Zeremi 5 - WẼNNAAM SEBRE 2014

Tʋʋm-wẽns sẽn pid Zeruzalɛm

¹ Saag-y Zeruzalɛm soayã zutu. Kẽng-y raasã pʋs n tɩ ges neere, la y sok n gese, y na n yãnda ned sẽn maand tɩrga, la sẽn baood tɩ maan sɩda. Yãmb sã n yãnd ned a woto, mam na n kõo Zeruzalɛm nebã sugri.

² Baa bãmb sã n yeele: «D wẽenda ne Sẽn-Ka-Saab sẽn vɩ wã yʋʋre,» yaa zĩrẽ-be-wẽeneg la bãmb wẽenda.

³ Sẽn-Ka-Saabo, rẽ yĩnga, ka pʋ-peelem dãmb la yãmb baood sɩda? Yãmb wẽ-b lame la ka zab bãmb ye. Yãmb dag n dat n sãam-b lame, la b ka sak n deeg remsg ye. Bãmb kenga b nens n yɩɩg pĩig kugri. Bãmb ka sak n na n lebg n wa yãmb nengẽ ye.

⁴ Mam dag n yetame tɩ b yaa naong rãmb bala. Bãmb maanda wa neb sẽn ka tar yam. Bãmb ka mi Sẽn-Ka-Saab raabã, la b ka mi b Wẽnnaamã tɩrlem bʋ-kaoorã ye.

⁵ Mam na n kẽnga nin-kãsemsã nengẽ, n tɩ gom ne-ba, bala, bãmb n mi Sẽn-Ka-Saab raabã, bãmb n mi b Wẽnnaamã tɩrlem bʋ-kaoorã. La bãmb fãa yaa a yembre: Bãmb kaoo yubl balgrã, bãmb kaoo loeesã, bãmb basa Wẽnnaam.

⁶ Rẽ kɩtame tɩ bɛɛbã na n yi wa gɩgemd sẽn yi kãgrẽ n zab ne-ba, wa tẽn-nabd-koɛɛngẽ digd-n-yĩidga, n zendem bãmba. Bɛɛbã na n sora bãmb tẽmsã noy wa ãbga, n yõgd neb nins fãa sẽn yit-b beenẽ wã n zendemdẽ. Bala, bãmb beegrã yaa wʋsgo, la b kɩɩsgã tara yãngr bala.

⁷ Sẽn-Ka-Saab yetame: «Zeruzalɛm nebã, bõn-kãng yĩng la m na n kõ-y sugr bɩ? Yãmb kambã basa maam, n wẽend ne bõn-zaals sẽn ka Wẽnnaam ye. Mam dag n kõo bãmb bũmb fãa tɩ seke, la bãmb baas n maana yoobo. Bãmb wẽdgda taab pʋg-yoaadb rotẽ.

⁸ Bãmb wẽnda wa wed-nobdse, tɩ b ned kam fãa yãbd n pʋgd a to paga.»

⁹ Maam a Sẽn-Ka-Saab yetame: «Mam ka tog n sɩbg neb a woto buud sɩda? Mam ka tog n dok m sũur ne buud a woto sɩda?

¹⁰ Rʋ-y b lalsã n kẽ n sãam b reezẽ tɩɩsã pʋto, la y ra sãam-b zãng ye. Kɛ-y b wilã, bala, bãmb ka maam a Sẽn-Ka-Saab rẽnd ye.

¹¹ Bala, Israyɛll ne Zʋʋda nebã, zãmba maam zãnga.» Maam a Sẽn-Ka-Saab n yeele.

¹² Bãmb kɩɩsame tɩ b ka mi Sẽn-Ka-Saab ye. Bãmb yeelame: «Sẽn-Ka-Saab ka tõe n maan fɩ ye. Toog ka na n paam tõnd ye. Tõnd ka na n yãnd zabr bɩ kom ye!

¹³ No-rɛɛsdbã yaa sobg bala. Bãmb ka tar Sẽn-Ka-Saab gomd ye.»

¹⁴ Woto yĩnga, Sẽn-Ka-Saab sẽn yaa Saasẽ-Pãng-Soab a Wẽnnaamã yetame: «Yãmb sẽn gom a woto wã yĩnga, ad bũmb ning sẽn na n paam yãmba: Mam na n ninga m goamã fo noorẽ tɩ b yɩ wa bugum, la nin-kãensã na n yɩɩ wa raad tɩ bugmã rɩ-ba.»

¹⁵ Maam a Sẽn-Ka-Saab yetame: «Israyɛll nebã, ade, mam na n kɩtame tɩ buud sẽn yit zĩ-zãrgẽ wa zab ne-yã. Yaa buud sẽn tar pãng hal kʋdem-wẽndẽ. Yãmb ka mi b buudã sẽn gomd gomd ning ye, yãmb ka na n wʋm b sẽn gomdã võor me ye.

¹⁶ Bãmb logdã kʋʋdame. Bãmb fãa yaa gãndaado.

¹⁷ Bãmb na n dɩ y koodã ne y rɩɩbã. Bãmb na n sãama y kambã ne y piisã la y niigã. B na n dɩ y reezẽ tɩɩsã ne y kankamsã fãa. B na n sãama y tẽms nins y sẽn teegã, y tẽms nins sẽn gũbg ne lalsã.»

¹⁸ La maam a Sẽn-Ka-Saab yetame tɩ baa ne wakat-kãnga, m ka na n sãam-y zãng ye.

¹⁹ B sã n sok tɩ yaa bõe tɩ Sẽn-Ka-Saab sẽn yaa bãmb Wẽnnaamã maand bãmb woto fãa, bɩ f leok-b tɩ Sẽn-Ka-Saab yetame: «Yãmb sẽn bas maam n tũ bu-zẽms wẽnnaam-dãmb y tẽngã pʋgẽ wã yĩnga, woto me, bu-zẽmsã na n sooga yãmb tẽng a to sẽn ka yãmb dẽnd pʋgẽ.»

Nebã kɩɩsa Wẽnnaam

²⁰ Togs-y-yã a Zakoob buudã koe-kãngã, la y taas-a Zʋʋda nebã. Yeel-b tɩ maam a Sẽn-Ka-Saab yetame yaa:

²¹ «Kelg-y-yã! Yalemb sẽn ka tar bãngre, yãmb tara nini, la y ka ne ye. Yãmb tara tʋba, la y ka wʋmd ye.»

²² Maam a Sẽn-Ka-Saab sokdame yaa: «Bõe yĩng tɩ y ka zoet-ma, la y ka rigd ne rabeem m taoore? Ka maam n ning bĩisrã ko-kãsengã noor t'a yɩ a toadg wakat fãa la? Baa ko-wĩisã sã n lengdẽ, b ka tar pãng ne-a ye. La baa b sã n guglumdẽ, b ka tõe n gãndg-a ye.

²³ Nin-bãmbã yaa sũ-keen-nebã, la tõatba. Bãmb wẽnemd n basa maam n looge.»

²⁴ Bãmb ka yete: «Wa-y tɩ d zoe Sẽn-Ka-Saab sẽn yaa tõnd Wẽnnaamã, bala, bãmb n kõt tõnd sigr saag ne yaoolem saaga, la b kõt-d bõn-bɩʋʋng fãa wã» ye.

²⁵ Yaa yãmb kongrã n kɩt tɩ bõn-kãens vaale. Yaa y yel-wẽnã n gɩdg tɩ y ka paam naar ye.

²⁶ Bala, nin-wẽns n be m nebã sʋka. Bãmb sora wa ned sẽn bẽd tãoog n na n yõk liuula. Bãmb gãnega gãmbr n yõgd ninsaalba.

²⁷ Wa ko-yong sẽn pid ne liuuli to-to wã, woto me, bãmb dotã pida ne zãmbo. Bãmb maanda a woto n lebgd nin-kãsemse, la arzegs-rãmba.

²⁸ Bãmb nobame tɩ b nens põeeda. Bãmb maanda wẽng hal tɩ loog nugu. Bãmb ka kaood bʋʋd wa sẽn zems ye. Bãmb ka kaood kɩɩbs bʋʋd tɩrg ye. Bãmb maanda a woto n tɩlgdẽ. Bãmb toog ka be ne naong rãmb bʋʋd zĩigẽ ye.

²⁹ Mam kõn sɩbg nin-bãmbã buud sɩda? Mam kõn dok m sũur ne bu-kãngã sɩda? Maam a Sẽn-Ka-Saab n yeele.

³⁰ Bũmb ning sẽn maand tẽngã pʋgẽ wã sãamda sũuri, a yaa wẽng wʋsgo.

³¹ No-rɛɛsdbã yagda zĩrẽ, la maan-kʋʋdbã maanda b sẽn date, tɩ mam nebã me nong rẽnda. La yãmb na n maana bõe bõn-kãens loogr zugẽ?