Zozuwe 7 - WẼNNAAM SEBRE 2014

A Akã beegr ne a sɩbgre

¹ La wakat-kãnga, Israyɛll nebã beega Wẽnnaam, n sɩɩs bũmb ning sẽn kisã: A Zeera biig a Zabdi biig a Karmi biig a Akã sẽn yaa Zʋʋda buudã nedã yãka teed nins sẽn yaa kisgã, la Sẽn-Ka-Saab sũur puuga ne Israyɛll nebã.

² A Zozoe zĩnda Zeeriko n tʋm neb tɩ b kẽng Ayi sẽn pẽ ne Bɛt Avɛn sẽn be Betɛll tẽngã yaangã. A yeel-b lame yaa: «Kẽng-y n tɩ soos-y n ges-y tẽngã.» La bãmb kẽng n tɩ gesa Ayi,

³ n lebg n wa a Zozoe nengẽ n yeel-a yaa: «Ka tɩlɛ tɩ tãb-biisã fãa kẽng Ayi ye. Neb tus a yi, wall tus a tãab bal tõe n tõoga Ayi. Da nams-y nebã fãa zab-kãngã yĩng ye. Ayi tẽngã nebã sõor ka waoog ye.»

⁴ Dẽ, yɩɩ neb tus a tãab n yi Israyɛll nebã sʋk n na n tɩ zab ne Ayi nebã, la Ayi rãmbã riga Israyɛll nebã tɩ b zoe.

⁵ Ayi rãmbã kʋʋ Israyɛll neb sẽn kolg pis-tã la a yoobe. Bãmb diga Israyɛll nebã sẽn sɩng ne tẽngã noor n tɩ ta Sebarim. La yaa tãngã sigdgẽ la b kʋ Israyɛll nebã. Rabeem yõka Israyɛll nebã tɩ b gĩinã maage.

⁶ A Zozoe sũurã sãamame t'a kẽes a futu, n wõgemd n fõgen a neng tẽng Sẽn-Ka-Saab kaoolã koglgã taoor n pa be tɩ ta zaabre, yẽnda ne Israyɛll kãsem-dãmbã. La b yuga b zut tom.

⁷ A Zozoe yeelame yaa: «Kayto, m Zu-soab a Wẽnnaam, yaa bõe tɩ yãmb tall y nebã n dʋʋg Zʋrdẽ kʋɩlgã, n yaool n na n bas tɩ Amoor-dãmbã sãam-do? Tõnd sã n dag n yãkẽ yam n paẽ kʋɩlgã rʋʋnd n são.

⁸ Mam Zu-soaba, Israyɛll bɛɛbã sẽn dig-b tɩ b zoe wã, mam na n yeelame tɩ bõe moasã?

⁹ Kana nebã ne tẽngã neb a taabã sã n wʋm yõwã, b na n yik n gũbga tõndo, n kɩt tɩ tõnd yʋʋrã menem dũniyã zugu. Wakat-kãngã, yãmb na n maana bõe tɩ b bãng tɩ y yʋʋrã yaa kãsenga?»

¹⁰ Wẽnnaam yeela a Zozoe yaa: «Yiki! Yaa bõe tɩ f fõgend f neng tẽnga?

¹¹ Israyɛll nebã beegame. Bãmb sãama kaool ning mam sẽn dag n maan ne bãmbã. Bãmb yãka bũmb ning sẽn yaa kisgã. B zuk-a lame n solge, b bĩng-a-la b teedã pʋga.

¹² Rẽ wã yĩnga, Israyɛll nebã kõn tol n tõog n yals n zab ne b bɛɛbã ye. Bãmb bɛɛbã na n dig-b lame tɩ b zoe, bala kãab-wẽngã bee b zutu. Yãmb sã n ka menes bũmb ning sẽn yaa kisgã yãmb sʋka, mam ka na n leb n zĩnd yãmb sʋk ye.

¹³ Yik n yɩlg nebã la f yeel-b tɩ b maneg b mense, n yɩ yɩlma beoog yibeoogo, bala, Sẽn-Ka-Saab sẽn yaa Israyɛll Wẽnnaamã yetame: Israyɛll nebã, bũmb ning sẽn kisã bee yãmb sʋka. Yãmb sã n ka yiis bũmb ning sẽn kisã yãmb sʋka, yãmb kõn tol n tõog n yals y bɛɛb taoor ye.

¹⁴ Rẽ wã, beoog yibeoogo, yãmb na n waa mam nengẽ buud-buudu, la Sẽn-Ka-Saab sã n wilg sẽn yaa buud ninga, bɩ bu-kãng rãmb kolg roog-roogo, la roog ning Sẽn-Ka-Saab sẽn yãkã na n kolga zak-zaka, tɩ zak ning Sẽn-Ka-Saab sẽn yãkã neb wa yembr-yembre.

¹⁵ La b sẽn na n yãk ned ning n wilg tɩ yaa yẽnda n wa ne kãab-wẽngã, b na n yõog-a-la bugum, yẽnda ne bũmb nins fãa a sẽn so wã. Bala, a kɩɩsa kaool ning Sẽn-Ka-Saab sẽn kãabã, n maan sẽn kisi, n wa ne yell Israyɛll zugu.»

¹⁶ A Zozoe sãda yibeoog pĩnda, n kɩt tɩ Israyɛll nebã kolg buud-buudu. La b yãka a Zʋʋda buudã.

¹⁷ Dẽ, a kɩtame tɩ Zʋʋda buudã kolg roog-roogo. La b yãka a Zeera roogã. Rẽ poore, a kɩtame t'a Zeera roogã zak fãa kolge. Dẽ, b yãka a Zabdi zakã.

¹⁸ B kɩtame t'a Zabdi zakã rãmb kolg yembr-yembre, la poeerã yõka a Akã sẽn yaa Zʋʋda buudã nedã. A Akã yaa a Zeera biig a Zabdi biig a Karmi biigã.

¹⁹ A Zozoe yeela a Akã yaa: «M biiga, zoe Sẽn-Ka-Saab sẽn yaa Israyɛll Wẽnnaamã la f togs sɩda. Togs maam fo sẽn maan bũmb ninga, la f ra solg maam ye.»

²⁰ A Akã leoka a Zozoe n yeele: «Yaa sɩda, yaa maam n beeg Sẽn-Ka-Saab sẽn yaa Israyɛll Wẽnnaamã. Ad bũmb ning mam sẽn maanã:

²¹ Mam gesa te-zɛɛdmã pʋga, n yãnd Mezopotami kobr sẽn yaa neer wʋsgo, n paas ne wanzuri ligd kobs-yi, ne sãnem-giulg sẽn kolg kɩlo a yembre. B bõnã yõka maam wʋsgo, la m dɩk-b lame. B bee bok pʋga, mam fu-roogẽ wã, tɩ wanzuri wã be tẽngre.»

²² A Zozoe tʋma neb tɩ b zoe n kẽng fu-roogẽ wã. La b tɩ mika teedã sẽn solg beenẽ, tɩ wanzuri wã be tẽngre.

²³ Bãmb dɩka te-kãens fãa n yi fu-roogẽ wã n tall n wa a Zozoe ne Israyɛll nebã fãa nengẽ, la b rʋʋga teedã Sẽn-Ka-Saab taoore.

²⁴ A Zozoe kɩtame tɩ b yõk a Zeera biig a Akã, la b wʋk wanzuri wã, la kobrã ne sãnem giulgã, la b yõg yẽnda kom-dibli wã ne a kom-pugli wã, la a niigã, ne a bõensã, n paas a rũm-bãoonegã ne a fu-roogã, la a sẽn so wã fãa. La Israyɛll nebã naaga a Zozoe tɩ b tall-b n kẽng Akoor tãngã longẽ.

²⁵ A Zozoe yeela a Akã yaa: «Gese, fo kɩtame tɩ tõnd paam toogo! Sẽn-Ka-Saab na n kɩtame tɩ fo me paam toog rũndã.» Dẽ, Israyɛll nebã fãa loba bãmb kug tɩ b ki. La b yõoga bãmb bugum, la b lob bãmb kuga.

²⁶ La b wʋka kug n zam a Akã zugu, la kug-rʋrã ket n beeme hal tɩ ta rũndã. Dẽ, Sẽn-Ka-Saab sũur sigame. Yaa rẽnda yĩng n kɩt tɩ b ket n boond zĩ-kãng tɩ Akoore, sẽn dat n togs tɩ ‹toog tãn-long› hal tɩ ta rũndã.