Zeremi 37 - WẼNNAAM SEBRE 2014

B soka a Zeremi

¹ Babilond dĩm a Nebukatnedzaar rɩka Zʋʋda rĩungã n kõ a Zoziyaas biig a Sedesiyaase, t'a led a Yoyakim biig a Koniya zĩigẽ.

² A Sedesiyaas ne a tʋmtʋmdbã la tẽngã nebã ned ba a ye ka sak n deeg goam nins Sẽn-Ka-Saab sẽn kõ b no-rɛɛs a Zeremi wã ye.

³ Rĩm a Sedesiyaas tʋma a Selemiya biig a Yukall ne maan-kʋʋd a Maaseya biig a Sofoni, tɩ b tɩ kos Wẽnnaam no-rɛɛs a Zeremi t'a pʋʋs Sẽn-Ka-Saab sẽn yaa bãmb Wẽnnaamã bãmb yĩnga.

⁴ Wakat-kãng t'a Zeremi rag n ket n bee nebã sʋka, n tar lohorem tɩ kẽng a sẽn datẽ, bala, b rag n nan ka kẽes-a roog ye.

⁵ A Faarõ tãb-biisã yii Ezɩpte, la Kalde nebã sẽn dag n gũbg Zeruzalɛm n dat n zab ne-a wã sẽn wʋm kiba-kãnga, b loogame.

⁶ Dẽ, Sẽn-Ka-Saab yeela b no-rɛɛs a Zeremi yaa:

⁷ «Maam a Sẽn-Ka-Saab sẽn yaa Israyɛll Wẽnnaamã yetame: Kẽng-y n tɩ yeel-y Zʋʋda rĩmã sẽn tʋm yãmb tɩ y wa sok maamã yaa: Ade, a Faarõ tãb-biisã sẽn wat n na n sõng yãmbã lebg n kuiisa Ezɩpte.

⁸ La Kalde nebã na n lebg n waame n wa zab ne tẽn-kãngã n tõog-a n ning-a bugum.»

⁹ Sẽn-Ka-Saab yetame: «Da belg-y y mense, n tagsdẽ tɩ Kalde nebã loogame n ka na n leb n wa yãmb nengẽ ye! Bãmb ka na n zãag ye.

¹⁰ Bala, baa yãmb sã n dag n tõogẽ Kalde tãb-biisã sẽn zabd ne yãmbã fãa, baa sã n dag n yaa sãmpoagb bal n kelle, bãmb ned kam fãa na n yik n yi a fu-roogẽ n ning tẽn-kãngã bugum.»

¹¹ Wakat ning Kalde tãb-biisã sẽn loog n bas Zeruzalɛm, Faarõ tãb-biisã sẽn dag n watã yĩnga,

¹² a Zeremi rag n baood n yii Zeruzalɛm n kẽng Benzame nebã tẽngẽ n tɩ zĩnd be, sẽn na yɩl n paam dogem pʋɩɩr a buudã sʋka.

¹³ A Zeremi sẽn ta rignoor ning b sẽn boond tɩ Benzame nebã rignoorã, a Hananiya biig a Selemiya biig a Yiriya sẽn yaa gũudbã naabã rag n yasa beenẽ. Yẽnda yõka no-rɛɛs a Zeremi n yeele: Fo rat n kẽe Kalde nebã.

¹⁴ La a Zeremi yeelame: «Ka sɩd ye. Mam ka rat n kẽ Kalde nebã ye.» La a Yiriya ka kelg a Zeremi ye. Yẽnda yõka a Zeremi n tall n kẽng nanambsã nengẽ.

¹⁵ Nanambsã sũy yika ne a Zeremi tɩ b pãb-a n kẽes seb-gʋlsd a Zonatã roogẽ wã. Bala, b rag n deega ro-kãng n maan bi-bees roogo.

¹⁶ Yɩɩ woto tɩ b kẽes a Zeremi bul-koɛɛng pʋgẽ t'a zĩnd be rasem wʋsgo.

A Sedesiyaas soos n soka a Zeremi

¹⁷ Rĩm a Sedesiyaas tʋmame tɩ b tɩ tall a Zeremi n wa, la yẽnda sẽn ta rĩmã nengẽ, rĩmã soos n soka yẽnda yaa: «Sẽn-Ka-Saab kõo foom koɛɛg tɩ f togs maam bɩ?» La a Zeremi leokame tɩ n-yẽe, la a yeele: «B na n basa yãmb Babilond dĩmã nugẽ.»

¹⁸ A Zeremi leb n yeela rĩm a Sedesiyaas yaa: «Bõe beegr la m beeg yãmb ne y tʋmtʋmdbã la y nebã tɩ y kẽesd-m doogo?

¹⁹ La y no-rɛɛsdb nins sẽn dag n togsd yãmb pĩnd-n-bãngr goam n yetẽ tɩ Babilond dĩmã ka na n leb n wa zab ne yãmb ne tẽn-kãngã nebã bee yɛɛnẽ?

²⁰ M dĩm la m soaala, m kotame tɩ y kelg maam moasã, n deeg m se-yõkrã. Ra kɩt-y tɩ b leb n tall maam n tɩ kẽes seb-gʋlsd a Zonatã roogẽ wã, tɩ m wa pa be n ki ye!»

²¹ Dẽ, rĩm a Sedesiyaas kõo noor n yeel tɩ b tɩ pag a Zeremi gũudbã zakẽ, n kɩt tɩ b raad bur-gilg a yembr daar fãa bur-wẽedbã nengẽ n wat n kõt-a, hal tɩ burã sẽn be tẽngã pʋgẽ wã fãa wa sɛ. Woto, a Zeremi paa gũudbã zakẽ.