka tshinanu tsonu seyni pimrine tshinan-koxa halikaka rujhanru.

²⁵ Ptowru nikkaluru hichankajexikowaka hanjixinri hnikanru, hike rixa. Hi hkojwakahchinikanutanu.

²⁶ Klu tshinanu Hoyakalu tokanu mitshikawlur-pirana wan-tshina: “Tsru Hixikatshriwa Hoyakalunni xye psol-tshijneko hiyrun-koxa ptowru potukananuko tshiji hajeru walenukni.”

²⁷ Hiyáhoni satu yineru malixkatu tshanixiniphi himinjiywaklu halujinipa wane hyanu. Ptowru henejikolu hnikanu, hike rixa. Hihchinikanu tshinanu hi hepomhanna hanu ruchpajyatka nikalu.

²⁸ Seyni satu wane tshininiphi: “Xye nikalni mayawletshicha henekalurni” htshininipa, hi hnikanru hinkaklewatatshri tshinanu, hiyrun-koxa hma kojwakahchinikanuxyawakanupa tshinanu.

²⁹ Hi hixako hihchinikanu tshinanni seyni hinkaklewatatshri hchinikanu tshinanu. Pa katako satuko hepomhinwa: “Haklu tshinanhe satu yineru hchinikanu himaletno nma kamhiywakanru nmimalexikotu?”

³⁰ Hiyrun-koxa wane htshina: “Hoyakalu npoyahnuxini nikkaluru tshinanu, kluneru tshinanhe napatko npoyahnutanrutka tshinanu?”

³¹ Hiyáhoni hnijini, hirini, kluneruktako hkamhini, ptowru potuko hkamhanu Hoyakalu himalwuxikolu tshinanu.

³² Hike hkamha rumtukahchinikanutjerupna judeu-ne, judeu mixkane koxa, hi Hoyakalu homkahitatshine hapatjetatshineko.

³³ Hita pixka hixanu. Naluklu ptowruko nkamhaleru ptowruneka hpoyaho hichinikanuwkaklexyawakapa. Hi hitapka nepixjeru nujha seyni ptowru neruka hepixjerupa nujha, rumukata hiwekkaklexikowakapna.