Zeremi 6 - WẼNNAAM SEBRE 2014

Toog n wat Zeruzalɛm zugu

¹ Benzame buudu, zoe-y n yi-y Zeruzalɛm! Tɩ bao-y zĩig n soonde! Peeb-y baorg Tekoa. Zẽk-y tãb-kaoor Bet-Hakerɛm pʋgẽ! Bala, toog yita wĩndg sẽn lʋɩtẽ dɩtg n watẽ, na n yɩɩ sãoon-kãsenga!

² Sɩyõ yaa tẽn-neer n tar da-sãnd tɩ b nong-a, la mam na n sãam-a lame!

³ Nanambs na n kẽnga be ne b tãb-biisi, wa pe-kɩɩmb sẽn peegd b rũms n na n tɩ wãbnege. Bãmb tilga b fu-rot n gũbg-a n dat n zab ne-a. Bãmb ned kam fãa na n sãama zĩig ning sẽn be-a taoore.

⁴ Bãmb na n yeelame: «Sũ-y tãp n tɩ zab ne-a! D tɩ zab ne-a wĩnto-sʋka! Toog paama tõndo! Wĩndg kẽedame, la zaabr maasem sigdame.

⁵ Wa-y tɩ d tɩ zab ne-a yʋngo, d tɩ sãam Zeruzalɛm do-neebã.»

Keoogre

⁶ Saasẽ-Pãng-Soabã yetame: «Kɛ-y raado. Zam-y tãnd n gilg Zeruzalɛm lalgã n zab ne-a. Tẽngã zemsa sɩbgre. B namsda neb wʋsg a pʋgẽ.

⁷ Wa bulg koom sẽn bund to-to wã, tẽngã neb maanda wẽng wakat fãa. B wʋmda b sẽn maand neb wẽng rãamde, la sãoong bʋrg a pʋgẽ. Mam nee toog ne sãmpoag wakat fãa.

⁸ Zeruzalɛm nebã, gũus-y y meng neere, tɩ mam da wa bas yãmb n kɩt tɩ y tẽngã lebg raboogo, tɩ ned ka leb n tõe n zĩnd a pʋgẽ ye!»

Neb sẽn yaa tʋb-pa-wʋmdba

⁹ Saasẽ-Pãng-Soabã yetame: «B na n yiisa Israyɛll bu-kellã wa b sẽn yiisd reezẽ. Saag-y-yã-a zãng wa reezẽ-woabd sẽn wobd reezẽ reezẽ tɩɩg zugu.»

¹⁰ Ãnda la mam na n gom ne? Ãnda n na n yɩ mam kaset soab tɩ b sak n kelge? Ade, bãmb yẽda b tʋb n ka rat n wʋm ye. Sẽn-Ka-Saab goamã yaa wa laad bãmb yĩnga. Bãmb ka nong n wʋm-a ye.

¹¹ Sẽn-Ka-Saab sũ-puugrã reeg n tara maam, hal tɩ m ya n yɛ n ka tõe n gɩdg-a ye. Sẽn-Ka-Saab yetame: «Bas tɩ sũ-puugrã nams kambã soayã zutu, la a nams ra-sãmbã b tiging zĩisẽ. B na n yõga pagbã ne raopã, la nin-kẽembã ne nin-kẽem-kulkuudã me n tall n looge.

¹² Mam sã n wa tẽeg m nugã n sɩbg tẽngã nebã, bãmb dotã ne b pʋtã la b pagb na n lebga neb a taab rẽnda. Maam a Sẽn-Ka-Saab n yeele.

¹³ Bala, kom-bãoonegã ne nin-kẽembã fãa baooda b mens nafr bala. No-rɛɛsdbã ne maan-kʋʋdbã fãa yagda zĩrẽ.

¹⁴ Bãmb ka tɩpd mam nebã poglg sõama ye. B yetame tɩ laafɩ beeme, tɩ laafɩ yaool n ka be ye.

¹⁵ Bãmb sẽn maan yel-beedã yãnd tar-b lame bɩ? Baa bilfu! Bãmb ka mi yãn-zoeer ye. Woto yĩnga, bãmb na n naaga neb nins sẽn lʋɩtã n lʋɩ. Mam sã n wa sɩbg-ba, b na n lʋɩɩme. Maam a Sẽn-Ka-Saab n yeele.

¹⁶ Ade, Sẽn-Ka-Saab yetame: «Yaas-y soayã zut n gese, Sok n bãng kʋdem-wẽndẽ soayã sẽn beẽ. Sok-y n bãng-y so-sõngã sẽn beẽ. Tũ-y so-kãng tɩ y na n vɩɩmda bãane.» La nebã yeelame: «Tõnd ka na n tũ so-kãng ye.»

¹⁷ Sẽn-Ka-Saab yetame: Mam yãka gũudb yãmb yĩnga, n yeel-b tɩ b maan gũusg tɩ baorgã peebg ra wa ling-b ye. La bãmb yeelame: «Tõnd ka na n gũus ye.»

¹⁸ Buud a taabã, kelg-y-yã! Yãmb fãa sẽn tigmã, bãng-y bũmb ning sẽn na n paam bãmbã.

¹⁹ Dũni rãmba, kelg-y-yã! Mam na n kɩtame tɩ toog paam nin-kãense. Na n yɩ b tags-wẽnsã biisi. Bala, bãmb ka kelg mam goamã ye. Bãmb zãgsa m tõodã.

²⁰ Wisd sẽn yit Seba yõod ne maam yaa bõe? Parfẽ sẽn yit zĩ-zãrsẽ yõod ne maam yaa bõe? Mam ka na n deeg y maand sẽn yõogd bugmã ye. Y maandã ka noom maam ye.

²¹ Woto yĩnga, maam a Sẽn-Ka-Saab yetame: mam na n ninga bõn-lakdg bãmb taoore, tɩ ned ne a biiga, ned ne a yaka, la ned ne a zoa lak n lʋɩ, la bãmb fãa na n sãamame.»

²² Sẽn-Ka-Saab yetame: «Ade, neb n yit tẽng ning sẽn be rɩtgã n watẽ. Bu-kãseng n yit dũniyã kɩremsã n watẽ.

²³ Bãmb zãeesda b tãbdo, la b zãad kãna, Bãmb yaa nin-toos sẽn ka tar nimbãan-zoeer ye. Bãmb bʋrgã wẽnda ko-kãsengã bʋrgo. Bãmb zomba wiidi, bãmb tonga taab wa nin-yende, n wat n na n zab ne foom a Sɩyõ tẽn-neerã.

²⁴ Tõnd wʋma kibarã, la tõnd gĩin maagame. Sũ-sãang yõka tõndo. Toog paama tõnd wa pag sẽn kũmd dogem.

²⁵ Ra-y yi-y n kẽng-y pʋtẽ, la y ra kẽng soayã zut me ye. Bala, y bɛ wã bee be ne zabr sʋʋse. Zĩigã fãa yaa pelen-yɩgre.

²⁶ Mam nebã, sẽgen-y boto, la y bilim tompeglmẽ. Yãb-y ne sũ-sãang wa ned sẽn yãbd a bi-yɛng kũum. Yãb-y n wiis-y-yã, bala, sãamdã watame, a na n wa linga tõnd n zab ne-do.»

Tõatb meng-menga

²⁷ Mam yãka foom a Zeremi, tɩ f yɩ soab ning sẽn na n mak mam nebã, tɩ fo tõe n mak-ba, n bãng b sẽn yaa neb ninsi, la f mak-b n bãng b yel-manesmã sẽn yaa-a soaba.

²⁸ Bãmb fãa yaa tõatb meng-menga, la tẽn-kãn-nebã. Bãmb sũyã yaa wa zũudu, la wa kutu. B fãa yaa sãamdba.

²⁹ Zugdã zugame tɩ wɩng wʋsgo, tɩ bugmã na n kɩt tɩ namdã meneme, la a zugbã yaa zaalem bala.

³⁰ B na n boola bãmb tɩ «wanzuri b sẽn lobe.» Bala, maam a Sẽn-Ka-Saab zãgs-b lame.