Zeremi 33 - WẼNNAAM SEBRE 2014

Kãab-nood a taab Zeruzalɛm yĩnga

¹ Sẽn-Ka-Saab leb n goma ne a Zeremi naoor a yiibẽ soaba, wakat ning b sẽn dag n ket n pag yẽnda gũudbã zakẽ wã n yeel-a yaa:

² «Maam a Sẽn-Ka-Saab sẽn yaa soab ning sẽn maand bõn-kãensã wã, n naand-b n kɩtdẽ tɩ b beẽ wã, soab ning yʋʋr sẽn boond tɩ Sẽn-Ka-Saab yetame:

³ Bool maam tɩ m na n leok-f lame. M na n togs-f-la bõn-kãsems sẽn na n maane, yel-solgds fo sẽn dag n ka tõe n bãnge.

⁴ Bala, maam a Sẽn-Ka-Saab sẽn yaa Israyɛll Wẽnnaamã gomda tẽn-kãngã nebã roto, ne Zʋʋda rĩm-dãmbã yiy b sẽn sãam tɩ lebg tom-dʋy zabr yĩngã wɛɛngẽ n yetẽ:

⁵ ‹Kalde nebã sã n wa na n zab ne tẽn-kãngã, b na n pids-a-la ne neb nins mam sẽn na n kʋ m sũ-yikrã pʋgẽ wã kũum. Bala, mam solga m neng ne tẽn-kãngã nebã, b wẽngã fãa yĩnga.

⁶ Mam na n yols-b lame, la m maag-ba, la m na n kõo bãmb vɩ-bãan ne yam-gãnega.

⁷ Mam na n lebsa Zʋʋda ne Israyɛll nebã b zĩisẽ, tɩ b leb n yɩ wa pĩnda.

⁸ Mam na n yɩlga bãmb ne yel-wẽn nins b sẽn maan n beeg maamã. Mam na n kõ-b-la sugri, yel-wẽn nins b sẽn maan n beeg maam la b kɩɩs maamã yĩnga.

⁹ Dũniyã rãmb fãa sã n yãnd bõn-neeb nins mam sẽn maan n kõ tẽn-kãngã wã, b na n pẽga maam la b waoog maam tɩ m sũur yɩ noogo. B sã n yãnd bõn-neebã ne naar ning mam sẽn maan n kõ tẽngã, rabeem-kãseng na n yõka bãmb tɩ b rigi.› »

¹⁰ Maam a Sẽn-Ka-Saab yetame: «Yãmb yetame tɩ zĩ-kãngã yaa vɩʋʋgo, tɩ ned wall rũng ka leb n be beenẽ ye. Zʋʋda tẽmsã pʋse, ne Zeruzalɛm soayã sẽn yaa vɩɩdã zutu, b na n leb n wʋma

¹¹ sũ-noog la kɩdeng yɩɩla, la pʋg-paal sɩdã ne pʋg-paalã sẽn yɩɩnd n yetẽ: ‹Pʋʋs-y Saasẽ-Pãng-Soabã barka, tɩ Sẽn-Ka-Saab pida ne sõmblem, la b nonglmã paada wakat sẽn ka sɛta! Bala, mam na n lebsa tẽn-kãngã nebã b zĩigẽ tɩ leb n yɩ wa pĩnda. Maam a Sẽn-Ka-Saab n yeele.

¹² Maam a Saasẽ-Pãng-Soabã yetame: Zĩ-kãngã yaa vɩʋʋg tɩ ned wall rũng ka leb n be a pʋgẽ ye. La a tẽmsã fãa pʋse, pe-kɩɩmb na n paama zĩig n gʋʋl b piisi.

¹³ Tẽms nins sẽn be tãms sʋkã ne tẽms nins sẽn be kunkub zutã, la tẽms nins sẽn be Negɛɛv ne tẽms nins sẽn be Benzame yagensã tẽngẽ ne Zeruzalɛm la Zʋʋda tẽmsã pʋse, b na n leb n sõta b piisi. Maam a Sẽn-Ka-Saab n yeele.› »

Wẽnnaam na n pidsa b kãabgã

¹⁴ Maam a Sẽn-Ka-Saab yetame: Wakat n wate, tɩ mam na n maan bõn-neeb nins mam sẽn kãab Israyɛll ne Zʋʋda buudã.

¹⁵ Wakat-kãng sã n ta, mam na n kɩtame tɩ nin-sõng yi a Davɩɩd yagensã sʋka. Yẽnda na n kɩtame tɩ tɩrlem ne bʋ-kao-tɩrg zĩnd tẽngã pʋgẽ.

¹⁶ Wakat-kãense, Zʋʋda nebã na n paama fãagre, la Zeruzalɛm nebã na n vɩɩmda ne bãane. B na n boola Zeruzalɛm tɩ «Sẽn-Ka-Saab n yaa tõnd tɩrlem.»

¹⁷ Bala Sẽn-Ka-Saab yetame: A Davɩɩd yagensã sʋka, b kõn tol n kong ned sẽn na n soog Israyɛll rĩungã ye.

¹⁸ La Leevi buudã sẽn yaa maan-kʋʋdbã sʋka, b kõn kong neb sẽn na n maand maoong sẽn yõogd bugum ne bõn-koaadl kũuni, la maand a taab ye.

Kaool sẽn ka na n tol n sãame

¹⁹ Sẽn-Ka-Saab goma ne a Zeremi n yeel-a yaa:

²⁰ Maam a Sẽn-Ka-Saab yeta a woto: Ned sã n tõog n sãam kaool ning mam sẽn maan tɩ be wĩntoog ne yʋng sʋka, tɩ wĩntoog ne yʋng ka leb n beẽ,

²¹ woto me, kaool ning mam sẽn maan ne m tʋmtʋmd a Davɩɩdã na n sãamame. Yẽnda ka na n paam yageng sẽn na n led a zĩigẽ n dɩ naamã ye. La a na n yɩɩ woto me ne Leevi nebã maan-kʋʋdbã sẽn maand mam tʋʋmdã.

²² Mam na n kɩtame tɩ m tʋmtʋmd a Davɩɩd yagensã ne Leevi buudã sẽn maand maan-kʋʋr tʋʋmdã lebg wʋsgo. Bãmb na n lebga wʋsg wa ãdsã sẽn be saasẽ tɩ ned ka tõe n bãng b sõorã, la wa bĩisrã sẽn be ko-kãsengã noorã.

²³ Sẽn-Ka-Saab goma ne a Zeremi n yeel-a yaa:

²⁴ Fo ka wʋmd bũmb nins nin-kãensã sẽn yeta la? Bãmb yetame tɩ Sẽn-Ka-Saab zãgsa buud a yiib nins b sẽn dag n yãkã. Yaa woto n kɩte, tɩ b paoogd mam nebã, n yetẽ tɩ bãmb ka leb n yaa soolem yɛs ye.

²⁵ Maam a Sẽn-Ka-Saab yetame: Yaa maam n maan kaool wĩntoog ne yʋng sʋka, la m vigl tõod nins sẽn be saasẽ la tẽngã.

²⁶ Woto yĩnga, mam ka tõe n zãgs a Zakoob ne m tʋmtʋmd a Davɩɩd yagensã, n ka yãk a Davɩɩd yagensã sʋk neb nins sẽn na n soog a Abrahaam ne a Izak la Zakoob yagensã ye. Mam na n kɩtame tɩ b lebg n wa b tẽngẽ, bala mam zoeta b nimbãanega.