Zozuwe 22 - WẼNNAAM SEBRE 2014

B mee tẽn-kugr Zʋrdẽ kʋɩlgã noore

¹ Dẽ, a Zozoe boola Rubɛn buudã, Gaad buudã ne Manaase buudã pʋɩ-sʋkã n tigme.

² A Zozoe yeel-b lame yaa: «Yãmb sak n maana bũmb nins fãa Sẽn-Ka-Saab tʋmtʋmd a Moyiis sẽn dag n yeel yãmb tɩ y maanã, la y sak n maan bũmb nins fãa mam sẽn yeel yãmbã.

³ Hal daar zãr tɩ ta rũndã, yãmb ka tol n bas y ba-biisã ye. Yãmb saka Sẽn-Ka-Saab sẽn yaa yãmb Wẽnnaamã sẽn yeel yãmb tɩ y maan bũmb ningã.

⁴ Dẽ wã, Sẽn-Ka-Saab sẽn yaa yãmb Wẽnnaamã sẽn sõng yãmb ba-biisã tɩ b zĩ ne bãan wa bãmb sẽn dag n kãab bãmbã, moasã, bɩ y lebg n kuil y tẽngẽ wã. Kẽng-y n tɩ zĩnd-y tẽng ning Sẽn-Ka-Saab tʋmtʋmd a Moyiis sẽn dag n kõ yãmb Zʋrdẽ kʋɩlgã rʋʋndã.

⁵ La bũmb sẽn be bala, modg-y n sak-y noy ninsi, la tõod nins fãa Sẽn-Ka-Saab tʋmtʋmd a Moyiis sẽn dag n wilg yãmbã. B yeelame yaa: Nong-y Sẽn-Ka-Saab sẽn yaa yãmb Wẽnnaamã, la y tũ bãmb soayã neere, n sak bãmb tõodã, la y mobg bãmba, la y tʋm bãmb yĩng ne y sũyã fãa, ne y yamã fãa.»

⁶ A Zozoe ninga bãmb bark n yeel-b tɩ b kuili, la b kuila b yiyã.

⁷ A Moyiis rag n kõ a Manaase buudã pʋɩ-sʋkã zĩig Basan soolmã pʋg tɩ b sooge, la a Zozoe kõo pʋɩ-sʋk ning sẽn ketã zĩig sẽn be Zʋrdẽ kʋɩlgã rʋʋndã nin-taoore, n yegl b saam-biisã. A Zozoe sẽn yeel-b tɩ b kuilã, a ning-b-la barka,

⁸ n yeel-b yaa: «Lebg-y n kuil-y y tẽngẽ wã ne arzegs wʋsgo, ne rũmsi wʋsgo, ne wanzuri, ne sãnem, ne zũudu, ne kutu la ne futu. Rɩk-y laog ning yãmb sẽn wʋk y bɛɛbã nengẽ wã n pʋɩ ne y saam-biisã.»

⁹ Rubɛn nebã ne Gaad nebã la Manaase buudã pʋɩ-sʋkã basa Israyɛll nebã Sɩlo sẽn be Kana soolmẽ wã n lebg n leb Galaad soolmẽ wã, tẽng ning Sẽn-Ka-Saab sẽn dag n gom ne a Moyiis t'a kõ-b tɩ b soogã.

¹⁰ Rubɛn nebã ne Gaad nebã la Manaase buudã pʋɩ-sʋkã sẽn wa n ta Zʋrdẽ soolmã sẽn yaa Kana-rãmbã soolmã, bãmb mee tẽn-kug-kẽeng beenẽ, Zʋrdẽ kʋɩlgã noore.

¹¹ Israyɛll nebã wʋmame tɩ b gomd tɩ Rubɛn nebã ne Gaad nebã, la Manaase buudã pʋɩ-sʋkã mee tẽn-kugr n tees Kana-rãmbã tẽngẽ Zʋrdẽ soolmã pʋga, kɩreng ning Israyɛll nebã sẽn beẽ wã.

¹² Israyɛll nebã sẽn wʋm woto, Israyɛll nebã fãa tigma taab Sɩlo n na n tɩ zab ne-ba.

¹³ Israyɛll nebã tʋma maan-kʋʋd a Eleyazaar biig a Fineyaas Rubɛn nebã ne Gaad nebã la Manaase buud pʋɩ-sʋkã nengẽ,

¹⁴ la buudã nanambs piig n tũ yẽnda. Israyɛll buudã roog fãa yaa naab a yembre, bãmb fãa yaa nanambse, n be b buudã pʋga, Israyɛll neb kʋʋngã sʋka.

¹⁵ Bãmb kẽnga Rubɛn nebã ne Gaad nebã la Manaase buud pʋɩ-sʋkã nengẽ n tɩ yeel-b yaa:

¹⁶ «Ade, Sẽn-Ka-Saab nebã fãa sokdame yaa: Bõe yĩng tɩ yãmb beeg Sẽn-Ka-Saab sẽn yaa Israyɛll Wẽnnaamã a woto. Yãmb wẽnemd n basa Sẽn-Ka-Saab n maan tẽn-kugr y mens yĩnga, n wẽnemd n bas Sẽn-Ka-Saab rũndã?

¹⁷ Tõnd beegrã d sẽn maan Pewoorã nan yaa bilf d yĩnga, tɩ d yaool nan ka yɩlg d mens n sɛ hal tɩ ta rũndã ye, la sɩbgrã sẽn leb n paam tõnd sẽn yaa Wẽnnaam nebã!

¹⁸ Yãmb sã n yik n bas Sẽn-Ka-Saab rũndã, yãmb sã n kɩɩs Sẽn-Ka-Saabo, beoogo, bãmb sũurã na n yika ne Israyɛll nebã fãa.

¹⁹ Yãmb sã n mikame tɩ b sẽn kõ yãmb tẽng ningã rẽgmame, bɩ y yi n kẽng Sẽn-Ka-Saab tẽngẽ wã, zĩig ning Sẽn-Ka-Saab belmã sẽn beẽ wã, n paam zĩig tõnd sʋk n zĩndi. La y ra kɩɩs Sẽn-Ka-Saabo, la y ra welg y mens ne tõndo, n maan tẽn-kugr y mens yĩnga, n paas Sẽn-Ka-Saab sẽn yaa tõnd Wẽnnaamã tẽn-kugr ye.

²⁰ A Zerak biig a Akã sẽn dag n maan yel-wẽnd n beeg Sẽn-Ka-Saabo, yɩɩ Israyɛll nebã fãa n kẽ kongr pʋga, tɩ Sẽn-Ka-Saab sũur puugi. La ka yɩ yẽnda a yembr n ki a beegrã yĩng ye.»

²¹ Rubɛn nebã ne Gaad nebã la Manaase buudã pʋɩ-sʋkã leoka Israyɛll nin-buiidã nanambs n yeel-b yaa:

²² «Wẽnnaam Sẽn-Ka-Saabã, Wẽnnaam Sẽn-Ka-Saabã n mi tõnd sẽn maan a woto wã võore! La Israyɛll nebã me na n bãnga a võore! Sã n yaa kɩɩsg yĩng la tõnd sẽn maan woto wã, sã n yaa sẽn na n maan sẽn ka zems Sẽn-Ka-Saab nifẽ, bɩ b ra fãag tõnd rũndã ye!

²³ Tõnd sẽn me tẽn-kugrã sã n yaa tɩ tõnd dat n wẽnemd n basa Sẽn-Ka-Saabo, la sã n yaa tɩ tõnd maana maand sẽn yõogd bugum a zugu, n wa ne bõn-koaadl kũun a zugu, la d sã n maana zems-n-taar maand a zugu, bɩ Sẽn-Ka-Saab sɩbg tõnd rẽ yĩnga.

²⁴ La yellã ka woto ye. Sɩdã, tõnd sẽn maan woto wã yaa tɩ rabeem n yõk-do. Tõnd tagsame tɩ yãmb kambã na n wa yeela tõnd kambã nindaar sẽn wate: Bõe lagem-n-taar n be yãmb ne Sẽn-Ka-Saab sẽn yaa Israyɛll Wẽnnaamã sʋka?

²⁵ Sẽn-Ka-Saab ninga Zʋrdẽ kʋɩlgã tɩ yɩ toadg tõnd ne yãmb sẽn yaa Rubɛn nebã ne Gaad nebã sʋka. Dẽ wã, yãmb ka tar lagem-n-taar ne Sẽn-Ka-Saab ye! Rẽ tõe n kɩtame tɩ yãmb kambã yel-manesem kɩt tɩ tõnd kambã ka zoe Sẽn-Ka-Saab rabeem ye.

²⁶ Dẽ, tõnd yeela d mens yaa: Wa-y tɩ d me tẽn-kugri, la ka sẽn na n maan maoong sẽn yõogd bugum wall d maan maoong a to a zug ye.

²⁷ La yaa sẽn na n yɩ kaset tõnd ne yãmb sʋka, la a yɩ kaset tõnd yagensã ne yãmb yagensã sʋk tõnd loogr zugẽ. Sẽn wilgd tɩ tõnd naaga taaba, n maan maand sẽn yõogd bugum la zems-n-taar maando, ne maand a taaba, n waoogd Sẽn-Ka-Saabo, tɩ yãmb kambã ra wa yeel tõnd kambã tɩ b ka tar lagem-n-taar ne Sẽn-Ka-Saab ye!

²⁸ Tõnd yeelame: Gomd a woto buud sã n wa zĩnd tõnd sʋka, wall tõnd yagensã sʋka, tõnd na n leok-b lame yaa: Bɩ y ges Sẽn-Ka-Saab tẽn-kugrã mamsgã tõnd yaab-rãmbã sẽn dag n maanã. B ka maan-a maoong sẽn yõogd bugum wall maand a taab yĩng ye, la b maan-a lame t'a tõe n yɩ kaset tõnd ne yãmb sʋka.

²⁹ Dẽ wã, tõnd sã n tagsd n dat n kɩɩs Sẽn-Ka-Saabo wall d sã n dat n wẽnemd n bas bãmb rũndã n maan tẽn-kugr n maan maand sẽn yõogd bugum a zugu, wall d maan bõn-koaadl kũun maoongo, bɩ maand a taaba, n paas Sẽn-Ka-Saab sẽn yaa tõnd Wẽnnaamã tẽn-kugr sẽn be bãmb sɛk roogã noorã, yõwã yaa yel-beedo!»

³⁰ Maan-kʋʋd a Fineyaas ne Israyɛll nebã nanambsã la Israyɛll nin-buiidã taoor dãmbã sẽn dag n yas ne yẽnda wã sẽn wʋm goam nins fãa Rubɛn nebã ne Gaad nebã la Manaase buudã pʋɩ-sʋkã sẽn gomã, b sũyã yɩɩ noogo.

³¹ Maan-kʋʋd a Eleyazaar biig a Fineyaas yeela Rubɛn nebã ne Gaad nebã la Manaase buudã pʋɩ-sʋkã yaa: «Moasã, tõnd miime tɩ Sẽn-Ka-Saab bee ne tõndo, yãmb sẽn ka beeg bãmb wa tõnd sẽn dag n tẽedã yĩnga. Yãmb sẽn maan woto wã, yãmb fãaga Israyɛll nebã ne Sẽn-Ka-Saab sɩbgrã.»

³² Maan-kʋʋd a Eleyazaar biig a Fineyaas ne nanambsã yii Rubɛn nebã ne Gaad nebã nengẽ Galaad tẽnga, n lebg n wa Israyɛll nebã nengẽ Kana tẽnga, n wa togs-b bũmbã fãa sẽn yɩ to-to.

³³ Israyɛll nebã sẽn wʋm bõn-kãense, b sũyã yɩɩ noogo, la b pẽga Wẽnnaam. La bãmb ka leb n gom tɩ b na n kẽnga Rubɛn nebã ne Gaad nebã tẽngẽ n tɩ zab ne-b ye.

³⁴ Rubɛn nebã ne Gaad nebã pʋda tẽn-kugrã yʋʋr tɩ: «A kaseto.» Bala, tẽn-kugrã yaa kaset tõnd fãa yĩnga, n wilgdẽ tɩ Sẽn-Ka-Saab yaa Wẽnnaam.