Zozuwe 6 - WẼNNAAM SEBRE 2014

Israyɛll nebã tõoga Zeeriko tẽngã

¹ Israyɛll nebã yĩng kɩtame tɩ Zeeriko nebã pag b tẽngã kʋɩlems sõama. Ned ka yita, la ned ka kẽed me ye.

² Sẽn-Ka-Saab yeela a Zozoe yaa: «Gese, mam ningda Zeeriko ne a rĩmã ne a gãndaadã fãa fo nugẽ.

³ Foom ne f tãb-biisã na n gilga tẽngã vugr daar fãa hal tɩ ta rasem a yoobe.

⁴ Gilgrã wakate, bɩ maan-kʋʋdb a yopoe zã bard a yopoe sẽn maan ne pe-raad yɩɩla, n lʋɩ kaoolã koglgã taoore. Rasem a yopoe wã daare, bɩ y gilg tẽngã naoor a yopoe, tɩ maan-kʋʋdbã peeb bardã.

⁵ La yãmb sã n wʋm baorgã peebg rãamde, bɩ nebã fãa zẽk b koees n kaas ne koe-kãsenga. La wakat-kãng bala, tẽngã lalg na n sirgame n lʋɩ a toore, la ned kam fãa na n kell n tũu zĩig ning a sẽn beẽ wã n kẽ.»

⁶ A Nun biig a Zozoe boola maan-kʋʋdbã n yeel-b yaa: «Bɩ y tʋk kaoolã koglgã, tɩ maan-kʋʋdb a yopoe zã bard a yopoe sẽn maan ne pe-raad yɩɩla, n lʋɩ Sẽn-Ka-Saab kaoolã koglgã taoore.»

⁷ Dẽ, a Zozoe yeela nebã yaa: «Kẽng-y-yã, gilg-y tẽngã, la bɩ tãb-biis nins sẽn tog n lʋɩ taoorã lʋɩ Sẽn-Ka-Saab kaoolã koglg taoore.»

⁸ B maana bũmbã fãa wa a Zozoe sẽn yeel tɩ b maanã: Maan-kʋʋdb a yopoe wã sẽn dag n zãad bard a yopoe sẽn maan ne pe-raad yɩɩlã lʋɩɩ Sẽn-Ka-Saab kaoolã koglgã taoor n kẽnd la b peebd bardã.

⁹ Tãb-biis nins sẽn tog n lʋɩ-b taoorã rag n bee maan-kʋʋdb nins sẽn peebd bardã taoore, tɩ tãb-biis nins sẽn tog n pa poorẽ wã pʋgd kaoolã koglgã. La nebã rag n tũuda bardã peebg n kẽnda.

¹⁰ A Zozoe rag n yeela nebã a woto: «Da kaas-y ye, la ra zẽk-y y koɛɛg tɩ ned wʋm ye, la da sak-y tɩ gomd ba a yembr yi yãmb noorẽ ye, hal tɩ ta daar ning mam sẽn na n yeel yãmb tɩ y zẽk y koees n kaasã, tɩ y yaool n kaase.»

¹¹ B talla Sẽn-Ka-Saab kaoolã koglg n gilg tẽngã, b gilg-a-la vugr n sege, la b lebg n leb sikã zĩigẽ n tɩ gãand yʋn-kãnga.

¹² A Zozoe sãda beoogo, la maan-kʋʋdbã tʋka Sẽn-Ka-Saab kaoolã koglgã.

¹³ Maan-kʋʋdb a yopoe wã sẽn zãad bard a yopoe sẽn maan ne pe-raad yɩɩl n be Sẽn-Ka-Saab kaoolã koglg taoorã sɩnga kẽna, la b peebd bardã. Tãb-biis nins sẽn tog n be taoorã lʋɩ bãmb taoore, tɩ tãb-biis nins sẽn tog n pa poorẽ wã pʋgd Sẽn-Ka-Saab kaoolã koglgo. Bardã rag n peebdame tɩ nebã kẽnda.

¹⁴ Rasem a yiibã daare, b gilga tẽngã vugr bala, la b lebg n leb sik zĩigẽ wã. B maana a woto rasem a yoobã tõre.

¹⁵ La rasem a yopoe wã daare, b sãda beoogo, n gilg tẽngã wa b sẽn sɩng n maandẽ wã, n gilg-a naoor a yopoe n sege. Yaa badaar bal la b gilg tẽngã naoor a yopoe.

¹⁶ La gilgr a yopoe soabã sẽn pidi, maan-kʋʋdbã peeba bardã, la a Zozoe yeela nebã: «Kaas-y zabr kaasgo, bala, Sẽn-Ka-Saab kõo yãmb tẽngã.

¹⁷ Tẽngã ne bũmb nins fãa sẽn be a pʋgẽ wã yaa Sẽn-Ka-Saab n so, la b segd n sãam-b lame. Yaa pʋg-yoodr a Rahaab ne neb nins sẽn be yẽnda roogẽ wã bal n na n põse. Bala, yẽnda solga neb nins tõnd sẽn dag n tʋmã.

¹⁸ La bɩ ned kam fãa gũus n da sɩɩs bũmb ning b sẽn segd n sãamã ye, tɩ b sẽn segd n sãam-bã, bɩ ned da rɩk b bũmb ye. Ned sã n maan woto, a na n waa ne kãab-wẽng ne zũnglug Israyɛll tãb-biisã zugu.

¹⁹ La wanzuri wã ne sãnemã, la bũmb nins fãa sẽn maan ne zũudu, la kutã fãa yaa Sẽn-Ka-Saab n so. B tog n naag-b-la Sẽn-Ka-Saab laog bĩngr zĩigẽ.»

²⁰ Bardã sẽn peebã, nebã kaasa zabr kaasgo. Nebã sẽn wʋm bardã peebgã, b kaasa ne pãnga, la lalgã lʋɩ a toor bala, la nebã wudg n kẽe tẽngã. Ned kam fãa kell n tũ a sẽn dag n be zĩig ningã n kẽ. La b reega tẽngã.

²¹ Bãmb sãama bũmb nins fãa sẽn dag n be tẽngã pʋgã. Bãmb kʋʋ raopã, pagbã, kambã la nin-kẽembã, la b kʋ niigã, piisã la bõensã fãa ne zabr sʋʋga.

A Zozoe basa a Rahaab n ka kʋ ye

²² A Zozoe rag n yeela neb a yiib nins sẽn tɩ gũus tẽngã yaa: «Kẽng-y pʋg-yoodrã roogẽ n tɩ yiis-a ne bũmb nins yẽnda sẽn so wã, wa yãmb sẽn dag n pʋlem ne yẽnda to-to wã.»

²³ Dẽ, kom-bɩɩs a yiibã sẽn dag n tɩ gũus tẽngã kẽng n tɩ yiisa a Rahaabe, a ba wã, a ma wã ne a kẽem dãmbã ne a yaopã la bũmb nins fãa yẽnda sẽn so wã. La b yiisa a Rahaab roagdbã fãa, n tall-b n zãag ne Israyɛll nebã tãb-biisã zĩiga, tɩ bũmb ka tõe n maan-b ye.

²⁴ B yõoga tẽngã bugum ne bũmb nins fãa sẽn dag n be a pʋgẽ wã. Yaa wanzuri wã, sãnemã la bũmb nins sẽn maan ne zũudu, la kutã bal la b tall n tɩ ning Sẽn-Ka-Saab laogã bĩngr zĩigẽ.

²⁵ La pʋg-yoodr a Rahaab ne a buudã, ne neb nins sẽn yaa yẽnda nebã, a Zozoe bas-b lame n ka kʋ ye. La a Rahaab kell n paa ne Israyɛll nebã n tãag rũndã. Yẽnda sẽn dag n solg neb nins a Zozoe sẽn dag n tʋm tɩ b tɩ gũus Zeeriko tẽngã yĩnga.

²⁶ Wakat-kãnga, a Zozoe kãabame n yeele: «Bɩ Sẽn-Ka-Saab kãab-wẽng zĩnd ned ning sẽn na n bao tɩ lebs n me Zeeriko tẽngã zugu. Tẽngã lalg yẽbgre, a pipi bi-riblã na n kiime, la tẽngã kʋɩlems ningr wakat na n yɩ a bɩ-yao-zʋʋgã kũum.»

²⁷ Sẽn-Ka-Saab rag n bee ne a Zozoe, n kɩtdẽ t'a yʋʋrã saagd tẽngã fãa.