Zeremi 46 - WẼNNAAM SEBRE 2014

¹ Ad goam nins Sẽn-Ka-Saab sẽn yeel b no-rɛɛs a Zeremi, sẽn kẽed ne soolem-dãmbã wɛɛngẽ.

B tõoga Ezɩpt nebã Karkemiis tẽnga

² Yaa sẽn kẽed ne Ezɩpt wɛɛngẽ, la sẽn kẽed ne Ezɩpt rĩm a Faarõ Neko tãb-biisã wɛɛngẽ. Tãb-biisã rag n bee Efrat kʋɩlgã noore, Karkemiis soolmã pʋga. Babilond dĩm a Nebukatnedzaar rag n zaba ne bãmb n tõoge. Wakat-kãng tɩ yaa Zʋʋda rĩm a Zoziyaas biig a Yoyakim sẽn deeg a naamã tɩ yʋʋm-naaslẽ.

³ Segl-y gãn-bi wã ne gãn-bɛdã. Kẽng-y zabrã zĩigẽ!

⁴ Sog-y wiidã! Wed-rʋʋdba, zomb-y y wiidã! Fõgn-y y kut pugli n yals y zĩigẽ! Segl-y y kãnã! Yeelg-y y gãn-tigsã!

⁵ Bõe yĩng tɩ mam neẽ tɩ bãmb yɛɛsame? Bãmb tardame n lebd poorẽ. B tõoga bãmb gãndaadã, Bãmb zoetame, b zoetame n ka wẽnegd b poorẽ ye. Zĩigã fãa lebga pelen-yɩka! Maam a Sẽn-Ka-Saab n yeele.

⁶ Bɩ sẽn tʋʋl-a ne zoees ra tõog n zoe ye! Bɩ gãndaoog ra tõog n põs ye! Bãmb lakdame n lʋɩt tẽngã nug-rɩtg sẽnẽ, Efrat kʋɩlgã noore.

⁷ Ãnda la sẽn fudgd wa Nill kʋɩlgã koom sẽn pid n daagdẽ wã?

⁸ Yaa Ezɩpt n fudgd wa Nill kʋɩlgã koom sẽn pid n daagdẽ wã. A yetame: Mam na n zẽkame n lim dũniyã. Mam na n menesa tẽmsã ne nebã.

⁹ Wed-rʋʋdba, zomb-y-yã! Saar-dãmba, fõd-y n kẽ-y-yã! Kuus ne Put gãndaad sẽn tõe n tall gãn-bi n zabe, la Luud gãndaad nins sẽn mi tãp yãagrã, yik-y n kẽng-y-yã!

¹⁰ Rũndã yaa Zu-soabã sẽn yaa Saasẽ-Pãng-Soabã daare. Yaa sũ-dokr daare, yaa daar b sẽn na n dok b sũur ne b bɛɛbã. Zabr sʋʋg vargdame. A rɩtame n yũud bãmb zɩɩm n tɩgda. Yaa maoong Zu-soabã sẽn yaa Saasẽ-Pãng-Soabã yĩnga, wĩndg sẽn lʋɩtẽ dɩtg tẽngã pʋgẽ, Efrat kʋɩlgã noore.

¹¹ Ezɩpt tẽn-neere, m yãbd-fo! Kẽng Galaad n tɩ bao kaam! Fo sẽn tɩpd f mengã yaa zaalem, tɩɩm sẽn tõe n maag foom ka be ye.

¹² Buud a taabã wʋmda f yãndã yelle, la f kelemsã zẽk n pida dũniyã gilli, bala, gãndaadã kanda taab n lʋɩtẽ, bãmb naaga taab n lʋɩtẽ.

Ezɩpt yãmbgo

¹³ Ad koɛɛg ning Sẽn-Ka-Saab sẽn kõ b no-rɛɛs a Zeremi, sẽn kẽed ne Babilond dĩm a Nebukatnedzaar sẽn wat n na n sãam Ezɩptã wɛɛngẽ:

¹⁴ «Moon-y-yã-a Ezɩpt tẽngã pʋgẽ, togs-y-yã-a Migdoll nebã, togs-y-yã-a Nof ne Takpanees nebã n yeel-b yaa: ‹Segl-y y mens tɩ ned fãa yik n yals a zĩigẽ, bala, zabr sʋʋg gũbga yãmb n vargdẽ!

¹⁵ Maana a wãn tɩ f wẽnnaam a Apiisi zoetẽ? Fo loalgã ka tõe n yals ye, bala Sẽn-Ka-Saab lubd-a lame.

¹⁶ Sẽn-Ka-Saab kɩtame tɩ tãb-bi-kʋʋng lakd n lʋɩtẽ.› Bãmb kanda taab n lʋɩt n yetẽ: Yik-y tɩ d kuil d nebã nengẽ, d leb d ba-yirã, n zãag d mens ne sãamdã sʋʋga.

¹⁷ Sẽn kẽed ne Ezɩpt rĩm a Faarõ wɛɛngẽ, bool-y-yã-a tɩ ‹Bʋrg soab sẽn ka leb n tõe n maan baa fɩ.› »

¹⁸ Maam a rĩm ning yʋʋr sẽn boond tɩ Saasẽ-Pãng-Soabã yetame: «Bɛ wã waoong ka na n vaal ye. Na n yɩɩ wa Taboor tãngã sẽn be tãms a taabã sʋkã, la wa Karmell tãngã sẽn zẽk n tʋʋg ko-kãsengã!

¹⁹ Ezɩpt sẽn yaa tẽn-neerã nebã, segl-y y teed tɩ y na n looga yembdo! Bala, Nof na n sãamame, bugum na n dɩ-a lame, la ned kõn leb n zĩnd a pʋgẽ ye.»

²⁰ Ezɩpt yaa wa nag-sadg sẽn yaa neere. Keoodr yita wĩntoog sẽn lʋɩtẽ dɩtg tẽngã n watẽ.

²¹ A tãb-biisã yaa wa lull sẽn be yãgrẽ. Bãmb me lebg n zoetame, B naaga taab n zoetẽ, sẽn tõe n yals-a ka be ye. Bala, b sãoongã daar taame, b sɩbgrã daar taame.

²² B zoetame n fɩɩnd wa waafo, bala, bɛɛbã wat n na n zaba ne bãmba, la b zãada lay wa tɩ-kɛɛdba.

²³ Baa ne b weoogã sẽn wẽnd wa ka tõe n kẽ a pʋgẽ wã, b bɛɛbã kɛɛda a tɩɩsã, bala b sõorã yɩɩda kalwaare, la ned ka tõe n bãng b sõorã ye.

²⁴ Yãnd tara Ezɩpt tẽn-neerã nebã. B basa bãmb wĩntoog sẽn lʋɩtẽ dɩtg tẽngã neb nugẽ.

²⁵ Saasẽ-Pãng-Soabã sẽn yaa Israyɛll Wẽnnaamã yetame: Ade, mam na n sɩbga Amon sẽn be No wã nebã, ne Faarõ, la Ezɩpt nebã ne b wẽnnaam-dãmbã la b rĩm-dãmbã. Mam na n na n sɩbga Faarõ ne neb nins fãa sẽn teeg yẽnda wã.

²⁶ Mam na n bas-b-la neb nins sẽn baood bãmb n dat n kʋ wã nugẽ: yaa Babilond dĩm a Nebukatnedzaare, ne neb nins sẽn be yẽnda zakẽ wã. Dẽ poore, nebã na n leb n zĩnda Ezɩpt wa kʋdem-wẽndẽ wã. Maam a Sẽn-Ka-Saab n yeele.

Israyɛll yolsgo

²⁷ La sã n yaa ne foom a Zakoob sẽn yaa mam tʋmtʋmdã, da zoe rabeem ye! Israyɛll nebã, da boog-y y raood ye! Bala, mam na n fãaga yãmb tẽn-zãrg ning y sẽn beẽ wã, la m fãag y yagensã tẽng ning b sẽn be yembd pʋgẽ wã. A Zakoob yagensã na n lebg n waame, la b na n leb n zĩnda yam-gãneg ne vɩ-bãan pʋga, la ned kõn tol n kẽes bãmb dabeem ye.

²⁸ Foom a Zakoob sẽn yaa mam tʋmtʋmdã, da zoe rabeem ye! Bala, mam bee ne foom. Mam na n menesa buud nins fãa mam sẽn dag n dig yãmb tɩ y tɩ zĩnd b sʋkã, la sã n yaa ne foom, mam ka na n sãam-f ye. La baoosgo, mam n na n demsa foom wa sẽn zemse. Mam ka na n bas foom taal ye. Maam a Sẽn-Ka-Saab n yeele