Zeremi 4 - WẼNNAAM SEBRE 2014

¹ Maam a Sẽn-Ka-Saab yetame: «Israyɛll nebã, yãmb sã n lebg n wa mam nengẽ, yãmb sã n yiis bõn-naands nins mam sẽn kisã mam taoore, la y ka leb n saad n yeebdẽ,

² yãmb sã n wẽen ne maam a Sẽn-Ka-Saab sẽn vɩ wã yʋʋr ne sɩd la tɩrlem ne zemsgo, buud a taabã na n kosa maam tɩ m ning-b barka, la b na n pẽga maam.»

³ Sẽn-Ka-Saab yeela Zʋʋda ne Zeruzalɛm nebã yaa: «Kãas-y y pʋtã la y ra bʋd gõos sʋk ye.

⁴ Zʋʋda ne Zeruzalɛm nebã, Kẽes-y y mens bãong Sẽn-Ka-Saab yĩnga, la y yiis y sũurã rẽgdã, tɩ m sũurã ra wa n puug n wɩng wa bugum, n dɩ yãmb y tʋʋm-wẽnsã yĩnga, tɩ ned ka be n na n kiis-a ye.»

Bɛɛb sẽn wat n na n zab ne Zʋʋda nebã

⁵ «Moon-y Zʋʋda nebã koe-kãngã la y kɩt tɩ Zeruzalɛm nebã wʋme. Peeb-y baorg tẽngã pʋgẽ, zẽk-y y koees n yeel nebã yaa: ‹Zoe-y n tɩ tigm-y tẽms nins sẽn gũbg ne lalsã pʋsẽ!

⁶ Zẽk-y tãb-kaoor n tees Sɩyõ sẽnẽ! Zoe-y la y ra yals ye! Bala, mam kɩtame tɩ toog ne sãan-kãseng yi wĩndg sẽn lʋɩtẽ dɩtg tẽngã n watẽ.

⁷ Gɩgemd fão n yi a gãagẽ, sẽn sãamd-a soolem-dãmbã yi a zĩigẽ n watẽ. A na n sãama y tẽngã, a na n kɩtame tɩ y tẽmsã lebg raboodo. Ned ka na n tol n leb n zĩnd b pʋsẽ ye.› »

⁸ Woto yĩnga, bɩ y sẽgen bot n yãb n wiisi! Bala, Sẽn-Ka-Saab sũur ket n puuda ne tõnd n ka basdẽ ye.

⁹ Sẽn-Ka-Saab yetame: «Wakat-kãnga, rĩm-dãmbã ne nanambsã raood na n sɛɛme. Maan-kʋʋdbã pelens na n yɩkame, la Wẽnnaam no-rɛɛsdbã na n yɛɛsame.»

¹⁰ La mam yeelame: «Kayto! Zu-soabã Sẽn-Ka-Saabo, yãmb belga nin-bãmbã! Yãmb belga Zeruzalɛm nebã zãnga. Yãmb yeela bãmb tɩ b na n zĩnda ne bãane, la sʋʋg yaool n zoe n bee koakoayẽ!»

¹¹ Wakat-kãnga, b na n yeela Zeruzalɛm nebã yaa: «Sob-tʋʋlg yita we-raoogã pʋg ne tãn-bɛɛlã zutu, n wat b nin-nongdsã zutu. A ka wat n na n yelg-ba, a ka wat n na n kãag-ba.

¹² Sob-toaag ning maam a Sẽn-Ka-Saab sẽn kɩt tɩ watẽ wã yɩɩda bũmb a woto. Moasã, mam meng n na n kao bãmb bʋʋdo.»

¹³ Ade, bɛ wã wata wa sawato! A saar-dãmbã tʋʋlem wẽnda wa sob-kãsenga. A wiidã zoees tʋʋlem yɩɩda sɩlse. Ad toog paam tõndo! Tõnd sãam n sɛɛme!

¹⁴ Zeruzalɛm nebã, yiis-y wẽngã y sũyã pʋsẽ, n paam fãagre. Yãmb na n kell n pa y tags-wẽnsã pʋg hal tɩ ta dabʋre?

¹⁵ Bala, koɛɛg n yit Dan n togsd bõn-kãnga, la d wʋmda koe-beed sẽn yit Efrayiim soolmã sẽn be tãms sʋkã sẽnẽ.

¹⁶ Keoog-y buud toay-toayã, la y moon n togs Zeruzalɛm nebã yaa: «Bɛɛb n yi tẽn-zãrgẽ n watẽ. Bãmb zẽkda b koees n tãsd Zʋʋda soolem tẽmsã.

¹⁷ B na n gũbga Zeruzalɛm wa gũudb sẽn gũbg pʋʋgo, b sẽn kɩɩs maam a Sẽn-Ka-Saab yĩnga. Maam a Sẽn-Ka-Saab n yeele.

¹⁸ Yaa y manesmã ne y tʋʋmã n kɩt tɩ bõn-kãng na n paam-yã. Yaa tʋʋm-wẽnsã y sẽn maanã n kɩt tɩ to-kãngã na n paam yãmba, n kẽ yãmb n tãag y sũyã.»

A Zeremi sũur sãama toogã yĩnga

¹⁹ M pʋg zabda! M pʋg zabda! M sũur zabdame n dat n pusgi! Mam sũur digdame tɩ m ka tõe n sĩnd m noor ye. Bala, mam wʋmda baorg peebgo, la zabr kaasgo!

²⁰ Bãmb gomda sãoong woo sãoong yell bala! Tẽngã fãa sãam n sɛɛme! B na n sãama d sik zĩisã wakat-yɛnga, b na n sãama d fu-rotã nif kamsg pʋgẽ.

²¹ Mam na n yãta tãb-kaoore, la m wʋmd baorg peebg hal tɩ ta dabʋre?

Wẽnnaam na n kaoo bʋʋdo

²² Sẽn-Ka-Saab yetame: «Sɩd-sɩdã, mam nebã ka tar yam ye. Bãmb ka mi maam ye. Bãmb yaa yalemba, b ka tar bãngr ye. Bãmb sẽn mi yaa wẽng maaneg bala, b ka tol n mi neer maaneg ye.»

²³ Mam gesa dũniyã, la ade, a ka tar yalẽ ye, a yaa vɩʋʋgo. Mam gesa saasẽ, la m yãame t'a ka leb n tar a vẽenemã ye.

²⁴ Mam gesa tãmsã la ade, b rigimdame, la kunkubã fãa miimdame.

²⁵ Mam gesame la ade, ned ka be ye, la yĩngr bõn-yɩgdɩ wã fãa yɩgame n looge.

²⁶ Mam gesame la ade, zĩig ning sẽn dag n tar tɩɩsã lebga zĩ-peen-daaga. La Sẽn-Ka-Saab sũ-puugrã yĩnga, zĩ-kãng tẽmsã fãa sãamame.

²⁷ Ade, Sẽn-Ka-Saab yetame yaa: «Tẽngã fãa na n lebga raboogo, la m yaool n ka na n sãam-a zãng ye.

²⁸ Bõn-kãng yĩng kɩtame tɩ tẽngã fãa be sũ-sãang pʋga, tɩ saasẽ lebg lik bida. Yaa maam n yeele, la m yam-yãkr la a woto. Mam ka maand m bãngẽ, la m kõn lebs m noor poorẽ me ye.»

²⁹ Sɩyõ nebã sẽn wʋm saar-dãmbã ne tãb-tãoodbã rãamdã, b fãa zoeeme. B zoe n tɩ soonda tuudẽ, b zoe n tɩ rʋʋ pĩis zutu. Tẽmsã lebga vɩɩdo, ned ka leb n be b pʋsẽ ye.

³⁰ La yãmb a Zeruzalɛm nebã, yaa bõe tɩ y yeelg fu-miidu, la y ning sãnem fan-teedo, la y ning y nin kɩrʋ? Yãmb sẽn nags y mens n yaa neerã yaa zaalem. Yãmb dolsen-dãmbã ka leb n dat-y ye, b sẽn baood yaa y kũum.

³¹ Mam wʋmda kelems sẽn wẽnd pag sẽn kũmd dogem kelemse. Yaa kelems sẽn wẽnd pag sẽn kũmd a pʋg-sadem dogem kelemse. Yaa Sɩyõ tẽn-neerã koɛɛga. A tẽega a nus n yãbd n sesd n yetẽ: «Toog paam maam! M lʋɩɩ nin-kʋʋdb nusẽ!»