Zeremi 34 - WẼNNAAM SEBRE 2014

Koɛɛg a Sedesiyaas yĩnga

¹ Babilond dĩm a Nebukatnedzaar ne a tãb-biisã fãa la soolem nins fãa yẽnda sẽn dag n so wã, la nebã fãa rag n yika zabr ne Zeruzalɛm la a tẽn-kɩremsã fãa. Yaa wakat-kãng la Sẽn-Ka-Saab gom ne a Zeremi n yeel-a yaa:

² «Maam a Sẽn-Ka-Saab sẽn yaa Israyɛll Wẽnnaamã yetame: ‹Kẽng Zʋʋda rĩm a Sedesiyaas nengẽ n tɩ yeel-a tɩ maam a Sẽn-Ka-Saab yetame yaa: Mam na n dɩka tẽn-kãngã n ning Babilond dĩmã nugẽ, t'a sãam-a ne bugum.

³ La fo ka na n tõog n põs yẽnda ye. B na n yõka foom n kõ-a. Foom ne Babilond dĩmã na n yãnda taab neng ne nenga. Yẽnda na n goma ne foom, la fo na n kẽnga Babilonde.

⁴ La bɩ f kelg Sẽn-Ka-Saab sẽn yet foom a Sedesiyaas sẽn yaa Zʋʋda rĩmã!› Ad Sẽn-Ka-Saab sẽn yet fo wɛɛngẽ: ‹Fo ka na n pa tãpẽ ye.

⁵ Fo na n kii ne bãane.› La b na n maana foom wa b sẽn dag n maan fo yaab-rãmbã sẽn yaa rĩm-dãmb nins sẽn zĩnd sẽn deng foomã. B na n yõoga wisd sẽn tar yũ-noogo, la b wiis n yeele: ‹Kayto, tõnd dĩmã konga pãnga! Bala, yaa maam n gom gom-kãngã. Maam a Sẽn-Ka-Saab n yeele.› »

⁶ No-rɛɛs a Zeremi togsa Zʋʋda rĩm a Sedesiyaas gom-kãensã fãa Zeruzalɛm tẽngã pʋga.

⁷ La wakat-kãng tɩ Babilond dĩmã tãb-biisã rag n yika zabr ne Zeruzalɛm ne Zʋʋda tẽms a taabã, la Lakɩɩs ne Azeka, bala Zʋʋda tẽms nins fãa sẽn dag n ketã sʋka, rag n yaa tẽn-bãmb n dag n gũbg ne lalse.

B leb n yõga yembs nins b sẽn dag n basã

⁸ Rĩm a Sedesiyaas sẽn maan kaool ne Zeruzalɛm nebã fãa n moon n yeel-b tɩ yembsã paama lohormã zugẽ, Sẽn-Ka-Saab leb n goma ne a Zeremi.

⁹ Ned fãa rag n tog n basa a yem-daadã ne a yem-pogs nins fãa sẽn yaa Ebre nebã. Ned ba a yembr ka tog n leb n dɩk Zʋɩf n maan a yamb yɛs ye. Yaa a saam-biiga.

¹⁰ Dẽ, Zeruzalɛm nanambsã fãa ne neb nins fãa sẽn dag n maan kaoolã sakame n kõ b yem-daadã ne b yem-pogsã lohorem, n ka leb n dɩk-b n maan yembs ye. B sakame n bas-b tɩ b looge.

¹¹ La rẽ zugẽ, bãmb lebsa b noorã poorẽ, n leb n tall yem-daadã ne yem-pogsã b sẽn dag n kõ lohormã n wa.

¹² La Sẽn-Ka-Saab goma ne a Zeremi n yeel-a yaa:

¹³ «Maam a Sẽn-Ka-Saab sẽn yaa Israyɛll Wẽnnaamã yetame: ‹Mam maana kaool ne yãmb yaab-rãmbã daar ning mam sẽn yiis bãmb yembdã pʋg Ezɩpt tẽngã, n yeel-b yaa:

¹⁴ Yʋʋm a yopoe zugẽ, yãmb ned kam fãa na n basa Ebre ned sẽn yaa a saam-biig sẽn koos a meng ne-yã. A na n tʋm n kõo foom yʋʋm a yoobe, la rẽ zugẽ, bɩ f bas-a t'a looge.› La yãmb yaab-rãmbã ka kelg maam ye. Bãmb ka sak n maan bũmb nins mam sẽn yeelã ye.

¹⁵ Rũndã yãmb dag n teka yam, n maan sẽn tat mam yam: Yãmb ned kam fãa mooname n yeel t'a sakame n na n kõ a yembs lohorem. Yãmb maana kaool mam taoore, roog ning b sẽn boond mam yʋʋrã a pʋgẽ wã pʋgẽ.

¹⁶ La yãmb lebsa y noor poorẽ, n leb n bool yem-daadã ne yem-pogsã y sẽn dag n kõ lohorem n bas-b tɩ b loogã, la y modg-b tɩ b lebg n yaa yãmb yembse.

¹⁷ Bõn-kãng yĩnga, maam a Sẽn-Ka-Saab yetame: ‹Yãmb ned kam fãa rag n tog n kõ a yamb lohorem, t'a yaa y saam-biiga, la yãmb ka kelg maam ye.› Woto yĩnga, maam a Sẽn-Ka-Saab yetame: ‹Mam na n basame tɩ zabr sʋʋg ne bã-longds la kom kʋ yãmba, la mam na n kɩtame tɩ dũniyã soolem-dãmbã fãa sã n yãnd yãmba, bɩ rabeem-kãseng yõk-ba.

^18-19 Zʋʋda ne Zeruzalɛm nanambsã, la zu-soben-dãmba ne maan-kʋʋdbã ne tẽngã nebã fãa rag n maana kaool ne maam, n pasg maoongã nag-bil n tũ a boag a yiibã sʋka. La nin-bãmb kɩɩsa kaoolã b sẽ maan mam taoorã, n ka maan bũmb ning b sẽn pʋlmã ye. Woto yĩnga, mam na n maana bãmb wa nag-bilã b sẽn pasgã.

²⁰ Mam na n bas-b-la b bɛɛbã sẽn baood n kʋ bãmbã nugẽ, la bãmb na n yɩɩ yĩngr bõn-yɩgdɩ ne we-rũms rɩɩbo.

²¹ Mam na n basa Zʋʋda rĩm a Sedesiyaas ne a nanambsã b bɛɛbã sẽn dat n kʋ bãmbã nugẽ. Mam na n basa bãmb Babilond tãb-biisã sẽn zoe n zãag ne yãmbã nugẽ.

²² Mam na n kõo noor tɩ b lebg n wa tẽn-kãngã pʋgẽ, n zab n deeg-a, n ning-a bugum. Mam na n kɩtame tɩ Zʋʋda tẽmsã lebg raboogo, tɩ ned ka leb n zĩnd beenẽ yɛs ye. Maam a Sẽn-Ka-Saab n yeele.› »