Zeremi 49 - WẼNNAAM SEBRE 2014

Sẽn kẽed ne Amo nebã wɛɛngẽ

¹ Sẽn kẽed ne Amo nebã wɛɛngẽ: Sẽn-Ka-Saab yetame: Israyɛll nebã ka tar kom-dibli la? Bãmb ka tar kom-dibli sẽn na n wa soog b tẽngã la? La yaa bõe tɩ wẽnnaam a Milkom reeg Gaad buudã tẽng n sooge, t'a nebã soog Gaad tẽmsã?

² Bõn-kãng yĩnga, maam a Sẽn-Ka-Saab yetame: Wakat n wate, tɩ mam na n kɩt tɩ b wʋm zabr kelems Raba sẽn yaa Amo nebã na-tẽngã. A na n sãamame n lebg tom dʋya, la a tẽn-kɩremsã na n dɩɩ bugum. Dẽ, Israyɛll nebã na n leb n deega b tẽngã neb nins sẽn dag n dig bãmb n deeg-a wã nugẽ. Maam a Sẽn-Ka-Saab n yeele.

³ Hɛsbõ nebã, wiis-y tɩ Ayi sãamame! Raba kom-pugli, kelm-y-yã! Sẽgen-y bot n yãb-a, la y yeeb goabg la rɩtgo! Bala b yõka bãmb dĩmã ne a maan-kʋʋdbã la a nanambsã, n dabd yembdo.

⁴ Raba tẽn-neere, bõe yĩng tɩ f wukd f meng f tãn-londã sẽn kõt bɩle sõama wã yĩnga? Fo rag n teega f paoongã n yetẽ tɩ ãndã n tõe n wa zab ne foom?

⁵ Beneere, Saasẽ-Pãng-Soabã yetame: Mam kɩtame tɩ rabeem yit zĩigã fãa, n wat n na n yõk yãmba. B na n diga yãmba, tɩ ned kam fãa zoe n bao a menga, la ned ka na n kell sẽn na n tigs zoɛtbã ye.

⁶ La rẽ poore, mam na n kɩtame tɩ Amo nebã leb b tẽngẽ wã. Maam a Sẽn-Ka-Saab n yeele.

Koɛɛg Edom wɛɛngẽ

⁷ Koɛɛg Edom wɛɛngẽ. Ade, Saasẽ-Pãng-Soabã sokdame yaa: Teman nebã ka leb n tar yam la? Sẽn tar-b bãngrã ka leb n kõt sagls la? Bãmb yamã menemame la?

⁸ Dedan nebã, lebg-y n zoe-y-yã! Kẽng-y n tɩ bao-y zĩig n soonde! Bala, mam na n tʋma sãoong a Ezayu yagensã yĩnga. Wakat taame tɩ mam na n sɩbg bãmba.

⁹ Reezẽ-woabdb sã n wa fo nengẽ, bãmb ka na n bas bũmb ned sẽn tõe n wa paam n yiis ye. Wagda sã n wa fo nengẽ ne yʋngo, bãmb na n sãama b sẽn tõe n sãame.

¹⁰ Sɩd me, mam wʋka a Ezayu yagensã paoong gilli. Mam sãama a zĩ-solgdsã, t'a ka leb n tõe n soond ye. B na n basame tɩ b sãam a yagensã, ne a saam-biisã la a yagsã. B ka na n leb n zĩnd ye.

¹¹ Bas-y y kɩɩbsã, tɩ maam n na n sõng-b tɩ b vɩɩmde, la bɩ y pʋg-kõapã teeg maam!

¹² Bala, Sẽn-Ka-Saab yetame: «Neb nins sẽn dag n ka segd ne sɩbgrã sã n paam sɩbgre, b na n basa foom a Edom n ka sɩbg bɩ? Ayo! B ka na n bas foom ye, b na n sɩbga foom me.»

¹³ Bala, maam a Sẽn-Ka-Saab yetame: «Mam wẽenda ne m mengã, tɩ b na n basame tɩ b sãam Bosra, t'a lebg raboogo, n paam paoogre, la kãab-wẽnga. Yẽnda tẽmsã fãa na n lebga rabood wakat sẽn ka sɛt yĩnga.»

¹⁴ Mam wʋma koɛɛg Sẽn-Ka-Saab nengẽ, la b tʋma ned bu-zẽmsã nengẽ ne koɛɛg t'a tɩ yeele: «Tigm-y taab n wa zab ne Edom! Yik-y zabr ne-a!

¹⁵ Edom, mam na n kɩtame tɩ f lebg bilf bu-zẽmsã fãa sʋka, la ninsaalbã na n paooga foom wʋsgo.

¹⁶ Fo sẽn be pĩisã bogdẽ wã, fo sẽn tɩ be kunkubã zutã, bãng tɩ f sẽn dag n kẽesd nebã rabeemã ne f tɩtaamã kẽes-f-la moogo. Ade, baa fo sã n tɩ tɩʋ f tʋkã yĩngr n lug wa pa-nand-tugri, mam na n sika foom beenẽ. Maam a Sẽn-Ka-Saab n yeele.»

¹⁷ Edom na n sãamame. A toodã yĩnga, so-loaadbã fãa na n yãnd-a lame tɩ b pɛleng yɩke. Bãmb na n yɛɛsame n fɩɩle.

¹⁸ Sẽn-Ka-Saab yetame: Ade, na n yɩɩ wa Sodom ne Gomoor la b tẽn-kɩremsã sãoongã. Ned ka na n leb n zĩnd Edom ye. Ninsaal kõn leb n zĩnd be yɛs ye.

¹⁹ Mam na n waa wa gɩgemd sẽn yit Zʋrdẽ kʋɩlgã noor weoogã pʋgẽ, n dig Edom nebã tɩ b fão n yi n bas b tẽngã wakat-yɛng pʋgẽ. La mam na n kɩtame tɩ m sẽn yãk-a soabã soog Edom. Bala, ãnda soab n zem maam? Ãnda soab n tar noor ne maam? La na-bʋg n tõe n yals mam taoore?

²⁰ Woto yĩnga, kelg-y saagr ning Sẽn-Ka-Saab sẽn saagd Edom nebã wɛɛngẽ, la b sẽn segend n dat n maan Teman nebã bũmb ninga! Sɩd me, b na n tɛ-b lame n loog wa rũm-bãoonego! B na n sãama b soolmã.

²¹ Bãmb lʋɩɩsã bʋrg kɩtame tɩ dũniyã rigimdi. B sũ-sãangã kelems zẽkd n tata hal rʋdem ko-kãsengã sẽnẽ.

²² Bɛ wã yɩkame n laand wa pa-nand-tugri, n fõt n dat n sig Bosra tẽngã zugu, la badaare, Edom gãndaadã sũy na n kiuusa wa pag sẽn kũmd rogem.

Koɛɛg Damaas wɛɛngẽ

²³ Koɛɛg Damaas wɛɛngẽ. Yãnd tara Hamat ne Arpaad nebã, bala b wʋma koe-beedo, tɩ b gĩin maage. B yaa wa ko-kãsengã koom sẽn lengde, n ka leb n tõe n yals sɩɩ ye.

²⁴ Damaas nebã raood boogame, tɩ b wẽnemd n zoetẽ. Rabeem yõka bãmb tɩ b rigda. Yel-pakr ne toog tara bãmba, wa pag sẽn kũmd rogem.

²⁵ Kayto! B basa tẽng ning sẽn dag n kõt maam waoogrã, tẽng ning sẽn dag n kõt maam sũ-noogã.

²⁶ Sɩd me, badaare, a ra-sãmbã lʋɩta a soayã zutu, la b kʋ a raop nins fãa sẽn tõe n kẽng zabrã. Maam a Sẽn-Ka-Saab n yeele.

²⁷ Mam na n ninga Damaas lalgã bugum, la bugmã na n dɩ a Bɛn-Hadaad na-yiyã.

Koɛɛg araab-rãmbã wɛɛngẽ

²⁸ Sẽn kẽed ne Kedaar la Hatsoor soolem-dãmbã, Babilond dĩm a Nebukatnedzaar sẽn zab ne n tõogã wɛɛngẽ. Ade, Sẽn-Ka-Saab yetame: Yik-y n zab-y ne Kedaar nebã. Sãam-y buud sẽn be yaangã!

²⁹ Reeg-y bãmb fu-rotã ne b rũmsã, yãk-y b pɛɛlã ne b teedã fãa la ne b yʋgma wã. Kaas-y b zug n yeel tɩ toog yita zĩigã fãa n wat b zutu!

³⁰ Sẽn-Ka-Saab yetame: Hatsoor nebã, zoe-y tao-tao n tɩ bao zĩig n soonde! Bala, Babilond dĩm a Nebukatnedzaar saagd n dat n wa zaba ne yãmba. A segendame n dat n wa zab ne-yã!

³¹ Sẽn-Ka-Saab yetame: Yik-y n zab-y ne buud ning sẽn zĩ bãane, tɩ b pɛlg yaa kɛgengã! A ka tar dignoy la kʋɩlen-kuy ye. A vɩɩ a yembre.

³² B na n fãa bãmb yʋgma wã ne b rũmsã sẽn yaa wʋsgã. Mam na n kɩtame tɩ nin-kãens sẽn põng b zutã sãeeg zĩigã fãa. Mam na n kɩtame tɩ sabaab yi zĩigã fãa n wa sãam-ba. Maam a Sẽn-Ka-Saab n yeele.

³³ Hatsoor na n lebga we-baas yiri, a na n yɩɩ zĩ-vɩʋʋg wakat sẽn ka sɛta. Ned ka na n leb n zĩnd tẽn-kãng ye. Ninsaal kõn leb n zĩnd be yɛs ye.

Koɛɛg Elam wɛɛngẽ

³⁴ Ad koɛɛg Sẽn-Ka-Saab sẽn kõ no-rɛɛs a Zeremi, sẽn kẽed ne Elam wɛɛngẽ, Zʋʋda rĩm a Sedesiyaas naamã sɩngr wakate.

³⁵ Saasẽ-Pãng-Soabã yetame: Mam na n kaoo Elam nebã tãpã sẽn yaa b pãngã yẽgrã.

³⁶ Mam na n kɩtame tɩ sebd a naas yi saasẽ kɩrems a naasã n wa fug Elam. Mam na n kɩtame tɩ sob-bãmb fãa sãeeg-ba, la buud ka be tɩ Elam neb nins b sẽn digã ka na n kẽng ye.

³⁷ Mam na n kɩtame tɩ Elam nebã rig rabeem b bɛɛbã taoore. Bãmb na n diga rabeem neb nins sẽn baood n kʋ bãmbã taoore. Mam sũ-puugrã pʋga, mam na n kɩtame tɩ toog paam bãmba. Maam a Sẽn-Ka-Saab n yeele. Mam na n kɩtame tɩ b rig bãmb ne zabr sʋʋga, hal n kʋ bãmb zãnga.

³⁸ Mam na n ninga m naamã geer Elam, la m na n menesa Elam dĩmã ne a nanambsã. Maam a Sẽn-Ka-Saab n yeele.

³⁹ La wakat sẽn wate, mam na n lebs n manega Elam nebã yelle. Maam a Sẽn-Ka-Saab n yeele.