Zeremi 50 - WẼNNAAM SEBRE 2014

Babilond lʋɩɩse, la Israyɛll nebã fãagre

¹ Woto yaa koɛɛg Sẽn-Ka-Saab sẽn tũnug no-rɛɛs a Zeremi n togse, Babilond sẽn yaa Kalde rãmbã tẽngã wɛɛngẽ.

² Togs-y buud toay-toayã koe-kãngã! Kɩt-y tɩ b wʋm-a, zẽk-y tãb-kaoore! Kɩt-y tɩ b wʋm-a, la y ra solg-a ye! Yeel-y tɩ b reega Babilonde! Yãnd tara a Bɛlle! A Merodak pɛleng yɩkame! N-yẽe, yãnd tara yẽnda bõn-naandsã, b pɛleng yɩkame!

³ Bala, buud n yit wĩndg sẽn lʋɩtẽ dɩtgo, n wat n na n zab ne Babilonde. B na n kɩtame t'a lebg zĩ-vɩʋʋgo, tɩ ninsaal bɩ rũng ra leb n zĩnd a pʋgẽ ye. Bala, b fãa loogame.

⁴ Sẽn-Ka-Saab yetame: «Badaare, Israyɛll ne Zʋʋda buudã na n tũu taab n lebg n wa. Wakat-kãnga, b na n kẽndame la b yãbd n baood Sẽn-Ka-Saab sẽn yaa bãmb Wẽnnaamã.»

⁵ Bãmb na n soka Sɩyõ zĩiga, n wẽnemd b nens n tees beenẽ n yeele: «Wa-y tɩ d rɩk d mens n kõ Sẽn-Ka-Saabo, n maan kaool sẽn paad wakat fãa, ned sẽn kõn tol n yĩm ye!»

⁶ Mam nebã rag n yaa wa piis sẽn meneme. Bãmb pe-kɩɩmbã rag n kẽesd-b-la moogo, b rag n basa bãmb tɩ b gilimd tãmsã zutu. Bãmb dag n kɩtame tɩ b yeebd tãmsã ne kunkubã zutu, n wa yĩm b vʋʋsg zĩigã yelle.

⁷ Sẽn seg-a bãmb yõgd-b lame n wãbdẽ, la b bɛɛbã rag n yetame: Tõnd ka beeg ye. La nin-bãmbã maana yel-wẽn n beeg Sẽn-Ka-Saab sẽn yaa tɩrlem soabã. Bãmb beega Sẽn-Ka-Saabo, soab ning bãmb yaab-rãmbã sẽn dag n teegã.

⁸ Zoe-y n yi-y Babilonde! Yi-y n bas-y Kalde nebã tẽnga! Yi-y wa boees sẽn lʋɩ bʋʋs taoor n zoetẽ!

⁹ Bala, ade, mam kɩtame tɩ bu-kãsems tigim taab n yi tẽng ning sẽn be nug-rɩtgã, n wa zab ne Babilond tẽngã. Bãmb na n teedgame n zab n deeg-a. Bãmb pɛɛmã na n yɩɩ wa gãndaoog nug sẽn noom pɛɛmã. A ka lebgd n kuil zaalem ye.

¹⁰ B na n fãa Kalde nebã. Ned ning fãa sẽn na n fã-a bãmb sũur na n yɩɩ noogo. Sẽn-Ka-Saab n yeele.

¹¹ Yãmb dãmb sẽn fã mam soolmã, maan-y sũ-noogo! Kɩdm-y-yã! Yɩg-y n tirs-y wa nag-sãdse! Kelm-y wa wed-raado!

¹² Yãn-kãseng tara y ma wã! Pag ning sẽn dog-a yãmbã zĩi ne paoogre! Yẽnda n yaa poorẽ tẽmsã fãa sʋka. A yaa we-raoogo, zĩ-koɛɛnga, la zĩ-peen-daaga.

¹³ Sẽn-Ka-Saab sũ-puugrã yĩnga, ned kõn leb n zĩnd Babilond pʋgẽ ye. B na n kɩtame tɩ tẽngã zãng lebg zĩ-vɩʋʋgo. Sẽn pɩʋʋgd-a Babilond fãa pɛleng na n yɩkame. B na n yɛɛsame n fɩɩle, a poglgã fãa yĩnga.

¹⁴ Teedg-y n zab-y ne Babilonde. Yãag-y y tãbd n gũbg-a! Tão-y-yã-a n da zoe y pɛɛmã bõn ye! Bala, yẽnda maana yel-wẽn n beeg Sẽn-Ka-Saabo!

¹⁵ Kaas-y zabr kaasg n gũbg-a n zab ne-a! A rʋʋga a zab-teedo. A gãsdã rʋʋgdame, t'a lalsã sirgdẽ: Yaa Sẽn-Ka-Saab n dokd b sũuri! Rok-y y sũur ne-a! Maan-y-yã-a wa yẽnda me sẽn dag n maanã!

¹⁶ Menes-y neb nins sẽn bʋt la b kẽebd Babilond tẽngã pʋgẽ bõn-bɩʋʋng wakatã! Sãamdã zabr sʋʋg yĩnga, bɩ ned kam fãa leb a buudẽ. Bɩ ned kam fãa zoe n kẽng a tẽngẽ.

¹⁷ Israyɛll yaa wa pe-menemdg gɩgmã sẽn digi. Sẽn yɩ-a pipi n wãb yẽnda yaa Asiiri rĩmã, la sẽn yɩ-a yaoolem n kao yẽnda kõabã yaa Babilond dĩm a Nebukatnedzaare.

¹⁸ Woto yĩnga, Saasẽ-Pãng-Soabã sẽn yaa Israyɛll Wẽnnaamã yetame: Ade, mam na n sɩbga Babilond dĩmã ne a tẽngã, wa m sẽn dag n sɩbg Asiiri rĩmã.

¹⁹ Mam na n talla Israyɛll nebã n lebg n wa b tẽngẽ wã. Bãmb na n dɩɩ Karmell ne Basã koodã, la b na n dɩɩ Efrayiim soolem ning sẽn be tãms sʋkã ne Galaadã bɩle n tɩge.

²⁰ Badaare, la wakat-kãnga, b na n baoo kongr Israyɛll nebã nengẽ, la b ka na n yãnd ye. B na n baoo Zʋʋda nebã yel-wẽnã, la b kõn tol n yãnd ye. Bala, mam na n kõo neb nins mam sẽn na n bas n ka kʋ wã sugri. Sẽn-Ka-Saab n yeele.

²¹ Kẽng-y n tɩ zab-y ne Meratayim ne Pekood tẽmsã nebã! Kʋ-y bãmb n sãam-b zãnga! Maan-y-b wa mam sẽn yeel yãmbã! Sẽn-Ka-Saab n yeele.

²² Zabr bʋrg ne sãoon-kãseng n be tẽngã pʋgẽ.

²³ Maana a wãna? Zãarã sẽn dag n wãad dũniyã fãa wã kaoogame, a wãame. Babilond lebga zĩ-vɩʋʋg buudã fãa sʋka!

²⁴ Babilonde, mam dɩgla bẽdg fo yĩnga, la fo lʋɩɩ a pʋgẽ n ka bãng ye. B yãnda foom n yõke, bala, fo baoo Sẽn-Ka-Saab noore.

²⁵ Sẽn-Ka-Saab paka b zab-teedã bĩngr zĩig n yiis b sũ-puugr zab-teedã. Zu-soabã sẽn yaa Saasẽ-Pãng-Soabã rat n maana tʋʋmd Kalde rãmbã tẽngẽ.

²⁶ Yi-y dũniyã kɩremsã fãa n wa zab ne-a! Fõgs-y-yã a baoã, wʋk-y-yã a teedã n zam wa koodo! Sãam-y bãmb zãng n da bas b ned ba a yembr tɩ kell ye!

²⁷ Kʋ-y bãmb gãndaadã wa lols b sẽn tar n dabd kʋʋb zĩigẽ. Toog bee bãmb zugu! Bãmb daarã taame, bãmb sɩbgrã daar taame.

²⁸ Neb sẽn yi Babilond tẽng n zoe n põsã wilgda Sɩyõ pʋgẽ tɩ Sẽn-Ka-Saab sẽn yaa tõnd Wẽnnaamã rokda b sũuri. Bãmb dokda b sũur b roogã yĩnga.

²⁹ Bool-y tãb-tãoodbã tɩ b wa zab ne Babilonde! Bool-y neb nins fãa sẽn mi tãp tãoobã tɩ b wa zab ne-a! Tilg-y y tãb-sikã n gũbg-a, n da bas ned ba a yembr t'a põs ye! Yao-y-yã-a wa sẽn zems a tʋʋmã, maan-y-yã-a wa a sẽn dag n maanã, bala, yẽnda wuka a meng ne Sẽn-Ka-Saab sẽn yaa Israyɛll Pʋ-Peelem-Soabã.

³⁰ Yaa rẽ n kɩte, tɩ b na n kʋ a kom-bɩɩsã soayã zutu. Badaare, b na n kʋʋ yẽnda tãb-biisã fãa. Sẽn-Ka-Saab n yeele.

³¹ Saasẽ-Pãng-Soabã yetame: Tẽng sẽn yaa wuk-m-meng soaba, mam zabda ne foom, bala, fo daarã taame. Wakat ning mam sẽn na n sɩbg foomã taame.

³² Tẽng sẽn yaa wuk-m-meng soabã na n lak n lʋɩɩme, tɩ ned ka be n na n sõng-a t'a yik ye. Mam na n ninga a tẽmsã bugum, t'a rɩ a tẽn-kɩremsã fãa.

³³ Ad Saasẽ-Pãng-Soabã sẽn yeta: B namsa Israyɛll ne Zʋʋda nebã. Neb nins fãa sẽn yõg bãmb n maan yembsã ka rat n bas-b tɩ b loog ye.

³⁴ La bãmb fãagdã tara pãnga. Bãmb yʋʋr la Saasẽ-Pãng-Soaba. Yaa fãagd-kãng n na n zab n sõng bãmba, n kɩt tɩ vɩ-bãan wa tẽngã pʋga, la b kɩt tɩ Babilond nebã rig ne rabeem.

Sẽn-Ka-Saab rat n zaba ne Babilonde

³⁵ Sẽn-Ka-Saab yetame: Bɩ zabr sʋʋg kʋ Kalde nebã! Bɩ a kʋ Babilond nebã ne a nanambsã la a yam dãmbã.

³⁶ Bɩ zabr sʋʋg kʋ pẽg-m-mens rãmbã! Bɩ b lebg yalemba! Bɩ zabr sʋʋg kʋ gãndaadã! Bɩ b pelens yɩke!

³⁷ Bɩ zabr sʋʋg kʋ a wiidã ne a saar-dãmbã, la sãamb nins fãa sẽn be bãmb sʋkã! Bɩ b lebg wa pagba! Bɩ zabr sʋʋg sãam-a tɩ b wʋk a paoongã! Bɩ b fã bãmb gilli!

³⁸ Bɩ war kʋɩɩs b kʋɩlsã! Bɩ b kʋɩ zãnga! Bala, a tẽngã pida ne bõn-naandse. Pelen-yɩgrã kɩtame tɩ b zʋbsdẽ.

³⁹ Yaa rẽ n kɩte, tɩ beenẽ na n lebg we-yũus ne kata, la naneend gãag zĩiga. Na n maana zamaan-dãmba, tɩ ned ka leb n zĩnd beenẽ ye.

⁴⁰ Na n yɩɩ wa Sodom ne Gomoor la b tẽn-kɩremsã sãoongã. Ned wall rũng kõn leb n zĩnd be ye. Sẽn-Ka-Saab n yeele.

⁴¹ Ade, neb n yit tẽng ning sẽn be nug-rɩtgã n watẽ. Yaa bu-kãseng ne rĩm-dãmb sẽn tar pãng n yi dũniyã zĩ-zãrsẽ n watẽ.

⁴² Bãmb zẽgsda b tãbdo, la b zãad kãna. Bãmb yaa nin-toos sẽn ka tar nimbãan-zoeer ye. Bãmb bʋrgã wẽnda ko-kãsengã bʋrgo. Bãmb zomba wiidi, bãmb tonga taab wa nin-yende, n wat n na n zab ne foom a Babilond tẽn-neerã.

⁴³ Babilond dĩmã wʋma b kibar t'a raood booge. Yel-pakr paam-a lame toog tar-a-la wa pag sẽn kũmd dogem.

⁴⁴ Mam na n waa wa gɩgemd sẽn yit Zʋrdẽ kʋɩlgã noor kãgrã pʋgẽ, n dig Babilond nebã tɩ b fão n yi n bas b tẽngã wakat-yɛng pʋgẽ. La mam na n kɩtame tɩ m sẽn yãk-a soabã soog Babilonde. Bala, ãnda soab n zem maam? Ãnda soab n na sok maam tɩ bõe la m maanda? La na-bʋg n tõe n yals mam taoore?

⁴⁵ Woto yĩnga, kelg-y saagr ning Sẽn-Ka-Saab sẽn saagd Babilond ne Kalde nebã wɛɛngẽ, la b sẽn segend n dat n maan Kalde nebã bũmb ninga! Sɩd me, b na n tɛ-b lame n loog wa rũm-bãoonego! B na n sãama b soolmã.

⁴⁶ Babilond lʋɩɩme tɩ tẽn-gãongã rigimdi, la buud a taabã wʋma Babilond nebã kelemse.