Zeremi 48 - WẼNNAAM SEBRE 2014

Sẽn-Ka-Saab koɛɛg Moaab yĩnga

¹ Koɛɛg Moaab yĩnga. Saasẽ-Pãng-Soabã sẽn yaa Israyɛll Wẽnnaamã yetame: «Toog paama Nebo tẽngã! B sãam-a lame! Yãnd tara Kiriyatayim tẽngã, bala, b zab n deeg-a lame! Yãnd tara Misgaab nebã, la b pɛleng yɩkame.

² Moaab ziirã sɛɛme! Neb bee Hɛsbõ n segend n na n wa maan-a wẽnga. Wa-y tɩ d kɩt tɩ Moaab menem buud a taabã sʋka! Madmen tẽng nebã, zabr sʋʋg na n kɩtame tɩ b ka leb n wʋm yãmb me rãamd ye. B rigda yãmb ne zabr sʋʋga.

³ B wʋmda kelems sẽn yit Horonayim! Yaa sabaab ne sãoon-kãsenga!

⁴ Moaab sãamame! B wʋmda a kambã kelemse.

⁵ Bala, kelemsã zẽkdame n tũud Luyit tãngã rʋʋdga, la b wʋmda neb nins sũy sẽn sãam tɩ b yãbdã bɛɛb kelemse, Horonayim tãngã sigdgẽ.

⁶ Zoe-y n fãag-y y mense, n yɩ wa we-bõanga.

⁷ Bala, yãmb sẽn dɩk y teegrã n teeg y tʋʋmã ne y arzegsã yĩnga, b na n zab n tõoga yãmb me, la b na n talla wẽn-naandg a Kemoos ne a maan-kʋʋdbã la a nanambsã, n kẽng yembdo.

⁸ Sẽn sãamd-a fãa wã na n sãama tẽmsã fãa, tẽng ba a yembr ka na n põs ye. B na n sãama tãn-longã ne tẽn-nabdrã. Yaa Sẽn-Ka-Saab n yeele.»

⁹ Kõ-y Moaab nebã pɩgs tɩ b yɩk n zãage! A tẽmsã na n lebga zĩ-vɩɩdo, la ned ka na n leb n zĩnd b pʋsẽ ye.

¹⁰ Kãab-wẽng bee ned ning sẽn maand Sẽn-Ka-Saab tʋʋmdã ne rok-m-zugẽ wã zugu! Ned ning sʋʋg zɩɩm sẽn ka madã na n paama kãab-wẽnga!

¹¹ Sẽn-Ka-Saab yeelame: Hal Moaab nebã yãadem wakate, b rag n zĩi ne bãane, tɩ b rag nan ka tall bãmb n kẽng yembd ye. B rag n yaa wa reezẽ rãam b sẽn bas t'a tisgi. B ka ning-a teoog a to pʋgẽ, la a noorã ne a yũugã me ka tek ye.

¹² Yaa woto tɩ maam a Sẽn-Ka-Saab yetẽ: Wakat n wate, tɩ mam na n kɩt tɩ neb rɩk-a n kiig laok a to pʋgẽ. B na n zuka a lagdã la b sãam a ko-waoosã.

¹³ Wẽn-naandg a Kemoos yãnd na n yõka Moaab nebã, wa Israyɛll nebã sẽn dag n teeg Betɛll n paam yãndã.

¹⁴ Moaab nebã, maana a wãn tɩ yãmb yetẽ tɩ y yaa gãndaad n mi zabre?

¹⁵ Moaab sãamame, bug-zõos n dukd a tẽmsã pʋsẽ. B tɛta a ra-sãmbã n dabd kʋʋbo. Rĩm ning yʋʋr sẽn boond tɩ Saasẽ-Pãng-Soabã n yeele.

¹⁶ Sabaab n wat Moaab tẽngã zugu, Toog na n paam-a-la tao-tao.

¹⁷ Yãmb fãa sẽn gũbg Moaab tẽngã, yãmb fãa sẽn mi a yʋʋrã, yãb-y-yã-a yĩng n yeele: «Kayto! A naam dasaarã sẽn tar pãng la ziirã kaoome.

¹⁸ Diyõ tẽn-neerã nebã, Sig f ziirã geer zugu! Sig n zĩnd tẽn-koɛɛngã zugu, bala Moaab sãamdã yika zabr ne foom, a sãamda fo pãng zĩisã.

¹⁹ Arowɛɛr nebã, Yals-y sorã noor n gũusi! Sok-y zoɛtbã ne sẽn põs-bã n gese, yaa bõe n maane?

²⁰ Yãnd tara Moaab nebã: B pɛleng yɩkame. Kaas-y-yã, kelm-y-yã! Kẽng-y Arno kʋɩlgã noore, n moon n yeel tɩ Moaab sãamame!

²¹ Bʋ-kaoor waa tẽng ning sẽn yaa tẽn-nabdrã zugu, ne tẽn-bãmba fãa zutu: yaa Holon, Yatsa, Mefaate,

²² Diyõ, Nebo, Bɛt-Diblatayim,

²³ Kiriyatayim, Bɛt-Gamulli, Bɛt-Meyõ,

²⁴ Keriyote, Bosra, ne Moaab soolem tẽmsã fãa, sẽn pẽ-b la sẽn zãr-ba.»

²⁵ Moaab pãngã sɛɛme, a kangã kaoome. Maam a Sẽn-Ka-Saab n yeele.

²⁶ Yũnug-y-yã-a t'a tɩge, bala, yẽnda yik n zabda ne Sẽn-Ka-Saabo! Kɩt-y tɩ Moaab bilim a wʋbdẽ wã, tɩ nebã yaal yẽnda me!

²⁷ Fo me rag n yaala Israyɛlle! Rẽ yĩnga, Israyɛll dag n bee wagda sʋk sɩda, tɩ fo gõmsd f zug n gomd n paoogd yẽnda?

²⁸ Moaab nebã, bas-y tẽmsã n yi n tɩ zĩnd piisã sʋka! Maan-y wa wall sẽn gãndgd bog-zulung n tʋɩt a tʋkã!

²⁹ Tõnd wʋma Moaab nebã tɩtaamã yelle. Bãmb tɩtaamã ya n looga nugu. Bãmb dag n wukda b mens la b zẽkd b mense, n tẽed tɩ b seka b mense.

³⁰ Maam a Sẽn-Ka-Saab yetame: Mam mi b tɩtaamã tiiri, la rẽ fãa yaa zaalem. Bãmb wuk-m-mengã yaa zaalem.

³¹ Yaa woto n kɩte, tɩ mam wiisd Moaab nebã yĩnga, mam yãbda Moaab nebã yĩnga. M maanda yɩɩr Kɩr-Herɛɛs yĩnga.

³² Sibma nebã, mam yãbda yãmb n yɩɩd Yazɛɛr nebã. Yãmb dag n yaa wa reezẽ tɩɩga, tɩ y wilã tẽ n gãndg yamsem kʋɩl-kãsengã, hal n ta Yazɛɛre, la sãamdã wa n sãama y koodã ne y reezẽ biisã.

³³ Sũ-noog ne kɩdeng ka leb n be Moaab tẽngã ne a pʋtã pʋsẽ ye. Mam kɩtame tɩ reezẽ rãam sɛ sĩmsã pʋse. B ka leb n tabd reezẽ la b kilsdẽ ye. B ka leb n kilsd reezẽ wobr wakat ye.

³⁴ Hɛsbõ nebã kelems zẽkd n tata Eleyale ne Yahaatse, la sẽn sɩng ne Sowaar tɩ ta Honorayim, hal n tãag Eglat-Selisiya. Baa Nimrim koomã kʋɩɩme.

³⁵ Sẽn-Ka-Saab yetame: Mam dat n sãama Moaab zãnga. Mam dat n sãama neb nins sẽn dʋʋd maoong kʋʋb zĩis n yõogd wisd Moaab wẽnnaam-dãmbã yĩngã.

³⁶ Yaa woto tɩ m sidgd Moaab yĩng wa ned sẽn peebd wɩɩga. Mam sidgda Kɩɩr-Haresɛt nebã yĩng wa ned sẽn peebd wɩɩga, bala arzegs nins bãmb sẽn dag n paamã loogame.

³⁷ Bãmb ned kam fãa põnga a zug ne a toɛɛnga, la a bog a nusi, la a sẽgen boto.

³⁸ Moaab nebã rot zut ne raasã pʋsẽ yaa wiisgu, bala mam wãa Moaab wa b sẽn wã rʋk tɩ ned ka leb n dat-a ye. Maam a Sẽn-Ka-Saab n yeele.

³⁹ Kayto! Moaab wãame! Ges-y-yã a nebã sẽn wiisdi! B lebgd n zoeta ne yãnde! Moaab lebga bɛɛb laada, la rabeem-kãseng a yagsã fãa nifẽ.

⁴⁰ Bala, Sẽn-Ka-Saab yetame: Ade, bɛ wã yɩkda wa pa-nand-tugri, n laand Moaab tẽngã zugu.

⁴¹ B reega Moaab tẽmsã, b reega a pãng zĩisã. Badaare, gãndaadã na n lebga rabɛɛmba, wa pag sẽn kũmd dogem.

⁴² Moaab na n sãamame, a ka na n leb n zĩnd n yɩ buud ye. Bala, a wuka a meng ne Sẽn-Ka-Saabo.

⁴³ Moaab nebã, Pelen-yɩk ne bog-zulung la bẽdg wata fo yĩnga. Maam a Sẽn-Ka-Saab n yeele.

⁴⁴ Sẽn zoet-a n dat n põs pelen-yɩkã na n lʋɩɩ bog-zulungã pʋga, la bẽdg na n yõka sẽn tõog-a n yi bog-zulungã pʋgẽ wã. Bala, mam na n kɩtame tɩ bõn-kãensã fãa paam Moaab nebã, yʋʋmd ning mam sẽn na n sɩbg bãmbã pʋgẽ. Maam a Sẽn-Ka-Saab n yeele.

⁴⁵ Zoɛtbã pãng sɛɛme, tɩ b yalsd Hɛsbõ n dat n soonde. La bugum zẽkda Hɛsbõ tẽngã pʋga. Bug-vɩlens yita Sɩhon na-yirã sẽn beẽ wã, n dɩt Moaab tãmsã seese, la a rɩt neb nins sẽn nong zabrã.

⁴⁶ Yãmb sẽn yaa Moaab nebã, toog bee yãmb zugu! Yãmb a neb nin sẽn dag n waoogd wẽnnaam a Kemoosã menemame! Bala, b yõga y kom-dibli wã ne y kom-pugli wã n tall n loog yembdo.

⁴⁷ La maam a Sẽn-Ka-Saab yetame: Wakat n wate, tɩ m na n lebs Moaab nebã b pĩnd zĩigẽ wã. Maam a Sẽn-Ka-Saab yeta.» Moaab sɩbgrã tɛk la a woto.